Bibliapi tiyac noticiacunataca ¿pitac quillcachishca?

1. Bibliataca ¿pitac quillcachishca?

Bibliapica gentecuna cai allpapi unaita causanatami huillan (Salmo 37:29). Bibliaca 66 librocunatami charin. Tucui chaicunataca Dios acllashca 40 runacunami quillcashca. Punta 5 librocunataca Jesús huacharina 1513 huatacuna faltacpiracmi Moisesca quillcai callarishca, cutin Apocalipsis librotaca apóstol Juanmi Jesús huacharishca quipa huata 98-pi quillcashpa tucuchishca. Tucui chai yuyaicunaca Dios cushca yuyaicunami can. Bibliata quillcaccunamanca espíritu santomi ayudashca (2 Samuel 23:2). Paicunaca Diospac yuyaitami quillcashcacuna, mana paicunapac yuyaichu carca. Chaimanta Bibliaca Diospac yuyaimi can. 2 Timoteo 3:16; 2 Pedro 1:20, 21-ta liyi.

Cai videota ricui Bibliataca ¿pitac quillcachirca?

2. ¿Imamantatac Bibliaca mana llullac can?

Bibliaca Dios quillcachishcami can. Bibliapi quipa punzhacunapi ima tucunata huillashcaca pactantacmi. Chairicumi mana shuc runapac yuyailla cashcata yachanchic (Josué 23:14). Diosca Tucuita Pudic cashcamantami chaitaca ruhuan. Isaías 42:9; 46:10-ta liyi.

Bibliaca Dios quillcachishca cashcamantami, tucuimanta yalli alli cashcata yachanchic. Bibliaca achca shuclaya shuclaya rimaicunapimi quillcashca can. Bibliaca utcamanta pachami allpa imalaya cashcataca ña huillarca. Chaipac jahuapica, 40 runacuna Bibliata quillcashpapish tucuicunami chai yuyaillatatac quillcashcacuna.a Bibliaca Dios cuyac cashcata, shinallatac cunan punzhacunapi gentecunapac yuyaita allichina cashcatapish ricuchinmi. Chaimantami achca gentecunaca, Bibliaca Dios Rimashca Shimi cashcata entendincuna. 1 Tesalonicenses 2:13-ta liyi.

Cai videota ricui Biblia ciertotac nic cashcataca ¿imamantatac confiai pudinchic?

3. Bibliaca ¿ima jahuatac huillan?

Bibliaca shuc alli yuyaitami charin. Quipa punzhacunapi gentecuna cutin paraíso allpapi cushilla causanamantami huillan. Shinallatac, callaripi Adán y Eva ima shina mana huañushpa causanata perdishcamantami parlan. Cai allpata cutin allichinatapish parlanmi. Apocalipsis 21:4, 5-ta liyi.

Bibliaca mandashcacunatapish, sumac consejocunatapish charinmi. Chaicunata cazushpami sumacta causashun. Shinallatac Jehová Dios gentecunata cuyashcatapishmi huillan. Chaimi ricuchin pai imalaya cashcata. Bibliaca chaita yachachunmi ayudan. Chaipac jahuapica ima shina Diospac amigo canatapishmi yachachin. Salmo 19:7, 11; Santiago 2:23, 4:8-ta liyi.

4. Bibliata entendichunca ¿imatac ayudanga?

Bibliata alli entendichingapacmi Jesusca versocunata utilizashpa alli entendichirca. Cai revistaca chai yuyaihuan ruhuashca cashpami, Bibliapi nishcacunata alli entendichun ayudanga. Lucas 24:27, 45-ta liyi.

Bibliapi tiyac noticiacunamanta yachacunataca achcatami munangui. Maijan gentecunaca Bibliamanta mana yachacunata munangachu, maijancunacarin juriangacunami. Shina cacpipish, paicuna jarcachunca ama saquinguichu. Bibliapi nishca shinaca, Diosmanta yachacushpallami unai unaicaman causashun. Juan 17:3, QCA, 1996-ta liyi.