¿Imactam yaćhachin Bibliaca religiuncunäpita?

1. ¿Llapa religiuncunachućh allin cayan?

Llapa religiuncunaćhumi cayan allin śhun’uyu nunacuna. Paycunapita Diosninchic preocupacuyanmi, ñatacmi valorayan, chay’a allin willacuymi. Chay falsu religiuncunäpa śhutinćhu juchacunacta lulayalcan (2 Corintios 4:3, 4; 11:13-15). Noticiacunaćhupis uyaliyanchicmi falsu religiuncunaca miticuyalcanmi terroristacunaman, wañuchicücunamanpis, guerracunamanpis, urucunactapis abusapäcunmi. Chay llapan noticia pasaśhancunämi allin shun’uyu nunacunactapis llaquichipäcun. Ashicuy Mateo 24:3-5, 11, 12.

Rasumpa religiunca Jehovapa śhutintam altuman juluyalcan. Falsu religuncunañatacmi Diospa mana munaśhanta lulapäcun. Wañücunapipis, Bibliapipis manam allintachu yaćhachipäcun. Jehová munayanmi nunacunaca rasun religiuncapi yaćhananta. Ashicuy Ezequiel 18:4 ñatac 1 Timoteo 2:3-5.

2. Śhamü tiempućhu religiuncunapita ¿imactaćh yaćhachin Bibliaca?

Diosninchic manam engañachicun’achu chay religiosocunäwan masqui cuyacmi niyalcaptimpis, paycuna’a Satanaspa munaśhantam lulayalcan (Santiago 4:4). Falsa religiunca allaycula Diluviuca pasäluptinñam, juc malcam cala Babilonia śhutiyu. Chaypimi Bibliaca śhutichäla llapa falsa religiuncunäta “Jatun Babiloniawan”. Prontuñam chincachin’a Diosninchic chay Babilonia nishancäta, llapa nunacunäta engañacu religiuncunätawan. Ashicuy Apocalipsis 17:1, 2, 5, 16, 17 ñatac 18:8.

Jehová licayanmi cay mundüćhu imaymana falsa religiuncunäćhu llampu śhun’uyu nunacunacta. Chaymi utuyan enterun malcacunapita rasuncata yaćhachinampa. ¿Imanuypam? Bibliapa yaćhachiśhanwanmi. Ashicuy Miqueas 4:2, 5.

3. ¿Imactaćh lulapäcunman, cay llampu śhun’uyu nunacunaca?

Jehová cuyayanmi allin lulä nunacunäta, chaymi niyan falsa religiuncunapita yaluculcanampa. Cay nunacunaca Diosninchicta cuyal’a casuculcan’am Diospa munaśhanta lulapäcunampa. Ashicuy Apocalipsis 18:4.

Unay tiempućhupis, Jesuspa apostulnincuna willaculcaptin achca llampu śhun’uyu nunacuna ćhasquipäculam tuqui willacuycäta. Jehová yaćhachilam chay tiempućhu nunacunäta allin tuqui cawsayniyu canampa, śhamü tiempupi yaćhalul’a, mas cushisham cawsapacun’a. Chaypimi ya’acunapis, amcunapis casucuśhun Jehovapa nishanta. Jehovatam puntaman ćhulaycuśhun ima lulayninchiccunaćhupis. Ashicuy 1 Tesalonicenses 1:8-10 ñatac 2:13.

Mayanpis falsa religiuncäta caćhayculuptin’a Diosninchic cushiśhan ćhasquicun’a rasun religiunninman yaycamuptin. Paycuna’a Diospa amigunñam capäcun’a cuyacucama familiactam talipäcun’a, ñatacmi wiñay wiñay cawsaytapis talin’am. Am’a ¿munanquimanchun ćhasquïta cay tuqui bendiciuncunäta? Ashicuy Marcos 10:29, 30 ñatac 2 Corintios 6:17, 18.

4. Diosninchic ¿imactaćh lulan’a cay allpäćhu jawca cushicuy canampa?

Jehová llapa falsa religiuncäta camacáluptin cay allpächu jawca cawsacuyñam can’a. Manañam engañanacuycuna, ćhininacuycuna can’añachu. Enterun allpäćhu japallan Diosninchictam adorapäcun’a. ¿Cay manachun allin willacuy ampá canman? Ashicuy Apocalipsis 18:20, 21 ñatac 21:3, 4.