Kimi te huru parautiꞌa mo haꞌatura ki te ꞌAtua

Mo haŋa ōꞌou mo riro he ŋaruhoa o te ꞌAtua e haꞌatura a te huru haꞌatiꞌa era e Īa. E tahi nō huru tītika mo haꞌatura ki te ꞌAtua (Efesios 4:⁠4-6). A Ietū ko kī ꞌā “te taŋata haꞌatura parautiꞌa” he haꞌatura ki te ꞌAtua hai “parautiꞌa” (Juan 4:⁠23, 24). Te haꞌatura mau haꞌatiꞌa e Iehoha, he maꞌu i a koe mo ora ki te hopeꞌa raꞌa, ꞌe te haꞌatura hape, he maꞌu i a koe ki te mate (Mateo 7:⁠13, 14).

He aŋi⁠-⁠aŋi koe hē te huru tītika haꞌatura ki a Iehoha, mo uꞌi a ruŋa i te taŋata haka tere peira. A Iehoha he ꞌAtua riva ꞌe te taŋata haꞌatura ki a Īa e riro he taŋata riva takoꞌa. Pahe tumu hua anani riva he vaꞌai mai te anani nene, peira ꞌā te huru haꞌatura parautiꞌa ki a Iehoha, he vaꞌai mai te taŋata riva (Mateo 7:⁠15-20).

Te ŋaruhoa o Iehoha e moꞌa rahi rō ꞌā i te Puka o te ꞌAtua. Ko ꞌite ꞌā nei Puka mai i a Īa i oho mai ai. Oīra e haꞌatiꞌa ena mo haka tere i a rāua, mo hāꞌūꞌū i te rāua ꞌati, ꞌe mo hāꞌūꞌū mo hāpī o ruŋa i te ꞌAtua (2 Timoteo 3:⁠16). Takoꞌa, e haka ꞌuhu rō ꞌā mo haka tere ꞌe mo haka tano ki te roa tātara ena e rāua.

Te ŋaruhoa o Iehoha e here rō ꞌā ki a rāua. Kī ꞌā e Ietū te taŋata e aŋi⁠-⁠aŋi rō ko ai tōꞌona pukuraŋa i te here i a rāua ꞌā (Juan 13:⁠35). A Ietū i haka tikeꞌa rō i tōꞌona here e hāpī era ki te nuꞌu o ruŋa i te ꞌAtua, e haka kore era takoꞌa i te maiūi o te taŋata. Pē Ietū ꞌā, te taŋata haꞌatura parautiꞌa ki te ꞌAtua e tapa rō ꞌā i te nuꞌu veve, ꞌe ꞌina he haꞌataꞌa te nuꞌu o te tahi hau, ꞌe o te tahi kaiŋa. Te taŋata haꞌatura ki a Iehoha, e haŋa takoꞌa ki te tahi taŋata.

Te ŋaruhoa o te ꞌAtua e moꞌa rō ꞌā i tōꞌona ꞌīŋoa, Iehoha. Mo ai e ai rō ꞌā e tahi kope taꞌe haŋa mo raŋi mo oho tuꞌu ꞌīŋoa ¿he ŋaruhoa ōꞌou? ꞌIna. Mo ai e ai rō ꞌā tuꞌu hoa, he ohu koe ki a īa hai tōꞌona ꞌīŋoa, ꞌe he vānaŋa riva⁠-⁠riva koe o ruŋa i a īa ki te tahi. Oīra te taŋata haŋa mo riro he ŋaruhoa o te ꞌAtua, e kī tōꞌona ꞌīŋoa, ꞌe e vānaŋa o ruŋa i a Īa ki te tahi taŋata. Ko haŋa ꞌā Iehoha mo aŋa koe peira (Mateo 6:⁠9; Romanos 10:⁠13, 14).

Pē Ietū ꞌā, te ŋaruhoa o Iehoha he hāpī ki te nuꞌu o ruŋa i te Haka tere o te ꞌAtua. Te Haka tere o te ꞌAtua, he haka tere o ruŋa i te raŋi, mo haꞌariro te henua he kona nehe⁠-⁠nehe e tahi. Te ŋaruhoa o Iehoha, he haka ꞌite ki te tahi taŋata te parau ꞌāpī riva⁠-⁠riva nei o ruŋa i te Haka tere o te ꞌAtua (Mateo 24:⁠14).

Te Taŋata Haka ꞌite o ruŋa o Iehoha, he tute he oho mo riro he ŋaruhoa ōꞌona. A rāua e moꞌa rō ꞌā i te Puka o te ꞌAtua, takoꞌa e kī rō ꞌā, ꞌe e haꞌatura rō ꞌā i tōꞌona ꞌīŋoa, ꞌe he hāpī ki te tahi taŋata o ruŋa i te Haka tere o te ꞌAtua. Te Taŋata Haka ꞌite o ruŋa o Iehoha, e haka tere rō ꞌā i aŋanirā i ruŋa i te henua, a te huru haꞌatiꞌa era e Īa.