YACHANA PARTI 34
Imata rashata Jehovata llaquishcata ricuchinchi
Bibliata estudiangahua callarishcamanda, canga Diospa mayanbi sintiringuichu. Jehovahuan mas ali amigo tucunata munanguichu. Chasna acpiga, caita yuyari, can Jehovata llaquishcata ricuchicpiga, paibas canda mas llaquishami cuiraitucungui. Canga imata rashata Jehovata llaquishcata ricuchina ushangui.
1. Imata rashata Jehovata llaquishcata ricuchinchi
Jehovata casushaga paita llaquishcatami ricuchinchi (1 Juan 5:3ta leipai). Jehovaga mana pitahuas paita casuchun mandanzhu. Randi, Jehovaga “shungumanda” paita casuchun munan (Romanos 6:17). Jehovaga, paita llaquisha, can amu munasha casuchun munan. Cai libromanda quimsa y chuscu partibiga, imasa Jehovata llaquishcata ricuchina ushashcata yachangui. Pai imata gustashcata, imata mana gustashcata yachangui.
2. Jehovata llaquishcata ricuchinaga imasaibi imangahuata sinzhi an
“Alita rac runahua turmintugunaga ashca manaun” (Salmo 34:19). Huingunami ñucanchi uchamanda pandarisha ashcata llaquirinchi. Chasnallata, cullqui mana tiacpi, runaguna mana alita racpi, shuc cuintuguna tiacpihuas turmintarinchi. Sinzhi turmintugunata pasaushaga, Jehova munashcata pactachingahua ñucanchiraicu sinzhi man. Chasna tucucpi, paita manachari casunata ushanchimachu. Ima turmintuguna shamucpihuas, Jehova munashcata pactachishaga, paita tucui corazonhuan llaquishcata ricuchiungui. Chasnallata, can Jehova Diosta mana saquicpiga, paibas canda mana ima uraspas saquitucunguichu (Salmo 4:3ta leipai).
CAIMANDA MASTA YACHAI
Jehovata casuna imahua balishca ashcata ricushun. Chasnallata, paita mana ima uraspas saquingahua, ima yanapana ushashcata yachashun.
3. Supaiga canda, huin runagunatahuas culpayachishca
Job libro cuintashca shina, Supaiga Jobta caudsayachira. Chasna acpihuas, mana Jobtallachu culpara. Astahuanbas, tucui Jehovata sirvina munac runagunatami culpara. Job 1:1 y 1:6-2:10ta leichi, huasha cai tapuigunamanda cuintanacuichi:
Satanas nishca shina, Jobca imahuata Jehovata casuc ara (Job 1:9-11ta ricuichi).
Satanasca tucui runagunata, candahuas, imamandata culpaitucunchi (Job 2:4ta ricuichi).
Job 27:5 ultimo partita leichi, huasha cai tapuimanda cuintanacuichi:
Jobca imasa rashata Jehovata sirtu llaquishcata ricuchira.
Jobca, Jehovata mana saquisha, paita llaquishcatami ricuchira.
Ñucanchihuas, Jehovata mana saquishaga, paita llaquishcatami ricuchinchi.
4. Jehovata cushiyachi
Proverbios 27:11ta leichi, huasha cai tapuimanda cuintanacuichi:
Can Jehovata casusha alita racpi, paiga imasashi sintiringa. Imahua.
5. Jehovata mana saquisha casunata ushangui
Jehovata llaquinami, shuc runagunata paimanda yachachingahua yanapaitucunchi. Paita mana saquisha casunaga, sinzhi acpihuas, paimanda rimasha catingahua yanapaitucunchi. VIDEOTA ricuichi, huasha cai tapuigunamanda cuintanacuichi:
Shuc runagunata Jehovamanda yachachinata manzhanguichu.
Videoibi ricushca shina, cai huauquita Jehovamanda mana manzhasha cuintangahua imata yanapara.
Jehova llaquishcata ñucanchi llaquisha, pai millashcata ñucanchi millashaga, Jehovata sirvisha catingahua mana sinzhi chan. Romanos 12:9ta leichi, huasha cai tapuigunamanda cuintanacuichi:
Cunangama can Bibliaibi yachashca shina, Jehovaga ima ranagunallatata munan. Chasnallata, Jehovaga ima ranagunallatata millan.
Mana ali ranagunata millasha, ali ranagunallata catingahuaca imatata rana angui.
6. Jehovata casunaga ñucanchita yanapaitucunchi
Jehovata casunaga yapa ali man. Isaias 48: 17, 18ta leichi, huasha cai tapuigunamanda cuintanacuichi:
Jehovaga can cushi causangahua, imata rana ashcata yachanzhu. Imahuata casna yuyangui.
Cunangama Bibliata estudiasha, sirtu Dios Jehovata ricsinaga, imasata camba causaibi yanapaitucushcangui.
MAICANGUNAGA CASNAMI TAPUNAUN: “Ñuca rashcagunahuan Diosta cushiyachina ushanichu”.
Bibliamanda ima textohuanda, ñucanchi rashcagunahuan Jehovata cushiyachina ushashcata yachachinguima.
IMATA YACHASHCANGUI
Sinzhi acpihuas, Jehovata casusha, paita mana saquishaga, paita llaquishcatami ricuchingui.
Yachashcata cuintai
Job rashcaga imatata yachachitucungui.
Canga imashinata Jehovata llaquishcata ricuchingui.
Jehovata mana saquisha sirvingahua, imata yanapaitucungui.
CANLLATA MASTA YACHAI
Jehovata, congregacionda mana saquingahua, imata rana ashcata yachai.
“Canda mana saquic runataga, canbas paita mana saquinguichu” (16:49)
Satanas, runagunata culpayachishcamanda masta yachai.
“Jobca Diosta mana saquirachu” (La Biblia y su mensaje, sección 6)
Huahuagunahuas Jehovata llaquina ushashcata ricui.
Maltagunaga shuccuna mana alita rai nicpi, imasata Diosta mana saquinata ushanaun.