Diosca ¿pitac can?

1. Diostaca ¿imamantatac servina canchic?

Jehová Diosmi tucuita creashca. Paica ña tiyashcallatacmi, tiyashpa catingallatacmi (Salmo 90:2). Bibliapi tiyashca noticiacunataca paimi huillashca (1 Timoteo 1:11). Pai causaita cushcamantami paillata servishpa causana canchic. Apocalipsis 4:11-ta liyi.

2. Diosca ¿imalayatac can?

Diostaca ni pipish mana ricushcachu. Paica shuc espiritumi can. Ñucanchicca aichayuc tulluyucmi canchic. Paica ñucanchicta yallimi can (Juan 1:18; 4:24). Pai ruhuashcacunata ricushpami, pai ima shina cashcataca yachai pudinchic. Por ejemplo, tucuilaya micunacunata ricushpa, tucuilaya sisacunata ricushpami paica cuyac, alli yachac cashcata yachanchic. Tucui chai maravillacunata ricushpami achca poderyuc cashcata yachanchic. Romanos 1:20-ta liyi.

Bibliata liyishpami Diosta ricsi pudinchic. Chaipimi ricunchic gentecunata ima shina tratashcata, paiman ima gushtashcata, ima mana gushtashcata, ima alli, ima mana alli cashcata, pai imata ruhuac cashcatapish. Salmo 103:7-10-ta liyi.

3. ¿Diosca shutita charinchu?

Jesusca nircami: “Jahua pacha ñucanchic Taitalla, cambac shutitaca, tucuilla alli nishca cachun” (Mateo 6:9). Taita Dios, Mandac Dios nishpa churashca cacpipish, paica shuc shutitami charin. Maijancunaca Yavé nincunami. Castillapica Jehová nincunami. Quichuapipish Jehová ninchicmi. Shuctac rimaicunapica Diospac shutitaca shuclayatami nincuna. Bibliapica: “Cambac shuti Jehová cashcataca tucui gentecuna yachachun. Canllami cai pachapica tucuimanta yalli cangui” ninmi (Salmo 83:18, NM).

Shuc Bibliacunapica Mandac Dios, Taita Dios nishpami churashcacuna. Shinapish punta quillcashcacunapica Diospac shutica cazi 7.000 cutinmi ricurin. Jesús gentecunaman yachachicushpaca Diospac shutimantaca cutin cutinmi parlarca. Juan 17:26-ta liyi.

Cai videota ricui ¿Diosca shutita charinchu?

4. ¿Diosca ñucanchictaca cuyanchu?

Si Jehová ñucanchicta cuyashpaca ¿imamantatac imamundo llaquicuna tiyachun saquishca? Maijancunaca ninmi Diosmi chashna destinashca nishpa. Chaica mana ciertochu can. Santiago 1:13-ta liyi.

Ñucanchic causaipica ñucanchicllatac allita o mana allita acllachunmi Jehová Diosca saquishca. Chairicumi, paita servinata acllana canchic (Josué 24:15). Shinapish maijancunaca mana allita ruhuanatami acllashcacuna. Chaimantami tucuilaya llaquicuna tiyan. Chai llaquicunata ricushpami, Jehová Diosca jin llaquirin. Génesis 6:5, 6-ta liyi.

Jehová Dios ñucanchicta cuyashcamantaca cushilla causachunmi munan. Chairicumi tucuilaya llaquicunata ñalla tucuchinga. Paimi yachan imamanta llaquicuna tiyachun saquishcata. Cai jahuaca lección 8-pimi ashtahuan yachacushun. 2 Pedro 2:9; 3:7, 13-ta liyi.

5. Diosmanca ¿ima shinatac cuchuyai pudinchic?

Diosta mañashpami paiman cuchuyai pudinchic. Paica cada shucmantami preocuparin (Salmo 65:2; 145:18). Chaimantami paita cazungapac esforzaricpica ima mana allicunamanta perdonashpa bendiciangapac shuyacun. Shinaca juchayuccuna cashpapish paipac amigo cai pudinchicmi. Salmo 103:12-14; Santiago 4:8-ta liyi.

Paimi causaitaca cushca, chairicumi paillata servishpa causana canchic (Marcos 12:30). Pai mandashcacunata pactachishpa, paimanta yachacushpami cuyashcata ricuchinchic. Chaita ruhuashpami paimanca ashtahuan cuchuyanchic. 1 Timoteo 2:4; 1 Juan 5:3-ta liyi.