¿Imapïmi Dios aclala malcanta voluntaninta lulapäcunampa?

1. ¿Imapïmi aclala Diosninchic unay Israelta malcan canampa?

Diosmi utula Abrahampa milayninta malcan canampa. Chay malcanta śhutichala Israel nishanwan, paycunactam mandätuncunacta uycula, ñatacmi encargala Diospa limayninta cuydanampa sumä adoraciunnintawan (Salmo 147:19, 20). Chaymi llapa naciuncunaca bendicïcuśha canman cala. Ashicuy Génesis 22:18.

Diosmi aclala Israel malcäta testiguncuna canampä. Cay Israelitacunaca casucú-cama calmi, allinpa licaśha capäcunan cala (Deuteronomio 4:6). Israel malcäpa lulaśhanta licalmi, jucunapis Jehovata lisipäcunan cala. Ashicuy Isaías 43:10, 12.

2. ¿Imapïmi Diosninchic munan nunancuna jucllapi capäcunanta?

Diospa aclaśhan Israel malcaca, manañam allinpa licaśhañachu, mana uyalicu caśhanwanmi perdilalila Dioswan cuyachicuyninta. Chaymi Jehová cambiala rasun cristianucunäwan, muśhu malcan canampa (Mateo 21:43; 23:37, 38). Canan tiempućhu rasun cristianucunaca Jehovatam serviyalcan testiguncunanu, manañam unay Israel malcaca canñachu. Ashicuy Hechos 15:14, 17, 18.

Jesús yaćhachila atïnincunacta enterun allpäćhu willaculcanampa ñatac dicipulucunacta lulapäcunanpa (Mateo 10:7, 11; 24:14; 28:19, 20). Canan tiempućhu willacuyca cayan alli-alli puydimi. Wama lämi Jehová utuycuyan walanganpa nunacunacta llapa naciuncunapi rasun religiuncamam śhapäcamunanpa (Apocalipsis 7:9, 10). Allin cristianucunaca jucllapi calmi animanaculcan, yanapanaculcan, yaćhachinaculcan. Juc yaćhayllactam ćhasquipäcun utunacuynincunaćhu. Ashicuy Hebreos 10:24, 25.

3. ¿Imanuypam licalipäcula Jehovapa testiguncuna?

Jehovapa testiguncuna estudiayta allaycula 1870 wataćhumi. Chay ashllay nunacunallam Bibliata estudiapäcul talilälila Bibliapa yaćhachicuyninta, waquin nunacuna mana talipäcuśhanta. Chay ashllay atïnin nunacunämi Jesuspa dicípuluncunacta atichipäcula, willacuyta enterun allpäćhu Diospa gubiernumpïta. 1931 wataćhumi ćhasquilalila Jehovapa testigun śhutiyu canampa. Ashicuy Hechos 1:8; 2:1, 4, 10, 11 ñatac 5:42.

4. ¿Imanuypam lulanchic Jehovapa testiguncuna, Diospa willacuyninta?

Apostulcunäpa tiempunćhu enterun allpäćhu congregacioncunaca ćhasquipäculam yanapaycata Jehovapa aclaśhan yaćhayniyu umbricunapi. Cay aclaśhacunämi licapäcula Jesusta, congregacioncäpa Umantanu (Hechos 16:4, 5). Chaynutacmi Jehovapa testiguncunapis yanapayta ćhasquiyalcan Jehovapa aclaśhan yaćhayniyu umbricunäpi, paycunam licapayalcan llapa oficinacunäta. Chay oficinapïmi yalayämun achca publicacioncuna 700 masniyu limayćhu. Jehovapa aclaśhan yaćhayniyu umbricunämi, Bibliawan animayan consejayan Jehovapa testiguncunacta enterun allpäćhu. Enterun allpäćhu cayan paćhac walanga masniyulami congregacioncuna. Chay llapan congregacioncunäćhumi cayan yaćhayniyu umbricuna, cuydayalcan alli cuyaywanmi Diosninchicpa uwishnincunacta. Ashicuy 1 Pedro 5:2, 3.

Jehovapa testiguncunam utunacuyalcan willaculcänampa Bibliapi allin noticiacunacta, dicipulucunacta lulanampa. Wasin wasin apostulcunaca willaculcäśhannümi, paycunapis wasin wasin willacuyalcan (Hechos 20:20). Ñatac estudiachipäcunmi mayantapis rasuncata yaćhayta munapäcuptin. Manam utunacuyllachu utunacuyalcan sinu’a, familianümi cuyanaculcan, chaymi Jehová sumä Taytanu cuydayan (2 Tesalonicenses 1:3). Paycunam cayalcan alli cushishacama cay allpäćhu, Diospa munaśhanta lulapäculmi nunamasintapis Jehovapi yaćhayta yanapayalcan. Ashicuy Salmo 33:12 ñatac Hechos 20:35.