YAĆHACHICUY 57
¿Imactam lulananchic jatun juchaman palpulul?
Masqui Jehovata lluy śhun’uyquiwan cuyalpis, pero ayveces palpuluchwanmi juchaman. Pero canmi mas jatun juchacunapis (1 Corintios 6:9, 10). Jatun juchacta lulaluptiquipis, yalpay Jehová manam caćhaycuśhunquichu, aśhwanpa listum cayan perdonaśhunayquipä ñatac yanapaśhunayquipä.
1. ¿Imactam lulananchic Jehová perdomananchicpä?
Mayanpis Jehovata cuyá jatun juchaman palpulul alli-allictam llaquicun. Pero Jehová nimanchicmi: ‘Juchanchiccuna masqui yawarnü puca cayaptinpis, nievinü yulä-yuläman muyuycachiśhamá caycun’a’ (Isaías 1:18). Śhun’unchicpi wanaculuptinchic, Jehová perdonamanchicmi. Pero, ¿imanuypam śhun’unchicpi wanacunchic? Mayanpis wanaculuptin jucha lulaśhampi śhun’unpis nananmi, manañam juchacta lulan’ñachu, aśhwanpa Jehovatam mañacun perdonananpä. Chaypi’a alli-allictam callpanchacun piensayninta cambiananpä ñatac viciuncunacta caćhaycunanpä Diospa munaśhannüña cawsacunanpä (liguicuy Isaías 55:6, 7).
2. Juchacta lulaluptinchic, ¿imanuypam Jehová yanapamanchic punta-lï-yaśhacunawan?
Jatun juchaman palpücunata Jehová nin: ‘Punta-lï-yaśhacunata ayay’ (liguicuy Santiago 5:14, 15). Punta-lï-yaśhacunaca cuyapäcunmi Jehovata ñatac hermanuncunacta, paycuna allin yaćhachiśhan cayan juchaman palpücunata yanapaycunanpä (Gálatas 6:1).
¿Imanuypam yanapamanchic punta-lï-yaśhacunaca juchaman palpuluptinchic? Ishcay o quimsa punta-lï-yaśhacunam Bibliawan entindichimäśhun jucha lulaśhanchic mana allin caśhanta. Chaypi’a allin consejucunactam umäśhun manaña juchamam palpunanchicpä. Mayanpis jatun juchacta lulalcul mana wanacuptin juluśham can’a, congregacioncäta proteginanpä.
MASTA YAĆHAYCUŚHUN
Jehová allicta cuyalmi yanapamanchic masqui jatun juchaman palpuluptinchicpis.
3. Juchanchicta willayca allin ninchicpämi
Juchaman palpuluptinchic Jehovatam llaquichinchic, chaymi juchanchicpi willacunanchic. Liguiśhun Salmos 32:1-5 ñatac limaśhun caypi:
¿Imapïmi juchanchicta mana pacallal lluyta willananchic Jehovaman?
Jehovaman juchanchicta willaycul, chaypi’a yanapaytam mañananchic punta-lï-yaśhacunata. Licaśhun VIDEUCTA ñatac limaśhun caypi:
¿Imanuypam yanapala punta-lï-yaśhacunaca hermanuta Jehovaman cutimunanpä?
Imam callactam willacuśhun punta-lï-yaśhacunaman, paycuna siemprem yanapamäśhun. Liguiśhun Santiago 5:16 ñatac limaśhun caypi:
¿Imapïmi willananchic imam callacta punta-lï-yaśhacunaman?
Jehovamanmi juchayquita willanayqui punta-lï-yaśhacunatapis imam callactam willanayqui ñatac awninquim Jehovapa yanapayninta.
4. Jehová llaquipanmi juchayücunatapis
Mayanpis jatun juchacta lulalul manaña wanacuptin’a juluśham can’a congregacioncäpi. Juluśhawan manañam cusca caśhunchu. Liguiśhun 1 Corintios 5:6, 11, ñatac limaśhun caypi:
Aśhllay levadurallam pu’uchin mäsata, chayurá ¿allinchun canman juchanpi mana wanacü nunawan cusca captinchic?
Punta-lï-yaśhacunaca atichipäcun Jehovapa llaquipaynintam, chaymi aśhipäcun congregaciuncäpi juluśhacunata yanapaycunanpä. Achca juluśha cäcunaca cuticämulam congregacioncaman, paycuna allictam ñacapäcula, pero allininpämi cala (Salmo 141:5).
¿Imanuypam licachin Jehová llaquipaśhanta ñatac cuyaśhanta juchayücunata?
5. Jehová perdonamanchic wanacuptinchicmi
Jesús juc tincuchiwan yaćhachila juchapacüca wanacuptin Jehová allictam cushicun. Liguiśhun Lucas 15:1-7 ñatac limaśhun caypi:
Jesús nishanwan, ¿imactam yaćhachimanchic Jehovapi?
Liguiśhun Ezequiel 33:11 ñatac limaśhun caypi:
¿Imactam lulananchic wanacuśha caśhanchicta licachinanchicpä?
Jehová uwish michinümi: allictam preocupacun uwishnincunapi.
WAQUINCUNA NIŚHUNQUIMANMI: “Manchacümi punta-lï-yaśhacunawan limayta. Juchapi willaluptï julumanmanćha”.
Mayanpis chayta niśhuptiqui, ¿ima ninquimanmi?
IMACTAM YAĆHALUNCHIC
Juc jatun juchaman palpulul śhun’unchicpi wanaculuptinchic ñatac manañam chay juchata lulananchicchu, chaymi Jehová perdonamäśhun.
Yalpaśhun
¿Imapïmi allin canman willananchic juchanchicpi Jehovata?
¿Imactam lulananchic Jehová juchanchicpi perdonamänanchicpä?
Jatun juchaman palpuluptinchic, ¿imapïmi mañacunanchic punta-lï-yaśhacunapa yanapayninta?
MASTA YAĆHANAYQUIPÄ
Cay videućhumi yaćhanqui imanuypam juc hombre yaćhala Jehová perdonacú caśhanta, Isaías 1:18 nishannü.
¿Imactam lulapäcun punta-lï-yaśhacunaca yanapananpä juchayücunata? Chayta yaćhanayquipä liguiy.
¿Imanuypam licachinchic cuyaśhanchicta ñatac llaquipaśhanchicta mana wanacü nunacunata? Chayta yaćhanayquipä liguiy.
“Cómo se ayuda a los que han sido sacados de la congregación” (La Atalaya, agosto de 2024)
Yaćhaycuy imanuypam juc hombre tantiala Jehová cuticachimuśhanta malcanman.
“La Biblia les cambió la vida” (La Atalaya, 1 de abril de 2012)