Jesusca ¿pitac can?

1. Jesusca ¿ima shinatac tiyai callarirca?

Jesusca mana gentecuna shinachu carca. Manarac cai allpaman shamushpaca jahua cielopimi ña causarca. Paica shuc espiritumi carca (Juan 8:23). Diosca paitaracmi crearca. Chaimantami Bibliapica “Diospac shuclla Churi” nin. Paimi paipac Taitataca tucuita ruhuanata ayudarca (Juan 1:14). Shinallatac Taita Diospac randi huillacmi can. Chaimantami paitaca “Rimashca Shimi” nin. Proverbios 8:22, 23, 30; Colosenses 1:15, 16-ta liyi.

2. Jesusca ¿imapactac cai allpaman shamurca?

Diosmi Jesustaca cai allpaman cacharca. Chaipacca Jesuspac causaitaca María shuti solterapac huicsapimi churarca. Shinaca Jesusca mana ñucanchic shina shuc aichayuc taitataca charircachu (Lucas 1:30-35). Jesusca cai allpamanca quimsa yuyaicunahuanmi shamurca: 1) paipac Taita jahua yachachingapac, 2) ima llaquicuna ricuricpipish paipac ejemplohuan Diospac munaita ima shina pactachinata yachachingapac, 3) paipac causaita cushpa ñucanchicta salvangapacmi shamurca. Mateo 20:28-ta liyi.

3. ¿Imamantatac shuc salvacta nesitanchic?

Maijan ratoca shuc runata ama huañuchichunmi mashna cullquitapish pagashpa salvana tucun (Éxodo 21:29, 30). Diosca gentecuna mayoryachun, huañuchunpish mana munarcachu. Chaitaca ¿imamantatac yachanchic? Adantaca ‘mana cazushpaca huañunguitacmi’ nishpami Diosca advertirca. Cazushpaca mana nunca huañunmanchu carca (Génesis 2:16, 17; 5:5). Bibliapica ninmi huañuica Adanmantami cai allpapi tiyai callarirca nishpa. Shinaca Adanpac huahuacuna cashcamantami juchayuccuna canchic, huañunchicpish. Chaimantami tucuicuna shuc salvacta nesitanchic. Romanos 5:12; 6:23-ta liyi.

Shinaca huañuimantaca ¿pitac salvai pudirca? Huañushpami ñucanchic juchacunamantaca paganchic. Juchayuccuna cashcamantaca shuccunapac juchacunataca mana salvai valinchicchu. Salmo 49:7-9-ta liyi.

4. ¿Imapactac Jesusca huañurca?

Jesusca mana ñucanchic shina juchayucchu carca. Jesusca mana paipac juchamantachu huañurca. Ñucanchic juchacunamanta salvangapacmi huañurca. Diosca cai pachapi causaccunata jin cuyashpami paipac shuclla Churita cai allpaman cacharca. Jesuspish paipac Taitata cazushcamantami shamurca. Shinami juchacunamanta, huañuimanta salvashpa ñucanchicta cuyashcata ricuchirca. Juan 3:16; Romanos 5:18, 19-ta liyi.

Cai videota ricui Jesusca ¿imamantatac huañurca?

5. Cunan punzhacunapica Jesusca ¿imatatac ruhuacun?

Jesús cai allpapi cashpaca ungushcacunata jambishpa, huañushcacunata causachishpa, llaquilla caccunata ayudashpami quipa punzhacunapi Diosta serviccunaman alli causaita cunata ricuchirca (Mateo 15:30, 31; Juan 5:28). Jesús huañucpica Diosca jahua cielopi causachunmi paitaca espiritupi causachirca (1 Pedro 3:18). Quipaca Jesusca Taita Diospac alli ladopi tiyarishpami, cai allpata mandana poderta cungacaman shuyarca (Hebreos 10:12, 13). Cunanca Jesusca jahua cielopimi ña mandacun. Paita caticcunapish chai alli noticiatami tucui llactacunapi huillacuncuna. Daniel 7:13, 14; Mateo 24:14-ta liyi.

Taita Dios mandana poderta cushcahuanmi Jesusca tucuilaya llaquicunata, millai gentecunatapish tucuchinga. Jesuspi crishpa pai mandashcata cazuccunami cai allpa paraíso tucucpica cushilla causangacuna. Salmo 37:9-11-ta liyi.