LECCIÓN 10

Maijan religión alli cashcataca ¿ima shinatac yachai pudinchic?

1. Alli religionca ¿shucllachu tiyan?

Jesús yachachicun — “Llulla huillaccunamanta cuidaringuichic.” (MATEO 7:15)

Jesús paipac apostolcunahuanca alli religiontami catircacuna. Chai alli religiontami mana huañushpa causanaman apac ñan nirca. Shinallatac ashacunallami chaitaca rin nircami (Mateo 7:14). Bibliapi yachachishca shina adoraccunallatami Taita Diosca chasquin. Chashna adoraccunaca Bibliapi nishcatami shuc yuyailla crincuna. Juan 4:23, 24, NM; 14:6; Efesios 4:4, 5-ta liyi.

Cai videota ricui ¿Diosca tucui religioncunatachu chasquin?

2. Panda yachachiccunamantaca Jesusca ¿imatatac nirca?

Shuc cura iglesiapi parlacun. Quipaca soldadocuna macanacuiman richun bendiciacun. — “‘Diosta ricsinchicmi’ nishpapish, imatapish ruhuashpaca Diosta mana ricsic cashcatami ricuchincuna.” (TITO 1:16)

Jesusca panda yachachiccunaca tiyangallatacmi, paicunami Diosta alli serviccunata pandachinga nircami. Chai gentecunaca Jesusta alli caticcunami canchic nincunami. Chashna nishpami gentecunataca pandachin. Shina cacpipish alli religionta caticcunataca ricsinallami can. Paicuna allita ruhuacta ricushpami ciertotac Jesusta caticcuna cashcata yachanchic. Mateo 7:13-23-ta liyi.

3. ¿Maijancunatac alli religionta catincuna?

Cai jahuaca 5 yuyaicunata ricushun:

Bibliataca Dios Rimashca Shimi nishpami respetancuna. Gentecunapac yachachishcacunata catinapac randica, Biblia nishcata cazungapacmi esforzarincuna (Mateo 15:7-9). Chaipac jahuapica, paicuna huillashcataca alli ruhuashcacunahuanmi ricuchincuna. Juan 17:17, QCA, 1996; 2 Timoteo 3:16, 17-ta liyi.
Jehová Diospac shutita huillashpami jatunyachincuna. Jesusca paipac Taitapac shutita gentecunaman huillashpami jatunyachirca. Chaipac jahuapica Diospac shutica alli nishca cachun nishpa mañanatami yachachirca (Mateo 6:9). Cambac comunidadpica ¿maijan religiontac Diospac shutimanta huillan? Deuteronomio 32:3-ta liyi.
Diospac Mandanamantami huillancuna. Jesustaca Diospac Mandanamanta alli huillaita huillachunmi Jehová Diosca cacharca. Chai huillaimi gentecunamanca shuc esperanzata cun. Chaitami Jesusca huañungacaman huillashpa catirca (Lucas 4:43; 8:1; 23:42, 43). Shinallatac paita caticcunamanca chai Mandana jahua huillachunmi mandarca. Shinaca cambac huasiman chayashpa, Diospac Mandanamanta huillaccunaca ¿maijan religionmantashi canga? Mateo 24:14-ta liyi.
Cai millai mundopac ruhuaicunapica mana chapurincunachu. Jesusta caticcunaca macanacuipi, parocunapi, politicacunapipish mana chapurincunachu (Juan 17:16; 18:36). Cai mundopac mana alli yuyaicunatapish, ruhuaicunatapish mana catincunachu. Santiago 4:4-ta liyi.
Cuyaitami ricuchincuna. Dios Rimashcapica maimanta shamuc, imalaya gente cacpipish respetana cashcatami yachachin. Panda religionta caticcunaca guerracunatapish apoyancunami. Alli religionta caticcunaca mana chaita ruhuancunachu (Miqueas 4:1-3). Chaipac randica huillangapac, shuccunata yanga ayudangapac, animangapacmi tiempota llucchincuna. Juan 13:34, 35; 1 Juan 4:20-ta liyi.

4. ¿Maijan religión alli cashcataca ñachu cuenta apashcangui?

¿Maijan religiontac Biblia nishcata pactachishpa, Diospac shutita jatunyachishpa, Diospac Mandanamanta huillashpa gentecunaman esperanzata cun? ¿Maijan religiontac paicunapura cuyanacushpa, cai millai mundopac ruhuaicunapi mana chapurin? Quiquinca ¿imatatac ninguiman? 1 Juan 3:10-12-ta liyi.

Cai jahua ashtahuan yachacusha nishpaca ¿Qué nos enseña la Biblia? nishca libropi capítulo 15-ta ricui.