Diosta serviccunaca ¿imamantatac organizados cana can?

1. Israel llactataca ¿imapactac Diosca organizados cachun acllarca?

Diosca Abrahampac huahua huahuacunataca shuc alli organizados llacta cachunmi mandashcacunata curca. Paicunatami israelcuna nishpa shutichirca. Paicunami Diosta alli servishpa shuccunamanpish yachachina carca (Salmo 147:19, 20). Paicunamantami tucui lado gentecunaca Diosta servinata yachacui pudircacuna. Génesis 22:18-ta liyi.

Israelcunatami Diosca paimanta huillaccuna cachun acllarca. Israelcunamantami Diospac mandashcacunata cazunaca alli cashcata yachacunchic (Deuteronomio 4:6). Paicunamantami shuccunapish Jehová Diosta alli ricsina oportunidadta charircacuna. Isaías 43:10, 12-ta liyi.

2. Diosta alli serviccunaca ¿imapactac organizados cana can?

Israelcuna Jehová Diosta mana cazushcamantami Diosca Jesusta alli caticcunata paipac llacta cachun acllarca (Mateo 21:43; 23:37, 38). Chairicumi cunan punzhacunapica israelcunapac randica, Jehová Diosmanta Huillaccunata paipac llacta cachun acllashca. Hechos 15:14, 17-ta liyi.

Jesusmi paita caticcunataca tucui muyundi allpapi alli huillaita huillachun alli organizashca (Mateo 10:7, 11; 24:14; 28:19, 20). Cai tucuri punzhacunapica cai alli huillaica imamundotami mirarishpa caticun. Shinallatac tucui muyundi llactacunamantami paita alli serviccuna cachun Jehová Diosca acllashpa caticun (Apocalipsis 7:9, 10). Diosta alli serviccunaca organizados cashcamantami paicunapura caishuc chaishuc animarinacushpa caticushcacuna. Shinallatac tucui muyundi allpapimi chai mismo yuyaillatatac Jehová Diosmantaca yachacuncuna. Hebreos 10:24, 25-ta liyi.

3. Cunan punzhacunapica ¿ima shinatac Jehová Diosmanta Huillaccunaca tiyai callarirca?

Cai organizacionca 1870 huatapimi tiyai callarirca. Chai ashalla Bibliata yachacuccunami tauca tiempota Bibliamanta pacashca yuyaicunata yachac chayarcacuna. Jesusca paita caticcuna alli huillaicunata huillachun organizashcatami entendircacuna. Chaimantami Diospac Mandana jahua alli huillaitaca tucui muyundi allpapi huillai callarircacuna. 1931 huatapimi Jehová Diosmanta Huillaccuna nishpa shutirircacuna. Hechos 1:8; 2:1, 4, 11; 5:42-ta liyi.

4. Jehová Diosmanta Huillaccunaca ¿ima shinatac organizados can?

Utca tiempopica Jesusta caticcunataca shuc cuerpo gobernantemi pushac carca. Paicunataca Jesusmi Uma shina pushacurca (Hechos 16:4, 5). Chai shinallatacmi cunan punzhacunapipish Jehová Diosmanta Huillaccunataca Cuerpo Gobernante pushacun. Paicunatapish Jesusllatacmi Uma shina pushacun. Cuerpo Gobernantepi cac huauquicunaca alli experienciata charishcamantami muyundi allpapi tiyac sucursalcunata pushan. Chai sucursalcunamantami 800 yalli rimaicunapi publicacioncunata llucchishpa tucui ladoman cachan. Paicunaca Bibliata utilizashpami 120.000 yalli congregacioncunaman animota cun. Congregacioncunapipish experienciata charic huauquicunami cuyaihuan Diosta serviccunata pushan. 1 Pedro 5:2, 3-ta liyi.

Jehová Diosmanta Huillaccunaca Diospac Mandanamanta alli noticiacunata huillangapac, Bibliamanta yachacuccunata yachachingapacca alli organizadosmi cancuna. Apostolcuna shinallatacmi huasin huasin huillancuna (Hechos 20:20). Yachacunata munaccunamanpish Bibliamanta yachachincunami. Paicunaca mana caishuc organizacioncunalayachu can. Shuc familia cuentami cuyanacushpa Jehová Dios cuidachun saquincuna (2 Tesalonicenses 1:3). Shuc alli organización cashcamantami shuccunata ayudangapac, Diosta cushichingapac esforzarincuna. Chairicumi muyundi allpapi shuc familia shina cashcamanta jin cushilla causancuna. Salmo 33:12; Hechos 20:35-ta liyi.