Familiaca ¿ima shinatac cushilla causai pudin?

1. Leypi mandashca shina cazaranaca ¿imamantatac importante can?

Alli noticiacunata cuc, cushilla cac Jehová Diosca familiacuna cushilla causachunmi munan (1 Timoteo 1:11, NM). Familiataca paimi callarichirca. Leypi mandashca shina Registro Civilpi cazarashpallami familiacunaca cushilla causashpa, huahuacunatapish alli huiñachi pudin. Tucui Diosta serviccunami leypi mandashcata cazushpa cazarana canchic. Lucas 2:1, 4, 5-ta liyi.

Diosca shuc cari, shuc huarmi cazarashpa unaicaman causachunmi munan. Paica cusandi huarmindi caishucmanta chaishucmanta respetanacushpa, cushilla causachunmi munan (Hebreos 13:4). Jehová Diosca divorciotaca jinmi piñan (Malaquías 2:16). Shinapish Jehová Diosca cusa cashpa o huarmi cashpa huainayacllapimi divorciarishpa cutin cazarachun saquin. Mateo 19:3-6, 9-ta liyi.

2. Cusapish huarmipish ¿ima shinatac tratana can?

Jehová Diosca shuc cari shuc huarmita ruhuashpaca, caishucmanta chaishucmanta imapipish ayudarinacuchunmi ruhuarca (Génesis 2:18). Cusami familiataca pushana can. Chaimantami paipac familia ucupi alli ricuna can, Diosmantapish yachachina can. Shinallatac paipac huarmita cuyashcamantami imapipish ayudangapac esforzarina can. Cusandi huarmindica cuyanacushpa respetanacunami can. Ishcaita juchayuccuna cashcamantami caishucmanta chaishucmanta perdonanacunataca yachacuna can. Efesios 4:31, 32; 5:22-25, 33; 1 Pedro 3:7-ta liyi.

3. Cazarashcacunaca ima llaqui tiyacpica ¿ñachu raquirina can?

Cazarashcacuna ima llaquita charishpaca ishcaimantami cuyaihuan tratangapac esforzarina can (1 Corintios 13:4, 5). Bibliapica ima ashalla llaquicuna tiyacllapi cazarashcacuna raquirichunca mana ninchu. 1 Corintios 7:10-13-ta liyi.

4. Diosca ¿imatatac huahuacunamanca munan?

Jehová Diosca huahuacuna cushilla causachunmi munan. Chaimantami joven cacpirac ima shina cushilla causanata yachachin (Colosenses 3:20). Shinallatac paipac taita mamacuna ima shina causacta ricushpa, yachacuchunmi munan. Ashtahuanpish Diosca paita, paipac Churi Jesustapish servishcamanta cushilla sintirichunmi munan. Eclesiastés 11:9–12:1; Mateo 19:13-15; 21:15, 16-ta liyi.

5. Taita mamacunaca ¿ima shinatac huahuacuna cushilla cachun ayudai pudin?

Taita mamacunaca huahuacuna ima nesitashcata cunami can (1 Timoteo 5:8). Pero mana chaillatachu ruhuana can. Taita Diosta ricsishpa pai shina cuyac cachunmi yachachina can (Efesios 6:4). Taita mamacuna Diosta cuyashpa alli serviccuna cacpica, huahuacunapish chaillatatacmi catinga. Huahuacunaman Bibliahuan yachachicpica sumac causaitami charinga. Deuteronomio 6:4-7; Proverbios 22:6-ta liyi.

Huahuacunaca ima allita ruhuashcamantami cushichichun nesitancuna. Maijan rato mana allita ruhuacpica huahuacunata ashata dalina, imamanta dalishcata entendichinapish allimi can. Chashna yachachicpimi ima jatun llaquicunapi mana urmangacuna (Proverbios 22:15). Shinapish huahuacunataca mana jin macanachu can. Colosenses 3:21-ta liyi.

Jehová Diosmanta Huillaccunaca taita mamacunaman, huahuacunamanpish Bibliamanta japishca achca publicacioncunatami llucchishca. Salmo 19:7, 11-ta liyi.