Jesús huañushcamantaca ¿imacunatashi chasquishun?

Ñucanchic unai unaicaman causachun munashpami Jesusca huañurca (Juan 3:16)

Jesús huañushcamanta quimsa punzha tucucpimi, maijan huarmicunaca Jesusta enterrashca pushtupi ricungapac rircacuna. Chaiman chayashpaca Jesusta mana tarircacunachu. Jehová Diosmi Jesustaca causachirca.

Quipa punzhacunami paihuan alli apanacuc apostolcunahuan tuparca.

Paica aichayuc cuerpohuanca mana causarircachu, Jesustaca angelman ricchatami Diosca causachirca. Paipac apostolcunallami Jesús cieloman rictaca ricurcacuna. Cunanca poderta charic angelmi can, manatac huañungachu.

Diosca Jesusta causachishpaca paipac Mandanapi mandachunmi churashca (Daniel 7:13, 14)

Gentecunata juchamanta, huañuimanta quishpichingapacmi Jesusca paipac causaita curca (Mateo 20:28). Jesús huañushcamantami Diosca unai unaicaman causaita cusha nin.

Jehová Diosmi Jesusta cai allpata mandachun acllarca. Jesusca mana paillachu mandanga. Dios causachishca alli cazuc 144.000 gentecunahuanmi jahua cielomanta mandanga. Diospac Mandanami tucui allita ruhuashpa mandanga (Revelación [Apocalipsis] 14:1-3).

Diospac Mandanami cai allpataca shuc sumac allpata ruhuanga. Chaipica macanacuipish shuhuaccunapish, huacchacunapish, yarcaipish ña mana tiyangachu. Cai allpapi causac gentecunaca cushicushpami causanga (Salmo 145:16).