¿Ko ai te toꞌa o te ꞌAtua?

He Tātane te toꞌa hopeꞌa o te nui⁠-⁠nui o te ꞌAtua. A īa he merahi i pātoꞌi ki a Iehoha. Te Tātane nā e moto nō ꞌā ki te ꞌAtua. Rahi nō te ꞌati o te Tātane e aŋa mai ena ki te taŋata o te ao taꞌatoꞌa. A īa he vārua taparahi taꞌata, rake⁠-⁠rake, reo⁠-⁠reo ꞌe tiŋaꞌi taŋata (Juan 8:⁠44).

Te tahi merahi ko haka piri ꞌā ki te Tātane i tōꞌona pātoꞌi ki te ꞌAtua. Te Puka o te ꞌAtua ko nape ꞌā vārua rake⁠-⁠rake. Te ŋā vārua rake⁠-⁠rake nei he toꞌa taŋata pehe Tātane ꞌā. Tōtōꞌā i te taŋata te meꞌe haŋa o rāua (Mateo 9:⁠32, 33; 12:⁠22). Mā Iehoha e haka kore te Tātane ꞌe i tāꞌana vārua rake⁠-⁠rake ki te hopeꞌa raꞌa. ꞌIna he hora toe o rāua mo rave ꞌino, mo tōtōꞌā mo oho i te taŋata o te ao taꞌatoꞌa (Revelación [Apocalipsis] 12:⁠12).

Mo haŋa ōꞌou mo ŋaruhoa o te ꞌAtua, ꞌina ko aŋa te meꞌe haŋa o te Tātane. Mo haŋa ōꞌou mo ora mo oho rō ai, e aŋa te meꞌe haŋa o te ꞌAtua. Te Tātane paꞌi ꞌe ko tāꞌana vārua rake⁠-⁠rake, ꞌina he here ki a Iehoha, ꞌe he enemī mau a rāua. A rāua he toꞌa o te ꞌAtua, ꞌe ko haŋa ꞌā mo riro tātou takoꞌa he toꞌa o Iehoha. Te Tātane ko ꞌite ꞌā mo māma, mo haka tūtuki i te taŋata, hai huru kē huru kē huru o te māma. Peira e haka hape ena i te rahi o te taŋata (Revelación [Apocalipsis] 12:⁠9). Oīra, e uꞌi ki a ai koe i haŋa ai mo haka roŋo: ki te Tātane o ki te ꞌAtua.