He roŋo o Iehoha o muꞌa ꞌā mo te taŋata o te hora nei

E ko haꞌatiꞌa e Iehoha i te taŋata rake⁠-⁠rake mo tōtōꞌā i te henua nehe⁠-⁠nehe. He ŋaruhoa ōꞌona nō ka noho era i ruŋa. ¿He aha te meꞌe ka piri ena ki te taŋata rake⁠-⁠rake? Mo ꞌite i te pāhono, ki uꞌi te ꞌaꞌamu o Noé. Tautini matahiti a tuꞌa, a Noé i haꞌere ai i ruŋa i te henua. A īa he taŋata riva, paurō te mahana e haka ꞌuhu era hai pūai a te ara haŋa o Iehoha. Te tahi nuꞌu o rā hora he ꞌino nō te meꞌe aŋa o rāua. Oīra a Iehoha i kī ai ki a Noé pe nei ē, he maꞌu mai e Īa i te aꞌa ꞌua mo puꞌa i te henua, mo haka kore tahi te taŋata rake⁠-⁠rake. Takoꞌa he uŋa ki a Noé mo aŋa i te ꞌavahata tuꞌu pahe pahī, mo hāpaꞌo i a īa ko tāꞌana huaꞌai i te hora era mo tuꞌu mai te aꞌa ꞌua (Génesis 6:⁠9-18).

A Noé ananake ko tāꞌana huaꞌai i aŋa te ꞌavahata tuꞌu pahe pahī. Ko haꞌaki ꞌā e Noé ki te tahi taŋata nā he tuꞌu mai te aꞌa ꞌua. ꞌIna e tahi taŋata i haka roŋo ꞌe he aŋa he oho i te meꞌe rake⁠-⁠rake. I ꞌoti era a Noé i te ꞌavahata tuꞌu pahe pahī, he haka uru ki roto rauhuru manu tere henua, he hopeꞌa he uru ko īa ko tāꞌana huaꞌai. I rā hora a Iehoha i maꞌu mai ai te ꞌua, te patiri, te ꞌuira ki ruŋa i te henua. He hoa mai te ꞌua 40 mahana ꞌe 40 pō, ꞌe he puꞌa tahi te henua e te vai (Génesis 7:⁠7-12).

He taŋata rake⁠-⁠rake i māmate tahi, ko Noé ꞌe ko tāꞌana huaꞌai i ora. A Iehoha i hāpaꞌo i a rāua i puꞌa tahi era te henua hai vai, ꞌe he maꞌu i a rāua ki te henua ꞌino kore (Génesis 7:⁠22, 23). Te Puka o te ꞌAtua e kī rō ꞌā, nā he tano te mahana he haka kore haka ꞌou a Iehoha, i te taŋata taꞌe haŋa mo aŋa i te meꞌe tītika. Te taŋata riva aŋa i te meꞌe tītika e ko haka kore, ꞌe he noho ki te hopeꞌa raꞌa i ruŋa i te henua nehe⁠-⁠nehe (2 Pedro 2:⁠5, 6, 9).

I aŋanirā rahi nō te nuꞌu e aŋa mai ena i te meꞌe rake⁠-⁠rake. Oīra te henua taꞌatoꞌa ko ī ana e te ꞌati pahe mahana era ꞌā o Noé. A Iehoha te uŋa paurō te mahana, i tōꞌona taŋata ꞌite o ruŋa i a Īa, mo haꞌaki ki te nuꞌu te rāveꞌa hopeꞌa mo rāua, nā paꞌi he tuꞌu mai tōꞌona mahana mo haka kore tahi te ꞌino, te ꞌati, mai ruŋa i te ao taꞌatoꞌa. Rahi nō te nuꞌu taꞌe haŋa mo haka roŋo i tāꞌana vānaŋa, ꞌina he haŋa mo huri te huru noho o rāua, ꞌe ꞌina he haŋa takoꞌa mo kī e te ꞌAtua, he aha te meꞌe riva ꞌe he aha te meꞌe rake⁠-⁠rake. ¿Haka tītika rō i a rāua? Rahi nō e ko aŋa peira. ¿He aha te meꞌe mo piri ki te nuꞌu nei? Nā ko hāhine mai ꞌā te mahana mo haka kore tahi te nuꞌu rake⁠-⁠rake, ꞌina e ko ora haka ꞌou (Salmo 92:⁠7).

E ko haka kore te ao, he haꞌariro i a īa pahe henua nehe⁠-⁠nehe. Mo te taŋata riro he ŋaruhoa o te ꞌAtua e noho te henua nehe⁠-⁠nehe ki te hopeꞌa raꞌa (Salmo 37:⁠29).