¿Ima shinatac Diosman mañana canchic?

1. Diosca ¿tucui mañashcacunatachu uyan?

Diosca tucuilaya gentecunatami paiman mañashpa cuchuyachun munan (Salmo 65:2). Chaica mana nisha ninchu tucui mañashcacunata Dios uyaclla cashcata. Bibliaca ninmi shuc cusa paipac huarmita maipish cachun tratashpa Diosman mañacpica, mana uyanchu nishpa (1 Pedro 3:7). Israelcuna cutin cutin mana allita ruhuacpica, Diosca paicuna mañashcataca mana uyacchu carca. Jatun juchata ruhuashpapish, tucui shunguhuan arrepentirishpa paiman mañacpica Diosca uyanmi. Isaías 1:15; 55:7-ta liyi.

Cai videota ricui Diosca ¿tucui mañashcacunatachu uyan?

2. ¿Imalayatac Diosman mañana canchic?

Diosman mañanaca Diosta servina shinallatacmi can. Chaimantami Jehová Diosllata mañana canchic (Mateo 4:10; 6:9). Jesusca ñucanchic juchamantami huañurca, chairicumi ñucanchic imata mañashpaca paipac shutipi Diosman mañana canchic (Juan 14:6). Jehová Diosca quillcashcata catishpa o chaillatatac cutin cutin repitishpa mañachunca mana munanchu, chaipac randica shungumanta mañachunmi munan. Mateo 6:7; Filipenses 4:6, 7-ta liyi.

Jehová Diosca shungu ucullapi mañashcatapish uyanmi (1 Samuel 1:12, 13). Chaimantami tutamanta lado, chishi lado, micungapac, ungushca cashpa o ima llaquicunahuan cashpapish mañachunlla nin. Salmo 55:22; Mateo 15:36-ta liyi.

3. Tandanacuicunaca ¿ima shinatac ñucanchictaca ayudan?

Diosta mana cric gentecunapac chaupipimi causanchic, paicunaca quipa punzhacunapi alli causai tiyanataca mana crishpami burlarincuna. Chaicunami ñucanchictaca Diosmanta caruyachina pudin (2 Timoteo 3:1, 4; 2 Pedro 3:3, 13). Chairicumi caishucmanta chaishucmanta animaringapac huauqui panicunahuan tandanacunata nesitanchic. Paicunapish animachunmi nesitan. Hebreos 10:24, 25-ta liyi.

Diosta cuyac gentecunahuan tandanacushpaca ashtahuanmi Diosta cuyashun. Jehová Diosmanta Huillaccunapac tandanacuicunapimi shuccunapac alli ejemplocunata ricushpa animari pudinchic. Romanos 1:11, 12-ta liyi.

4. ¿Ima shinatac Diosta cuyana pudinchic?

Bibliapi yachacushcata yuyarishpami Diostaca cuyana pudinchic. Pai ruhuashcacunapi, paipac consejocunapi, quipa punzhacunapi imata cusha nishcapi yuyashpami, Diosca jin cuyac cashcata yachashun. Josué 1:8; Salmo 1:1-3-ta liyi.

Diospi tucui shunguhuan crishpallami paita cuyangui. Crinaca shuc plantita shinami can. Chai plantita alli huiñachunca, parcuna, jallmanami nesitarin. Shinallatac Diospi crishcata sinchiyachingapacca paimanta ima yachacushcacunapi yuyashpa catinami nesitarin. Mateo 4:4; Hebreos 11:1, 6-ta liyi.

5. Diosta cuyashpaca ¿ima allicunatatac chasquishun?

Jehová Diosca paita cuyaccunataca cuyanmi. Chairicumi paipi crishcacunata ama chingachichun ayudan (Salmo 91:1, 2, 7-10). Ñucanchic causaipi ima llaquicunapi ama urmashpa, sumacta cushilla causachunpish yachachin. Salmo 73:27, 28; Santiago 4:4, 8-ta liyi.