Depresionhuan cajpica ¿Bibliaca ayudaita ushanllu?
Bibliapica caitami yachachin
Ari, ayudaita ushanmi. ‘Taita Diosca llaquilla cajcunataca cushichinmi’ (2 Corintios 7:6).
Depresionda charijcunataca ¿imashinata Taita Diosca ayudan?
Fuerzata cushpami ayudan. Depresionda charijcunataca ¿imashinata Taita Diosca ‘cushichin’? Tucuilla problemacunata na anchuchishpapash, chai problemacunata aguantachun fuerzata cushpami ayudan (Filipenses 4:13). Taita Dios quiquinba oraciongunata uyanataca seguromi cana capangui. Bibliapica ninmi: “Mandaj Diosca, shungupi ninanda llaquirishpa causajcunapaj ladopimi. Shungupi ninanda llaquirishpa causajcunatami quishpichin” ninmi (Salmo 34:18). Ashtahuangarin, parlaitapash na parlai ushashpa mañajujpipash, Taita Diosca quiquinba oraciongunataca uyanmi (Romanos 8:26, 27).
Bibliapi ejemplocunahuanmi ayudan. Salmo librota escribij runaguca, shuj salmopica cashna nishpami Taita Diostaca mañarca: “Mandaj Dioslla, candaca jundu jundu utujumandapachami caparijuni” nircami. Ama ninanda llaquirijuchunga ¿imata paitaca ayudarca? Paica culpable sintirijuimanda ninanda llaquirishpa causajuchun Taita Dios na munashcatami yarirca. Chaimandami paica “Mandaj Jatun Dioslla, juchacunata can ricujujpica, ¿pita causajuitalla ushangayari? Ashtahuangarin manllaihuan cambaj ñaupajpi cumurichunga, nalita rurashcata cunganaca, cambillami tiapan” nircami (Salmo 130:1, 3, 4).
Ali causaigu tianata villashpami ayudan. Taita Diosca cunan punllacunapi cushichishpapash, shamuj punllacunapica, depresionman chayachishca tucuilla llaquicunatami anchuchisha nishpami prometishca. Chai shimicuna pactarijpica, depresionguna o ‘punda ima tucushcacunapash, cungashcami canga. Yuyaimanllapash na shamungachu’ (Isaías 65:17).
Nota: Testigo de Jehovacunaca, Taita Dios ayudanataca tucui shunguhuanmi confianchi. Pero depresión unguita charishpaca, doctorcuna ayudachunmi doctorcunapaman ripanchi (Marcos 2:17). Shina cashpapash cai tratamientomi ali can, cai tratamientotami catina can nishpaca na pitapash ninajupanchichu. Ima tratamientota catina cashpapash cada unomi aliguta ricushpa agllana capan.