Religioncuna ¿ima tucunatatac Bibliaca huillan?

1. ¿Tucui religioncunachu alli can?

Tucui religioncunapimi mana llullac, humilde gentecunaca tiyan. Paicunamanca shuc alli noticiami tiyan. Tucui chai gentecunamantaca Diosca llaquicunmi. Shina cacpipish chai religioncunapac shutipica achca mana alli ruhuaicunami tiyashca. Chaica llaquimi can (2 Corintios 4:3, 4; 11:13-15). Noticiacunapica religioncunaca terroristacunahuan chapurishpa imamundo gentecunata huañuchishcata, guerracunata apoyashcata, huahuacunata violashcatami uyashcanchic. ¡Chai ruhuaicunami alli shungu gentecunamanca jin llaqui cashca! Mateo 24:3-5, 11, 12-ta liyi.

Alli religionca Jehová Diospac shutitami jatunyachin. Cutin panda religioncunaca Diosmantapish huañushcacunamantapish llullata yachachishpami Diosta piñachincuna. Shina cacpipish Jehová Diosca gentecuna paimanta alli yachachunmi munan. Eclesiastés 9:5, 10; 1 Timoteo 2:3-5-ta liyi.

2. Bibliapica religioncuna ¿ima tucunatatac huillan?

Panda religioncunapi caccuna, Diosta cuyanchicmi nicpipish Diosca chaitaca mana crinchu. Paicunaca Diablopac munaitami ruhuacuncuna (Santiago 4:4). Bibliapica tucui chai panda religioncunataca “Jatun Babilonia” nishpami shutichin. Chai shutica ñaupa Babilonia jatun pueblomantami llucshirca. Chaipimi panda religioncunaca tiyai callarirca. Shinapish Diosca ñallami chai panda religioncunataca das tucuchinga. Apocalipsis 17:1, 2, 5, 16, 17; 18:8-ta liyi.

Shinapish Jehová Diosca chai panda religioncunapi cac alli shungu gentecunataca Bibliamanta yachachishpami tandachishpa caticun. Miqueas 4:2, 5-ta liyi.

3. Alli shungu gentecunaca ¿imatatac ruhuana can?

Jehová Diosca Bibliata yachashpa allita ruhuanata munac gentecunataca llaquinmi. Chairicumi chai panda religioncunamanta llucshichun munan. Ciertotac Jehová Diosta cuyashpaca paicunapac causaita cambiashpami paita cushichinga. Apocalipsis 18:4-ta liyi.

Utca tiempopica apostolcuna Dios jahua huillacpica achca alli shungu gentecunaca cushicushpami chasquircacuna. Jehová Diosca paicunaman esperanzata cushpami mushuc causaita charichun yachachirca. Ñucanchicpish paicuna shinallatacmi Jehová Dios jahua yachacushpaca paita puntapi churana canchic. 1 Tesalonicenses 1:8, 9; 2:13-ta liyi.

Panda religionmanta llucshiccunataca Jehová Diosca cushicushpami chasquinga. Tucui paicunami cuyanacushpa, shuc familia shina para siempre causanata yuyaipi charincuna. ¿Canpish chai bendicionta charinata munanguimanchu? Marcos 10:29, 30; 2 Corintios 6:17, 18-ta liyi.

4. Cushilla causai tiyachunca Diosca ¿imatashi ruhuanga?

Jehová Diosca panda religioncunata tucuchishpami cai allpapica alli causaita cunga. Chaipica raquirinacuipish, pandachinacuipish ña mana tiyangachu. Tucui gentecunami Jehová Diosllatac jatunyachishpa causangacuna. Chaica ¿manchu shuc alli noticia can? Apocalipsis 18:20, 21; 21:3, 4-ta liyi.