¿Imapićha am Bibliata jinalla estudianquiman?

1. ¿Imanuypaćh yanapachicunquiman Bibliata masta estudianayquipa?

Canan cay folletuta camacalul’a, yaćhayanquiñam Bibliapi śhamuśhanta. Chaymi cuyayniquita Jehovapa wiñachinqui, amam un’anquichu (1 Pedro 2:2, 3). Bibliata estudial’a, Diosninchicman aśhuycunquim, chaypita talinquim wiñay wiñay cawsaycäta. Ashicuy Juan 17:3 ñatac Judas 21.

Jehovapi masta yaćhaycuptiqui’a, feniquipis mastam tacyan’a, chay tacy’a, feniquim yanapaśhunqui allinta lulanayquipa (Hebreos 11:1, 6). Juyu lulayniquicunacta caćhaycunayquipa wanacunayquipa sumä tacyaśha feniquim yanapaśhunqui allinta lulanayquipa. Ashicuy Hechos 3:19, 20.

2. ¿Imanuypam am yanapanquiman juccunacta?

Bibliapi yaćhaśhayquita willacuyta munayanquipishćhá nunacunäta, llapanchicpis munanchicmi cay allin noticiapíta willacuyta. Canan Bibliapi yaćhayal’a nunacunätapis willacunquim Jehovapita ñatac gubiernumpita. Ashicuy Romanos 10:13-15.

Canan willacuyta munal’a familiayquitapis vecinuyquitapis tuquipmi respetuwanmi limapaycunqui. Amatacmi creenciancunapïta mana allin caśhanta limanquichu. Aśhwampa willaycunquim Diosninchicpa promesancunacta. Manamá limayllayquiwanćhu, allin lulayniquiwanmi nunacunäta animaycunqui. Ashicuy 2 Timoteo 2:24, 25.

3. Diosninchicwan ¿imanuy amistatam lulanquiman?

Bibliata estudialmi allin shun’uyu nuna canqui. Jehovapa sumä amigunmi canquipis. Ñatacmi Diosninchicpis familiantanumi licaśhunqui. Ashicuy 2 Corintios 6:18.

4. ¿Imam yanapäśhunqui allinta yaćhanayquipa?

Amam caćhaycunquichu Bibliata estudiayta (Hebreos 5:13, 14). Jehovapa testiguncunacta estudiucta mañay cay libruwan ¿Qué nos enseña la Biblia? yaćhaśhayqui maspam cushisha cawsaculcanqui. Ashicuy Salmo 1:1-3 ñatac 73:27, 28.

Yalpanquim, cay allin willacuyca Bibliaćhumi cayan. Jehovapa utunacuyninman lipäculmi masta aśhuycunqui Diosninchicman (Hebreos 10:24, 25). Jehovapa voluntáninta empiñuwan lulal’a talinquim wiñay wiñay cawsaycäta. Rasumpañamá Jehovapa amigun capäcunqui. Ashicuy 1 Timoteo 1:11 ñatac 6:19.