¡Te henua nehe⁠-⁠nehe ko hāhine mai ꞌā!

Te meꞌe rake⁠-⁠rake e tere ena i te hora nei, ko haka tikeꞌa ꞌā ko hāhine mai ꞌā te henua nehe⁠-⁠nehe. Te Puka o te ꞌAtua ko kī ꞌā i muꞌa ꞌā o ruŋa i te hora nei pe nei ē, he tikeꞌa tātou i te rahi o te ꞌati i ruŋa i te ao, raꞌe ki te tuꞌu mai o te henua nehe⁠-⁠nehe. ꞌI he tapa he oho atu te ꞌati ka piri mai ena, kī era i ruŋa i te vānaŋa o Iehoha.

Tauꞌa nui⁠-⁠nui. “He tamaꞌi te kaiŋa ki te rua kaiŋa, te henua ki te rua henua” (Mateo 24:⁠7). Te vānaŋa nei ko kī era ꞌā e Iehoha ꞌe ko haka tano ꞌā ki ruŋa i te hau, mai te matahiti 1914. Mai nā matahiti pē muꞌa i haꞌamata ai te tauꞌa nui⁠-⁠nui e rua i ruŋa i te ao taꞌatoꞌa, e takoꞌa rauhuru o te tahi tamaꞌi. A ruŋa ki te hoꞌe hanere piēre (100.000.000) te taŋata i mate ai.

Kau ꞌā te maiūi. He ai “te maiūi mai te kona era ki te kona era” (Lucas 21:⁠11). ¿He aŋi ꞌā te vānaŋa nei? E hoꞌi. Ka piēre te taŋata i mate i te sida, i te cancer, i te maiūi māhatu, i te mare, i te maiūi nao⁠-⁠nao tore⁠-⁠tore ꞌe rauhuru o te tahi maiūi.

ꞌŌŋe o te kai. ꞌIna he kai rahi o te nuꞌu mo kai i te ao taꞌatoꞌa. Ka piēre te nuꞌu e māmate mai ena i te maruaki paurō te matahiti. Ko kī ꞌā te Puka o te ꞌAtua: “He ꞌōŋe te kai” (Marcos 13:⁠8). ¿He aŋi ꞌā te vānaŋa nei? E hoꞌi. Takoꞌa te ꞌati nei e haꞌaki mai ꞌā pe nei ē, ko hāhine ꞌā te henua nehe⁠-⁠nehe.

Makenukenu ꞌe ŋaꞌahaꞌaha te henua. I ruŋa i a Mateo 24:⁠7 e kī era: “He ai [...] he makenukenu ꞌe he ŋaꞌahaꞌaha te henua mai te kona era ki te kona era”. Ko tikeꞌa ꞌā te meꞌe nei i ruŋa i te ao taꞌatoꞌa. A ruŋa ki te piēre e tahi te taŋata i mate i te makenukenu ꞌe ŋaꞌahaꞌaha o te henua mai te matahiti 1914.

Taŋata rake⁠-⁠rake. Te taŋata “he here ki te moni”, “he haŋa ki a rāua nō” ꞌe “he ata haŋa ki te reka taꞌe ki te ꞌAtua”. Te ŋā poki “e ko haka roŋo ki te matuꞌa” (2 Timoteo 3:⁠1-5). ¿I tikeꞌa rō koe te meꞌe tuꞌu peira? Rahi nō te taŋata peira i aŋanirā. ꞌIna he moꞌa i te ꞌAtua ꞌe takoꞌa he haꞌamata he puru⁠-⁠puru i te taŋata haŋa mo hāpī o ruŋa i a Īa.

Rave ꞌino, toke⁠-⁠toke, tiŋaꞌi taŋata. Mo noho ōꞌou mo uꞌi, ko rahi ko oho ꞌā te rave ꞌino, te toke⁠-⁠toke, te tiŋaꞌi taŋata i te ŋā matahiti hopeꞌa nei. He ata rahi te taꞌe haka roŋo ki te roŋo o te ꞌAtua ꞌe o te taŋata (Mateo 24:⁠12). Hora nei i te kona taꞌatoꞌa te taŋata ko riꞌa⁠-⁠riꞌa ꞌā o toke o rave ꞌino o tōtōꞌā i a rāua.

Taꞌatoꞌa ꞌati nei ko haka tikeꞌa mai ꞌā, nā te Haka tere o te ꞌAtua ko hāhine ꞌā. I ruŋa i te vānaŋa o te ꞌAtua ko kī era ꞌā: “Mo tikeꞌa kōrua i te ŋā meꞌe nei ko tuꞌu mai ꞌā, ka ꞌite rō ai, te haka tere o te ꞌAtua ko hāhine mai ꞌā” (Lucas 21:⁠31). ¿He aha te haka tere nei? He Haka tere o te ꞌAtua mo haꞌariro te henua he kona nehe⁠-⁠nehe e tahi. Mā Iehoha e haka tere te henua mai ruŋa i te raŋi. Te haka tere nei he haka kore te haka tere taŋata o te ao taꞌatoꞌa (Daniel 2:⁠44).