13 YACHANA PARTI
Mana sirtu religiongunaga Diosta pingachinaun
Diosca llaquic man. Chasna ashahuas, Diosmanda rimac religiongunaga mana aligunata ranaun. Imahuata paiguna nishcata mana pactachinaun. Mana sirtuta yachachic religionguna ashcamanda. Paiguna yachachishca, rashcagunaga, Diosmanda llullagunata quirichinaun. Caita, imasata rashcauna. Paiguna rashcaga, Diosta imasata sintichin. Caimanda, Diosca paigunata imatata ranga.
1. Mana sirtu religiongunaga paiguna yachachishcahuan imasata Diosta pingachinaun
Mana sirtu religiongunaga “Diospa sirtu shimita saquishami, llulla shimigunata catishcauna” (Romanos 1:25). Chi religiongunaga, runagunata Diospa shutita mana yachachinaunzhu. Chasna acpihuas, Bibliaga nin, Diospa shutita rimana manchi nisha (Hechos 2:21). Cai religiongunata pushaccunaga ima llaquiguna tucucpi, Diospa munai man ninaun. Chiga mana sirtu chan. Ima turmintu tucucpihuas, Diosca mana culpata charinzhu. Paiga ñucanchita mana turmintachinzhu (Lamentaciones 3:33ta leipai). Religionguna llullasha rimashcaga, runagunata Diosmanda caruyachishca.
2. Mana sirtu religiongunaga paiguna rashcagunahuan imasata Diosta pingachinaun
Mana sirtu religiongunaga, Jehova cuirashca shina, runagunata mana cuiranaunzhu. Bibliaga nin, paigunahua “uchagunaga ahuapachagama tapacta ara” (Apocalipsis 18:5). Religiongunaga ashca huatagunata politicaibi satirishcauna. Guerragunata yanapashami, ashca runagunata huanchichishcauna. Religionda pushaccunaga, ashca cullquita charinata munanaun. Chiraicumi, paita caticcunata cullquita tapunaun. Paiguna casna rashcaga, Diosta mana ricsishcata ricuchin. Chiraicu, paiguna mana Diospa parti chanaun (1 Juan 4:8ta leipai).
3. Mana sirtu religion rashcata ricushaga Diosca imasata sintirin
Mana sirtu religion mana alita rashcata ricushaga, can piñaringuimachari. Chasnallata, Jehovaga paiguna mana alita rashcata ricusha, masta piñarin. Diosca huingunata llaquin. Chasna acpimi, paimanda llullasha, runagunata turmintachishcamanda, religionda pushaccunahuan yapa piñarishca man. Diosca mana sirtu religion tucuringami nin. Chi religionguna, “mana cuti ricuringachu” (Apocalipsis 18:21). Jehovaga ñallami tucui mana sirtu religiongunata chingachinga (Apocalipsis 18:8).
CAIMANDA MASTA YACHAI
Jehova mana sirtu religionmanda imashina yuyashcata yachashun. Chimandas, chi religionguna imata rashcamanda masta ricushun. Tucuchingahua, chi religionguna mana alita racpihuas, imahua Jehovamanda yachasha catina ashcata yachashun.
4. Diosca tucui religiongunatachu alita ricun
Ashca runaguna ninaun, tucui religiongunami ali anaun nisha. Chican chican ñambita rishahuas, Diosmallata pactanchi ninaun. Chiga sirtu chan. Lucas 13:24ta leichi, huasha cai tapuimanda cuintanacuichi:
Biblia nishca shina, huiñai causaima apac punguga imasa tan.
VIDEOTA ricuichi, huasha cai tapuimanda cuintanacuichi:
Bibliaga Diosta tucui religiongunata gustashcata yachachinzhu.
5. Mana sirtu religiongunaga, Dios llaquishca shina, shuccunata mana llaquinaunzhu
Mana sirtu religiongunaga, mana alita rasha, Diosta pingachishcauna. Chasnallata, guerragunata yanapashcamanda, iridsata rashcauna. VIDEOTA ricuichi, huasha cai tapuigunamanda cuintanacuichi:
Segunda Guerra Mundial timpuibi, iglesiagunata pushaccuna imatata ranaura.
Chi religionguna rashcamanda, can imatata yuyangui.
Juan 13:34, 35 y 17:16ta leichi, huasha cai tapuigunamanda cuintanacuichi:
Religionguna guerragunaibi satiricpi, Jehova imasata sintirin.
Mana sirtu religiongunaga ashca culpatami charinaun. Chasna rasha, Dios llaquishca shina, shuc runagunata mana llaquinaunzhu. Caiga, casna ashcata quiringuichu. Imahuata chasna ningui.
Mana sirtu religionguna, Dios llaquishca shina, shuccunata mana llaquinaun.
6. Diosca runagunata mana sirtu religiongunamanda lugaryachinata munan
Apocalipsis 18:4taa leichi, huasha cai tapuimanda cuintanacuichi:
Jehovaga mana ali religiongunamanda umashca runagunata quishpichinata munan. Caita yachashaga, imashinata sintiringui.
7. Sirtu Diosmanda yachasha cati
Mana sirtu religionguna mana alita rashcamanda, canga Diosta culpana changui. Yaya cunashcata mana uyac churibi yuyai. Pai huasimanda risha, mana ali causaita charicpi, paiba yayaga mana gustanzhu. Cai mana ali churi, irus causaita charishcamanda, paiba yayata culpana chanchi.
Religionguna mana alita rashcamanda, Jehovata culpanguimachu. Paimanda yachanata saquinguimachu.
MAICANGUNAGA CASNAMI NINAUN: “Religionguna mana alita rashcamanda Diosta mana ricsinata munanichu”.
Canga, chasna yuyanguichu.
Mana sirtu religionguna mana alita rashcamanda, imahuata Diosta mana culpana angui.
IMATA YACHASHCANGUI
Mana sirtu religiongunaga paiguna mana alita yachachishcamanda, irus rashcamanda, Diosta pingachinaun. Chiraicumi, Jehovaga paigunata tucuchingaraun.
Yachashcata cuintai
Mana sirtu religionguna mana alita rasha yachachishcamanda, canga imatata yuyangui.
Jehovaga mana ali religiongunamanda imatata yuyan.
Jehovaga mana sirtu religiongunata imatata ranga.
CANLLATA MASTA YACHAI
Ashca religiongunaga Jehovata piñachinaun. Caimanda masta yachai.
“Tucui religiongunachu Diosma caillayachitucunchi” (jw.org internet pistuibi)
Imahuata Jehova shuc muntunbi tandarisha paita adorachun munan.
“Shuc religion parti tucuna minishtishca chan” (jw.org internet pistuibi)
Shuc pagri paiba religion mana sirtu ashcata musiarira. Chasna acpihuas, paiga Diosmanda sirtuta yachasha catira.
“Shuc pagri paiba iglesiata saquira” (¡Despertad!, febrero de 2015)
Religiongunaga ashca timputa Diosmanda llullashcauna. Chasnallata, Diosca mana llaquic, turmintachic man nisha yachachishcauna. Paiguna imashina llullashcata yachai.
“Diosmanda llullasha rimashcaguna” (La Atalaya, 1 de noviembre de 2013)