Imaraicuta Bibliamanda mas yachasha catina angui

1. Bibliamanda yachasha caticpiga, imasata yanapai tucungui

Caigama Bibliamanda ashillallata yachashahuas Jehovata mas llaquingahuami yachashcangui. Chasna ashahuas, Jehovata astahuan mas llaquisha catina angui (1 Pedro 2:​2, 3). Jehovahua mayambi angahuaga Bibliata mas yachasha catishallami huiñai causaita charingui. Juan 17:3; Judas 21, leingui.

Diosmanda mas yachasha catishami, canga sinzhita quirisha Diosta cushiyachingui (Hebreos 11:​1, 6). Paita quirishami ñucanchi ñaupa causaita saquishun. Hechos 3:​19, leingui.

2. Imasata canga shuccunata yanapanata ushangui

Canga shuc runagunatas cuintanata munanguimachari, can yachashca sumac cuintaigunata. Can Bibliamanda yachasha riushami yachangui, Jehovahua ali cuintaigunata shuc runagunama imasa Bibliahuan yachachinata. Romanos 10:13-15, leingui.

Pundaga camba aillugunahuan, amigogunahuan callarina mangui. Canga paigunata llaquisha, balichishami rimana angui. Camba religionga llulla man nisha mana rimana changui. Astahuambas shamuc punzhagunaibi Dios imata rangaraushcata cuintana mangui. Yuyari, camba ali causaita ricushami can rimashcagunatahuas mas quiringa. 2 Timoteo 2:​24, 25, leingui.

3. Diospagma caillayashaga imata tucunata ushangui

Bibliata yachasha caticpimi espiritualmente huiñangahua yanapai tucungui. Astahuambas canga Diospa aillu tucunata ushangui. 2 Corintios 6:18, leingui.

4. Diosta sirvisha catingahuaga imata rana angui

Diospa Shimita yachanataga mana saquina changui (Hebreos 5:​13, 14). Shuc Jehovahua testigota tapungui, Bibliaga caitami yachachin nishca librohuan yachachisha catihuai nisha. Astahuan yachasha catishaga, mas cushimi causangui. Salmo 73:27, 28; Romanos 7:22, leingui.

Yuyari, Bibliamanda gustu cuintaigunaga cushi Diosmandami shamun. Diosta sirviccunahuan tandarishami paihuagma caillayangui (Hebreos 10:24, 25). Tucui shunguhuan Jehova munashcata rasha catishaga, huiñai causaitami charingui. Diospagma caillayashaga mana ima uraspas aripintiringuichu. Romanos 2:7; 1 Timoteo 1:​11, leingui.