Diospac mandashcacunaca ¿ima shinatac ñucanchictaca ayudan?

1. ¿Imamantatac Dios ayudachun nesitanchic?

Tucuita Ruhuac Jehová Diosca ñucanchicta yalli yachacmi can. Shinallatac ñucanchicta cuyac, ñucanchicmanta preocuparicmi can. Mana ñucanchic munashca shina causachun ruhuarcachu (Jeremías 10:23). Ima shinami huahuacunaca taita mamacuna ayudachun nesitan, shinallatacmi gentecunapish Taita Dios ayudachun nesitanchic (Isaías 48:17, 18). Bibliapi mandashcacunaca Dios cushca sumac regalomi can. 2 Timoteo 3:16-ta liyi.

Jehovapac mandashcacunaca ima shina cushilla causanamanta, shinallatac shamuc punzhacunapi para siempre causana bendicionta charingapac, imata ruhuanatapishmi yachachin. Jehová Dios ñucanchicta ruhuashcamantaca paipac mandashcacunata tucui shunguhuan cazuchunmi munan. Salmo 19:7, 11; Apocalipsis 4:11-ta liyi.

2. Diospac Shimica ¿ima shinatac ayudan?

Bibliapi maijan mandashcacunaca ima ruhuaicunapipish Jehová munashca shina causangapacmi ayudan. Cutin caishuc mandashcacunaca chai mandashcapi nishcatatac pactachingapacmi can (Deuteronomio 22:8). Maijan mandashcacunata pactachingapacca allimi yuyana canchic (Proverbios 2:10-12). Por ejemplo, Bibliaca yachachinmi causaica Dios cushca regalomi can nishpa. Chaimi trabajopi, familia ucupi, maita ricushpapish cuidadota charichun ayudan. Hechos 17:28-ta liyi.

3. ¿Maijanshi ashun valishca mandashcacunaca can?

Jesusca ishcai mandashcacunatami yachachirca. Punta mandashcapica Diosta ricsinata, cuyanata, tucui shunguhuan servinatami yachachirca. Caitami imata ruhuagricushpapish alli yuyarina canchic (Proverbios 3:6). Cai mandashcata pactachiccunaca Diospac amigo tucushpami cushicushpa para siempre causangacuna. Mateo 22:36-38-ta liyi.

Quipa mandashcaca tucuicunahuan alli apanacuchunmi ayudan (1 Corintios 13:4-7). Cai mandashcata pactachishpaca Jehová Dios shinami shuccunatapish alli tratashun. Mateo 7:12; 22:39, 40-ta liyi.

4. Diospac mandashcacunaca ¿ima shinatac ayudan?

Diospac mandashcacunami familia ucupi cuyanacushpa cushilla, juntulla causachun ayudan (Colosenses 3:12-14). Diospac Shimica cazadocunapish mana raquirishpa causachun ninmi. Shinami familiacunaca cushilla causangacuna. Génesis 2:24-ta liyi.

Bibliapi mandashcacunata cazunaca ñucanchic causanapipish, yuyanapipish ayudanmi. Por ejemplo maijan trabajopica honrados, alli trabajaccunata, Bibliapi mandashca shina causaccunatami trabajachun mashcancuna (Proverbios 10:4, 26; Hebreos 13:18). Shinallatac Bibliapica charishcacunallahuan cushilla causanata, ashtahuancarin Diospac munaita puntapi churashpa causanatami yachachin. Mateo 6:24, 25, 33; 1 Timoteo 6:8-10-ta liyi.

Diospac mandashcacunaca ñucanchic aicha cuerpopipishmi ayudan. Por ejemplo, machanamanta, ima llaqui tucunamantapishmi jarcan (Proverbios 14:30; 22:24, 25; 23:20). Jehová Diosca ashata ubiachunpish saquinmi, pero mana yallimanaca (Salmo 104:15; 1 Corintios 6:10). Bibliapi mandashcacunata cazunaca ñucanchic yuyaitapish, ñucanchic imalaya cashcata cuidarichunpishmi ayudan (Salmo 119:97-100). Alli religionta caticcunaca mana ñucanchiclla alli canata yuyanchicchu, ashtahuancarin Jehová Diosta jatunyachinatami munanchic. Mateo 5:14-16-ta liyi.