Diospa amigo tucungahua imata rana anchi

1, 2. Pigunata Jehovahua amigoguna anaura.

PITATA camba amigo tucuchun anllanguima. Can ali apanacushca runata, ali shungu runata, ali tunu runata.

² Jehovaga maican runagunata paiba amigo tucuchun anllashca. Por ejemplo, Abrahanga Jehova Diospa amigo mara (Isaias 41:​8; Santiago 2:23). Rey Davidpas Jehovahua amigollata mara. Jehovaraicu Davidca pai shina yuyaric runa mara (Hechos 13:22). Chasnallata, profeta Danielta Jehova nira “ñuca munashcata rauc runa” man nisha, pairaicu Danielga balic mara (Daniel 9:23).

3. Abrahan, David, Danielga imaraicuta Jehovahua amigo anaura.

³ Abrahan, David, Danielga imaraicuta Jehovahua amigo anaura. Jehovaga Abrahanda nira: “Ñuca rimashcata uyashcanguimi” (Genesis 22:18). Jehovaga casuc, mansu shungu runagunahua amigo man. Astahuanbas, shuc llacta intiruhua amigo tucuna ushan. Jehovaga Israel llactata nira: “Ñuca rimashcata casuichi, chasna racpiga canguna Dios ashami, cangunallatami ñuca llacta tucunguichi” (Jeremias 7:23). Chasnallata, Jehovahua amigo tucuna munashaga paita casuna manchi.

JEHOVAGA PAIBA AMIGOGUNATA YANAPAN

4, 5. Jehovaga paiba amigogunata imasata yanapan.

⁴ Bibliaga nin, Jehovaga “alita raccunataga pai ricusha cuiranmi, paiguna mañashcagunatas uyanmi” (1 Pedro 3:12). Salmo 32:​8ibi Jehova paiba amigogunata ali cunaigunata cusha alita rangahua yanapanga.

⁵ Shuc ushayuc enemigomi ñucanchi Diospa amigo anata mana munan. Chasna acpihuas, Jehova ñucanchita yanapanata munan (Salmo 55:22 leipai). Paiba amigo ashami, tucui shunguhuan mana saquisha atun llaquigunata charishahuas Jehovata sirvinchi. Chasnallata, apostol Pablo shinallata quirinchi. Pai Jehovamanda quillcara: “Dios ñucata yanapashcamandami maican runas ñucata imata rasha nicpihuas mana manzhashachu” (Hebreos 13:6). Chasna ashahuas, Supaiga Jehovahua amigo anata saquichingahua imatata ran.

SATANASCA RUNAGUNA DIOSTA MANA LLAQUINZHU NIN

6. Supaiga runagunamanda imata nin.

⁶ Capitulo 11bi Supaiga Jehovata llulla man nisha yanga culpashcata yacharanchi. Satanasca Adan y Evata paiguna munashcata anllachun mana saquishcamanda Dios mana ali chan nira. Job librohuas, runaguna Diospa amigo tucuchun Satanas mana munanzhu nin. Supaiga Yaya Diosta nin paiguna munashcata cugllaibi runaguna sirvitucungui nisha. Runaguna canda mana llaquitucunguichu nira. Chasnallata, maican runatahuas Diosmanda caruyachina ushanimi nin. Job runata Jehova imasa yanapashcata yachashunchi.

7, 8. a) Jehovaga Jobmanda imata pinsara. b) Supaiga Jobmanda imata nira.

⁷ Jobca pi tara. 3.600 huata huashama causac ara. Jehovaga chi timpuibi mana pihuas pai shina cai Allpaibi tiyanzhu nira. Jobca Jehovata balichisha, mana ali raigunata mana gustac chara (Job 1:​8). Jehovaraicu Jobca llaquishca amigo mara.

⁸ Satanasca nira, Dios yanapagllaibi Jobca paita sirvin nisha. Supaiga Jehovata nira: “Manachu paita cuirangahua, paiba mayanda, paiba huasi mayanda, pai tucui charishca mayandas cercata shina churashcangui. Pai maquihuan tarabashcata bendiciashcanguimi, paiba huagragunahuas allpaibi mirashcaunami. Chasna ashahuas, ricungahua, pai tucui charishcata quichuiya, paiga camba ñahuibi piñasha camitucunguimi” (Job 1:​10, 11).

