Diosca ñucanchi imasa causanatata munan
PERIODICOIBI, televisionbi, radioibi, internetpihuas shuhuashcagunata, huañuigunata, guerragunatas uyanchi o ricunchi. Chimandahuas canllatachari ungushca angui. Camba aillu huañucpichari llaquirishca angui.
Yuyai:
Diosca camba ailluhuan casna causachun munanzhu.
Problemagunata alichingahua, maibita yanapaita tupangui.
Ima urasca cai munduibi cungailla causana tiyangachu.
Bibliaga cai tapuigunata cutichin.
BIBLIAGA YAYA DIOS RUNAGUNATA ALI GUSTU CAUSAITA CUNATA YACHACHIN.
Runagunaga mana llaquirisha, mana rucuyasha, mana huañusha causangauna (Apocalipsis 21:4).
“Mana puricca taruga shina callpanga” (Isaias 35:6).
“Mana ricucpa ñahuiga pascaringami” (Isaias 35:5).
Huañushcaguna causaringaunami (Juan 5:28, 29).
Mana pihuas ungungachu (Isaias 33:24).
Huingunaraicu micuna tiyanga (Salmo 72:16).
BIBLIAGA YANAPANMI
Huashaibi leishcaga muscui shina man ninguichari. Chasna ashahuas, Diosmi caita rasha nin. Bibliaga imasa pactachinatami riman.
Chasnallata cushi causaita charingahua imata ranata Biblia riman. Can yapa pinsarishcata shuc ratohua yuyari. Ailluibichari problemata charingui, cullquichari pishin, ungushcachari angui. O camba aillu huañushcamandachari llaquirishca angui. Bibliaibi tiyac cunaigunami cai llaquigunata ahuantangahua yanapanga. Chasnallata huaicuibi ac tapuigunata Biblia cutichishcata yachasha cushiyanguimi.
Imaraicuta turmintarinchi.
Problemagunata imasata alichina ushanchi.
Ailluhuan cushi causangahua imatata rana anchi.
Huañushca huashaga imata tucunchi.
Huañushca aillugunata cuti ricuna ushanchichu.
Dios pai rimashcata pactachingaraushcata imaraicuta quirinchi.
Cai librota leiushaga, Biblia imata nishcata yachana munashcata ricuchingui. Cai libromi intindingahua yanapai tucungui. Cai parrafogunamanda tapuigunami Bibliata intindingahua yanapanga. Ashca huaranga runagunami Jehovahua testigogunahuan Bibliamanda yachanata gustanaun. Candahuas gustashaga ali manga. Biblia rimashcata yachanaga yanapai tucunguimi.