KAU 3
E aŋi-aŋi koe o ruŋa i te ꞌAtua
E aŋi-aŋi koe o ruŋa i te ꞌAtua, mo riro he ŋaruhoa ōꞌona. ¿ꞌIte rō ꞌā tou repahoa i tuꞌu ꞌīŋoa? ¿E raŋi rō atu ꞌā peira? ¿Taꞌe o peira? Te ꞌAtua ko haŋa takoꞌa ꞌā mo aŋi-aŋi tōꞌona ꞌīŋoa, ꞌe mo raŋi ki a Īa peira. Te ꞌīŋoa o te ꞌAtua ko Iehoha (Salmo 83:18; Mateo 6:9). Mo māhani ōꞌou ki tuꞌu repahoa, taꞌe i te hora e tahi. Peira ꞌā, mo māhani koe ki a Iehoha, e haꞌataꞌa te hora, te mahana, mo aŋi-aŋi riva-riva i a Īa. Oīra te Puka o te ꞌAtua e kī era mo haka tere peira, he meꞌe māramarama (Efesios 5:15, 16). Te rua meꞌe mo aŋi-aŋi, e ꞌite he aha tāꞌana meꞌe haŋa ꞌe tāꞌana meꞌe taꞌe haŋa, ko ai tōꞌona ŋaruhoa, ꞌe ko ai te kope taꞌe au ꞌe taꞌe haŋa ki a Īa.
Te ŋaruhoa o te ꞌAtua he aŋa tāꞌana meꞌe haŋa. Ka manaꞌu rā koe ki tou repahoa. Mo rave ꞌino o mo aŋa koe i te aŋa taꞌe au, taꞌe reka i ruŋa i a rāua, he tētere ¿taꞌe o peira? Peira ꞌā i te ꞌAtua, mo haŋa ōꞌou mo ŋaruhoa ōꞌona, e aŋa tāꞌana meꞌe haŋa (Juan 4:24).
Taꞌe mo te hare pure taꞌatoꞌa e hāꞌūꞌū atu mo riro koe he ŋaruhoa o te ꞌAtua. Mo haŋa ōꞌou mo ŋaruhoa o te ꞌAtua, e hāpī pe hē ana haꞌatura e haꞌamuri ki a Īa. Te ŋaruhoa hopeꞌa o te nui-nui o te ꞌAtua ko Ietū, a īa ko vānaŋa ꞌā o ruŋa i te ara e rua. Te raꞌe, he ara ꞌaꞌano e tahi, rahi nō te taŋata haꞌere a ruŋa. Te ara nei he maