¿Ko ai te ŋaruhoa o te ꞌAtua?

A Ietū he poki a Iehoha ꞌe tōꞌona ŋaruhoa ata here. I ruŋa i te raŋi i noho ai a Ietū pahe merahi pūai, raꞌe ki tōꞌona turu mai pahe taŋata ki ruŋa i te henua (Juan 17:⁠5). A īa i oho mai ai ki te henua, mo hāpī ki te taŋata te parautiꞌa o ruŋa o Iehoha (Juan 18:⁠37). Peira ꞌā, he vaꞌai tōꞌona hakari mo haka kore te hara ꞌe i te mate o te taŋata o te ao taꞌatoꞌa haka roŋo ki te ꞌAtua (Romanos 6:⁠23). A Ietū i te hora nei, he ꞌariki o te haka tere o ruŋa i te raŋi o te ꞌAtua, nei haka tere he haꞌariro te henua he kona nehe⁠-⁠nehe e tahi (Revelación [Apocalipsis] 19:⁠16).

Te merahi he ŋaruhoa o te ꞌAtua takoꞌa. Te merahi kai haꞌamata te rāua tere pahe taŋata i ruŋa i te henua. Ka piere te merahi i aŋa e Iehoha i ruŋa i te raŋi, raꞌe ki te aŋa i te ao ꞌe i te taŋata (Daniel 7:⁠10; Job 38:⁠4-7). Nei ŋaruhoa o te ꞌAtua o ruŋa i te raŋi, ko haŋa ꞌā mo hāpī te taŋata te parautiꞌa o ruŋa o Iehoha (Revelación [Apocalipsis] 14:⁠6, 7).

Te ꞌAtua takoꞌa e ai rō ꞌā tōꞌona ŋaruhoa i ruŋa i te henua, ko nape ꞌā tōꞌona taŋata haka ꞌite. E tahi taŋata ꞌite o ruŋa i te meꞌe e tahi o taŋata e tahi, he haka ꞌite i muꞌa o te hare ture. Te Taŋata Haka ꞌite o ruŋa o Iehoha, he vānaŋa o ruŋa o Iehoha ki te tahi taŋata, ꞌe o ruŋa i tāꞌana meꞌe haŋa (Isaías 43:⁠10). Pehe merahi ꞌā, te Taŋata Haka ꞌite o ruŋa o Iehoha, ko haŋa ꞌā mo hāꞌūꞌū atu mo ꞌite koe i te parautiꞌa o ruŋa o Iehoha. Takoꞌa ko haŋa ꞌā mo riro koe he ŋaruhoa o te ꞌAtua.