Imasata Diospagma caillayanata ushangui

1. Diosca huin mañaigunatachu uyan

Diosca jatun ushaita charishahuas, tucui sami runagunatami nin, mañaigunata rasha ñucahuagma caillayaichi nisha (1 Juan 5:14). Chasna nishaga mana ninzhu, huin mañaigunata uyanillami nisha. Diospa Shimiga ninmi, cariguna paihua huarmita mana alita llaquiucpiga Diosca mana chi carigunahua mañaita uyangachu nisha (1 Pedro 3:7). Israelitaguna cuti cuti mana alita racpiga, Diosca paiguna mañaitaga mana uyac chara. Chasna acpihuas, runaguna juchaibi urmashca huasha, shungüibi llaquirisha Diosta mañacpiga paiga uyanmi. Isaias 1:​15; Hechos 3:19, leingui.

Cai videota ricui: Diosca huin mañashcatachu uyan

2. Imasata Diostaga mañana anchi

Jehovata mañashaga pai ñucanchi Dios ashcatami ricuchinchi. Chasna ashaga, Jehova Diosllatami mañana anchi. Jehovallami ñucanchita rashcamanda sirtu Dios an (Mateo 4:​10; 6:9-13). Chimandahuas, juchayuc ashcamandami, Jesucristohua shutibi mañana anchi. Paimi ñucanchi juchamanda huañura (Juan 14:6). Jehovaga mana munanzhu yuyaimandalla chillatata chillatata mañanauchun nisha. Paiga munanmi, ñucanchi shungu ucumanda yuyaigunahuan paita cuintanauchun nisha. Mateo 6:7; Filipenses 4:6, 7, leingui.

Yaya Diosca ñucanchi chunlla mañashcagunatahuas uyanmi (1 Samuel 1:​12, 13). Paiga munanmi tucui uras paita mañanauchun nisha. Tutamanda liccharisha, puñungahua risha, micungarausha, llaquigunata charishahuas Diosta mañana anchi. 1 Pedro 5:7; Mateo 15:​36, leingui.

3. Jesusta caticcunahuan tandarinaga imasata yanapai tucunchi

Diosta mana quiric runaguna chaupibimi causanchi. Chigunaga, Diosmi cai Allpama cushi causaita apamunga nishcata uyashahuas asishami uyanaun (2 Timoteo 3:1, 4; 2 Pedro 3:​3, 13). Chiga ñucanchi Jehovahuagma caillayangahua sinzhiyaushcatas saquichi tucushunmi. Chiraicumi Jesusta caticcunahuan sinzhiyanacungahua tandanacuna anchi. Paigunahuas ñucanchi sinzhiyachinauchun nishami minishtinaun. Hebreos 10:24, 25, leingui.

Diosta llaquic runagunahuan tandarishami Diospa mayambi auc shina sintirishun. Jehovahua testigoguna tandarina huasima rishaga, paiguna sinzhi quirishcata ricushami ñucanchihuas sinzhiyashun. Romanos 1:​11, 12, leingui.

4. Imasata canga Diospagma caillayanata ushangui

Biblia nishcata shungumanda yuyarishami Diospagma caillayangui. Paiba cunaigunaibi, rashcagunaibi, rasha nishcagunaibihuas yuyarina mangui. Chibi yuyarisha, Diosta mañashaga, pai llaquic ashcata, tucuita yachac ashcatami intindingui. 1 Timoteo 4:15, 16, leingui.

Diosta sinzhita quirishallami paihuagma caillayanata ushangui. Quirinaga shuc mallqui shina man. Causasha catingahuaga cuti cuti yacuta minishtinmi. Chasnallatami ñucanchihuas Diosta quirisha catingahuaga cuti cuti, imaraicuta chita quirini nisha yuyarina anchi. Mateo 4:4; Hebreos 11:1, 6, leingui.

5. Jehovahuagma caillayashaga ima ali causaitata charishun

Jehovaga paita llaquiccunatami cuiran. Diosca mana saquingachu ñucanchi huiñai causaita, paita quirinatas chingachinauchun nisha (Salmo 91:1, 2, 7-10). Diosca yachachi tucunchimi, ama yapacta ungusha, cushi causanauchun nisha. Astahuambas Diosca alita causangahuami yachachin. Salmo 73:27, 28; Santiago 4:4, 8, leingui.