9. Jehovaga Supaita imata rachunda saquiralla.

⁹ Supaiga Jobta Dios yanapacllaibimi paita sirvin nira. Chasnallata, Job Diosta mana sirvichun caruyachinata ushanimi nira. Jehovaga Supai Jobta llaquichinata mana munashahuas, Supai camachun saquirallami. Chasna rashami, Job shungumanda Diosta llaquisha sirvishcata ricuchina ushara.

SUPAI JOBTA TURMINTACHIN

10. a) Supaiga Jobta imasata turmintachira. b) Jobca Diosta culparachu.

¹⁰ Supaiga Jobpa huagrata shuhuachisha, shuccunata huanchira, casnami turmintachira. Chi huasha, paita sirviccunata cadsi tucuigunata huanchi cachara. Tucuchingahua, Jobhua chunga huahuagunata rundu huairahuan huanchira. Chasna ashahuas, Jobca Diosta mana saquirachu. Bibliaga nin, tucui “turmintuta charishahuas Jobca mana ucharachu”, chi turmintugunamanda Jehovata mana culparachu (Job 1:​12-19, 22).

11. a) Supaiga Jobta llaquichisha chillaichu saquira. b) Jobca Diosta saquirachu.

¹¹ Supaiga Jobta tucuita llaquichishahuas mana chillaichu saquira. Diosta piñachisha nisha casna nira: ‘Paiba tulluta, paiba aichatas tacasha unguchi. Chasna racpi, paiga canda piñasha camitucunguimi’. Supaimi manzhanaita ungüihuan turmintachisha unguchira (Job 2:​5, 7). Chasna ashahuas, Jobca Diosta mana saquirachu. Huañunagama Diosta mana saquishachu nira (Job 27:​5).

12. Jobca imasata Supai llulla ashcata ricuchira.

¹² Jobca Supai turmintachiushcata mana yacharachu. Jehovachari turmintachihuan nisha yuyarira (Job 6:​4; 16:​11-14). Chasna ashahuas, Jehovamanda mana caruyarachu. Caita ricusha, Jobca Dios yanapagllaibi mana sirvishcata yachanchi. Diosta llaquishami paiba amigo ara. Supai rimashcaga mana sirtu chara.

13. Jehovaga Job mana saquishcamanda imata rara.

¹³ Cieloibi ima tucushcata mana yachashahuas, Diosta mana saquisha Supai irus mana ali ashcata ricuchira. Jehovaga Job mana saquic amigo ashcamanda bendiciarami (Job 42:​12-17).

SUPAIGA DIOS YANAPAGLLAI PAITA SIRVIN NI TUCUNGUI

14, 15. Supaiga tucui runagunata imata nin.

¹⁴ Job pasashcamanda imatata yachanchi. Cunan punzhaibiga tucui Diosta sirviccunata Supai paigunallaibi pinsac man nin. Dios yanapacllaibimi paita sirvinaun ni tucunchi. Supai nira: “Runaga ima charishcatas pai causaita quishpichingahua cunga” (Job 2:​4). Supaiga tucui runagunata paigunallai yuyaric manaun nin. Job huañushca huasha, ashca huata pasashcaibi, Satanasca Jehovata camisha, paita sirviccunata yanga llullasha chara catiurami. Chiraicu, Proverbios 27:11bi Jehova nin: “Ñuca huahualla ali yuyac ai, ñuca shunguta cushiyachihuai. Chasna racpi, ñucata piñasha caudsayachiuta cutichisha”. Supaiga Diosta camisha asiun.

¹⁵ Canga Diosta sirvisha paiba amigo angahua anllana ushanguimi. Chasna rasha, Supai llulla acta ricuchingui. Diospa amigo tucungahua camba causaibi atun cambiogunata ranachari angui. Chasna acpihuas, pactachishaga alitami causangui. Supaiga problemagunata charisha Diosmanda caruyanguimi ni tucungui. Diosmanda caruyachingahua, Supaiga imatas ranmi. Imasata caruyachin.

16. a) Supaiga runaguna Jehovata sirvinata saquichun imata ran. b) Jehovata can sirvinata saquichun nisha, Supai imata rana ushan.

¹⁶ Supaiga Diospa amigo anata runaguna saquichun nisha chican trampagunata churan. Imasaibiga, piña “leon cuinta” atacai tucunchi (1 Pedro 5:​8). Chiraicu, camba ailluguna, amigoguna o shuc runagunas Bibliata estudianata saqui nicpihuas, mana manzhasha Diosta casusha catingui. Paiguna atacauta shinachari sintiringui (Juan 15:​19, 20).a Imasaibi, Supaiga “sumac angel cuinta” ricurin. Chasna rasha, Supaiga runagunata umasha Diosmanda caruyachinata munan (2 Corintios 11:14). Astahuanbas, Supaiga Jehovata sirvinata ñucanchi saquichun nisha mana balicta shina sintichinata munan (Proverbios 24:10).

