Yanapaycuy congregacionnïquita

Achca naciuncunaćhu nunacuna utunacuyalcan Jehovata cushisha adorapäcunanpämi. Paycuna cushisham cayalcan utunacuyninćhu uyalipäcun Diospi yaćhachicuycunacta, ñatac hermanucunacta yanapapäcun. Ampis, ¿cushishachun cayanqui hermanunchiccunacta yanapaycul?

1. ¿Imanuypam tiempunchacuchwan yanapaycunanchicpä hermanunchiccunacta?

Llapanchicmi yanapaycuchwan hermanunchiccunacta imanuyllapsi. Waquin hermanunchiccuna cayanmi yaśhacuna, ishyacuna, ¿puydinquimanchun paycunacta yanapayta utunacuycaman linanpä? ¿Yanapanquimanchun lantipäcuyta o wasinćhu imallantapis allichayta? (Liguicuy Santiago 1:27). Chaypi’a yanapaycuchwanmi utunacuna wasita pichayta ñatac allichayta. Manam mayanpis obligamäśhunchu chaycunacta lulananchicpä; aśhwanpa quiquillanchicpimi lulaśhun Diosta ñatac hermanunchiccunacta cuyaypï (Salmo 110:3).

Bautisaśha cäcunaca mastalämi hermanunchiccunacta yanapanchic. Waquincuna punta-lï-yaśhacunapa-yanapanin o siervos ministeriales capäcunmanmi, paycunapis tiempo pasaśhan maspa punta-lï-yaśhacuna canmanmi. Llapan hermanucuna, hermanacuna precursorcuna canmanmi. Waquin hermanucuna yanapanmanmi utunacuna wasicta lulaptin. Waquincunañatacmi lipäcun juc läducta yanapananpä juc hermanucunacta.

2. ¿Imanuypam yanapachwan illayninchicwan ñatac ima cäninchiccunawanpis?

Bibliaca niyan: ‘Cäniquicunawanpis Jehovata altuman juluycuy’ (Proverbios 3:9). Alli cushicuymi yanapay illayninchicwan ñatac ima cäninchiccunawanpis congregacioncäćhu, chaywanmi yanapan enterun allpaćhu predicaciuncäta (liguicuy 2 Corintios 9:7). Yanapanchictacmi hermanunchiccunacta sasacunacta pasaptin illayninchicwan. Waquin hermanucuna illayninta ‘japächapäcun’ donacionninta lulananpä (liguicuy 1 Corintios 16:2). Illayninchicta ćhulachwanmi utunacuna wasićhu cajitaman o internetćhu donate.jw.org nishanman. Jehová munan licachinanchicta cuyaśhanchicta illayninchicwan ñatac ima cäninchiccunacta uycuśhanchicwan.

MASTA YAĆHAYCUŚHUN

3. Illayninchicwanmi yanapaycuchwan

Jehová Jesuswan cuyanmi śhun’unpi uycücäta. Jesús cushiculam waccha viudacta illayninta ćhulayäta licalul. Liguiśhun Lucas 21:1-4 ñatac limaśhun caypi:

• Jehová cushisha cananpä, ¿achca illaytachun unanchic?

• ¿Imanuymi sienten Jehová Jesuswan uycuptinchic śhun’unninchicpi?

Yaćhanapä imacunactam lulapäcun donacionninchicwan, licaśhun VIDEUCTA. Chaypi’a limaśhun caypi:

VIDEO: Una donación para Jehová (4:47)

• ¿Imanuypam yanapan donacionninchiccuna enterun allpaćhu congregacioncunata?

4. Yanapayta munaśhanchicta nïcuśhun

Unay tiempućhu Diospa siervuncuna cushisham yanapapäcula Jehovapa wasinta allichananpä, manam illayllawanchu yanapapäcula. Liguiśhun 2 Crónicas 34:9-11 ñatac limaśhun caypi:

• ¿Imactam lulapäcula lluy israelitacunaca ‘Jehovapa wasinta’ allichapäcunanpä?

Yaćhanapä imanuypam atichipäcun Jehovapa testiguncuna israelitacunata, licaśhun VIDEUCTA. Chaypi’a limaśhun caypi:

VIDEO: Cuidemos nuestros lugares de adoración (3:31)

• ¿Imapïmi utunacuna wasita limpiananchic ñatac allichananchic?

• Am, ¿imanuycunapmi yanapanquiman?

5. Hermanucuna callpanchaculcay yanapaycalinayquipä juccunacta

Bibliami animayan hermanucunata callpanchaculcananpä mas masïsu espiritualćhu capäcunanpä, chaynüpam masta yanapapäcunman congregacioncäćhu. Yaćhanapä juc hermano lulaśhanta, licaśhun VIDEUCTA. Chaypi’a limaśhun caypi:

VIDEO: Hermanos, esfuércense por progresar en sentido espiritual (5:23)

• ¿Imacunactam lulala hermanuca mas masïsu espiritualćhu cananpä ñatac congregacioncäćhu yanapananpä?

Bibliami nin imanuymi capäcunan mayanpis punta-lï-yaśhacuna ñatac siervos ministeriales capäcunanpä. Liguiśhun 1 Timoteo 3:1-13 ñatac limaśhun caypi:

• ¿Imanuymi capäcunan punta-lï-yaśhacunaca ñatac siervos ministerialcunaca?

• ¿Imanuymi esposancunapis, chulincunapis capäcunan? (Liguiśhun 4 ñatac 11 versiculuta).

• Hermanucunaca Bibliaca nishannü callpanchacuptin cäsucuyta, ¿imanuypam yanapamanchic?

IMACTAM YAĆHALUNCHIC

Jehová allictam valoran callpanchacuptinchic tiempunchicwan ñatac cäninchiccunawan congregacioncäta apoyananchicpä.

Yalpaśhun

• ¿Imanuypam yanapachwan tiempunchicwan ñatac callpanchicwan congregacioncäta?

• ¿Imanuypam yanapachwan cäninchiccunawan congregacioncäta?

• Am, ¿imanuypam munanquiman yanapayta congregacioncäta?

MASTA YAĆHANAYQUIPÄ

Yaćhaycuy, ¿imapïmi Jehovapa testiguncuna mana diezmucta upäcunchu?

“¿Qué dice la Biblia sobre el diezmo?” (Artículo de jw.org)

Bibliami mandan bautizaśha hermanucunata waquin trabajo lulananpä. Pero, ¿imam canman bautizaśha hermano lulananta juc hermana bautizaśha lulaptin?.

“El principio de autoridad en la congregación” (La Atalaya, febrero de 2021)

Licay waquin hermanucuna imacunactam lulapäcun publicaciuncunacta ćhächinanpä hermanucunaman.

Se distribuyen publicaciones bíblicas en el Congo (4:25)

Jehovapa testiguncuna manam imactapis lulapäcunanpä waquin religiunnüchu illayta mañaculcan. Chayta yaćhanayquipä liguiy.

“¿Cómo se financia la obra de los testigos de Jehová?” (Artículo de jw.org)