KAU 11
ꞌIna koe ko haŋa ki te hare pure taꞌe parautiꞌa
Te Tātane koīa ko tāꞌana vārua rake-rake, kai haŋa mo haꞌatura ōꞌou ki te ꞌAtua. Nā e aŋa mai ena mo haꞌataꞌa i te rahi o te taŋata mai muri i te ꞌAtua. E tahi rāveꞌa mo ravaꞌa rā meꞌe, he hare pure taꞌe parautiꞌa, i te meꞌe era ꞌina he hāpī te parautiꞌa o ruŋa i te Puka o te ꞌAtua (2 Corintios 11:13-15). Te huru o rāua pahe kumara manu ꞌā, a haho he uꞌi koe e riva-riva rō ꞌā, ꞌe mo hore ōꞌou a vaꞌeŋa, he tikeꞌa koe ko manu ꞌā. Peira ꞌā te hare pure taꞌe parautiꞌa, a haho he uꞌi koe ko tano ꞌā, a roto he aŋi-aŋi koe ꞌina e tahi meꞌe riva-riva, ꞌe e ko maꞌu i a koe a te ara era mo ora mo oho rō ai.
Te reo-reo hāpī e te hare pure taꞌe parautiꞌa, ꞌina he haŋa e Iehoha, te ꞌAtua o te parautiꞌa. I te hora era i ruŋa i te henua a Ietū, te pūꞌoko haka tere i te nunaꞌa hare pure o rā hora, ko haŋa tahi ꞌā mo tiŋaꞌi i a īa. Pe nei e manaꞌu era, i te rāua huru haꞌatura te tītika mau, e kī era: “E tahi nō Matuꞌa o mātou, he ꞌAtua”. ¿I tano rō ki a Ietū te manaꞌu ena? ꞌIna. He pāhono ia e īa: “Te kōrua haka ara o te kōrua matuꞌa, he Tātane” (Juan 8:41, 44). Rahi nō te taŋata o aŋanirā e manaꞌu ena, ki te ꞌAtua a rāua e haꞌatura era, ꞌe te parautiꞌa, ki te Tātane koīa ko tāꞌana vārua rake-rake e haka roŋo ena (1 Corintios 10:20).
Pahe tumu anani ko piro ꞌā he hua te anani rake-rake, te hare pure taꞌe parautiꞌa, he vaꞌai mai te taŋata aŋa meꞌe rake-rake. Te henua taꞌatoꞌa ko ī ꞌā e te ꞌati ꞌe i te meꞌe rake-rake aŋa e te taŋata, pahe taiꞌata, toke, moto, teki, taparahi ꞌe tiŋaꞌi taŋata. Te rahi o te taŋata aŋa i te meꞌe rake-rake nei, e ai rō ꞌā te rāua hare pure. Te ꞌino o nei hare pure, ꞌina he haka makenu mo aŋa i te meꞌe riva-riva. Oīra, mo taꞌe haka rē te aŋa te oho i te ŋā meꞌe nei, e ko riva mo riro he ŋaruhoa o Iehoha (Mateo 7:17, 18).
Te hare pure taꞌe parautiꞌa he hāpī ki te taŋata mo pure ki te ꞌatua tarai e te taŋata. Kī mai ꞌā e te ꞌAtua pe nei ē, ꞌina tātou ko pure ki te ꞌatua tarai e te taŋata. He aŋi ꞌā te vānaŋa nei. ¿E haŋa rō koe mo vānaŋa mo oho e tahi kope ki tuꞌu hohoꞌa e taꞌe ki a koe? ¿E riva rō rā kope mo riro he ŋaruhoa ōꞌou? ꞌIna e ko tano. Ko haŋa ꞌā Iehoha mo vānaŋa e te taŋata ki a Īa, taꞌe ki te hohoꞌa o ki te ꞌatua tarai e te taŋata, ŋā meꞌe nei paꞌi he meꞌe mate (Éxodo 20:4, 5).
Te hare pure taꞌe parautiꞌa he hāpī ki te taŋata, e tano nō mo tiŋaꞌi i te taŋata i te hora tamaꞌi. Kī ꞌā e Ietū te ŋaruhoa o te ꞌAtua he here ki a rāua ꞌā, ꞌe ꞌina he tiŋaꞌi i te rāua nunaꞌa here (Juan 13:35). ꞌIna e ko riva takoꞌa mo tiŋaꞌi i te taŋata aŋa meꞌe rake-rake. I oho era te toꞌa o Ietū ki a īa mo maꞌu mo puru, kai haꞌatiꞌa ki tāꞌana pukuraŋa mo moto mo hāpaꞌo i a īa (Mateo 26:51, 52).
Te hare pure taꞌe parautiꞌa e hāpī rō ꞌā pe nei ē, te taŋata rake-rake he ꞌoꞌotu i roto i te pōꞌauahi. E te Puka o te ꞌAtua e hāpī rō mai ꞌā pe nei ē, te hara he maꞌu i a koe he mate rō ai (Romanos 6:23). ꞌIna koe ko ꞌoꞌotu i roto i te pōꞌauahi, a Iehoha paꞌi he ꞌAtua here. ¿He haka ūtuꞌa he oho rō ai i a koe te ꞌAtua here? ꞌIna hoꞌi. Pē muꞌa ka oho ena, taꞌatoꞌa hare pure haka tere a te vaha reo-reo o te Tātane, he haka kore rō ai, e i rā hora, i ruŋa i te henua nehe-nehe, e tahi nō hare pure ka haka tere nei, ko te hare pure haŋa a Iehoha (Revelación [Apocalipsis] 15:4).