JEHOVA NISHCATA CASUI

17. Imahuata Jehovata casunchi.

¹⁷ Jehovata casushaga Supai llulla ashcata ricuchinchi. Imata casuc angahua yanapanga. Bibliaga ninmi: “Camba [Jehova] Diosta tucui camba shunguhuan, tucui camba almahuan, tucui camba yuyaihuan, tucui camba ushaihuanbas llaquina mangui” (Marcos 12:30). Jehovata llaquishami paita casunchi. Jehovata mas llaquishaga, tucui pai nishcata casushun. Apostol Juan casna nira: “Yaya Diosta llaquinaga pai mandashcagunata pactachina man. Ñáa pai mandashcagunaga pactachinata ushanalla” o mana sinzhi chan (1 Juan 5:​3).

18, 19. a) Jehovaga imagunata mana ali chan nin. b) Jehovaga mana rana ushashcata tapui tucunchichu.

¹⁸ Jehovaga mana ali raiguna tiyacta ninmi. Mas yachangahua “Jehova mana gustashcata mana gustana changui”, nishca recuadrota ricui. Punda ricushaga maicanguna alinaya man ninguichari. Chasna acpihuas, Bibliamanda textogunata leisha, pinsashami Dios nishcagunata casuna ali acta intindingui. Chasnallata, camba causaibi cambianatachari musiaringui. Chita ranaga imasaibi sinzhichari anga. Chasna acpihuas, Jehova nishcata casushaga cungailla, Jehovahua ali amigo shina cushi causangui (Isaias 48:​17, 18). Cambiana ushashcata imasata yachanchi.

¹⁹ Jehovaga ñucanchi mana rana ushashcata mana tapunzhu (Deuteronomio 30:​11-14). Jehovaga ñucanchita llaquic amigo asha, ñucanchi imasa acta alita ricsi tucunchi (Salmo 103:14). Apostol Pablo cushiyachic shimita nira: ‘Yaya Diosca mana cungaringachu, canguna ahuantana tupullata saquingami. Supai quillachiushcaibi Yaya Dios canda ricuchingami imasna can supaita binsinata’ (1 Corintios 10:13). Jehovaga alita rangahua yanapai tucushunmi. Astahuanbas llaquigunata binsingahua “sinzhi ushaita” Jehova cui tucushun (2 Corintios 4:​7). Apostol Pablo atun llaquigunata pasashcaibi Jehova yanapara. Chiraicu pai nira: Dios “ushaita cuhuashcamandami imata ranatas ushani” (Filipenses 4:13).

JEHOVA MUNASHCA SHINA ALITA RASHA CAUSAI

20. Jehovahua amigoguna imata rana anaun, imaraicu.

²⁰ Jehovahua amigo tucuna munashaga, pai mana ali chan nishcata saquisha, alita rasha catina anchi (Romanos 12:​9). Astahuanbas, Diospa amigogunaga pai munashca shina alita rasha causanaun. Jehova shina ana munanaun ‘llaquic, cushiyac, cungailla causac, ahuantasha puric, mana mitsasha cumbirac, yanapac, mansu shunguyuc, amu aicha munashcata mandac’ (Galatas 5:​22, 23). Diospa amigoguna imasa acta yachana munashaga Salmo 15:​1-5 leipai.

21. Imata Jehova shina angahua yanapai tucungui.

²¹ Imata Jehova shina angahua yanapanga. Jehova munashcata yachana anchi. Chita rangahua, caran uras Bibliata alita intindisha leipai (Isaias 30:​20, 21). Chasna rashaga, Jehovata astahuan llaquisha paita tucuibi casushun.

22. Jehovata casucpiga imata cuitucushun.

²² Ñucanchi causaibi cambianaga, mauca llachapata cambiarisha mushuc llachapata churarina shina man. Bibliaga ‘ñaupa mana alita rasha causashcata saquisha’ canguna ‘yuyaita mushugyachichi ’ nin (Colosenses 3:​9, 10). Mana pactachibaglla acpihuas, Jehovata casusha cambiacpiga pai ñucanchi munashcata cui tucushun (Salmo 19:11). Jehova cungaraushcamandalla ama casuichu, astahuan paita shungumanda llaquisha casui. Chasna racpiga, Supai llulla acta ricuchisha Jehovahua ali quiquin amigo tucungui.