Timoteoga tucui runagunatami yanapanata munara

Timoteoga shuc runagunata yanapashaga cushimi sintirira. Caru partimanda runagunata yanapangahuami rira. Paiga cushi, gustu causaitami charira. Paimanda yachanata munanguichu...

Listra nishca llactaibimi Timoteoga huiñara. Paiba mamaga Eunices, paiba apamamaga Loida nishca mara. Paigunaga ichillamandami Timoteotaga Jehovamanda alita yachachisha huiñachinaura. Chiraicumi ichillamanda Timoteoga runagunama Jehovata ricsichina munaita charira.

Shuc punzhaga, Timoteo ña malta ashcaibi Pabloga nirami: “Diosmanda yachachingahua shuc llactama ringarauni. Ñucahuan acu” nisha. Timoteoga ashcata cushiyashami: “Indá, rishami” nira. Paiga runagunata yanapanatami munara.

Paigunaga Tesalonica llactama rinaura. Chiga Grecia nishca llactaibi man. Chima pactangahuaga, caruta purisha rishca huasha, barcoibis rina manaura. Sambayacta rishcaibimi pactanaura. Chibi ashca runagunata Jehovata ricsichisha yanapanaura. Chasna acpihuas, maican runagunaga ashcata piñarishami paigunata macanata munanaura. Chasna racpimi Pabloga Timoteohuan shuc llactama Diosmanda yachachingahua rinaura.

Shuc quillaguna huasha, Pabloga Timoteota nira, Tesalonicama bulltiana mangui nisha. Pabloga yachanata munarami, Jesusta caticcuna imasa chibi aushcata. Chi Tesalonica llactaibiga Jesusta caticcunataga ashcata turmintachinaura. Chiraicumi Timoteoga chima bulltiangahua cariyana ara. Timoteoga imatata rara. Timoteoga huauquigunata, panigunata llaquishcamanda, rishami nira. Tesalonicamanda bulltiamushaga, chibi huinguna ali aushcatami Pablota cuintac shamura. Tesalonicamanda huauquigunaga Jehovata tucui shunguhuan sirvisha catiunaura.

Timoteoga Pablohuan pariumi ashca timputa Jehovata sirvira. Chiraicumi shuc punzhaga Pabloga casna quillcara: “Shuccunata pasiasha yanapangahuami Timoteota cachangarauni. Pai shinaga mana pihuas tianzhu. Paiga Jehovata, runagunatahuas shungumanda llaquic man” nisha.

Canhuas shuc runagunata llaquinguichu. Indá, llaquinguimi. Shinashaga runagunata Jehovamanda ricsichinata munanguimachu... Chasna yanapashaga, Timoteo shinami cushi, gustu causaita charingui.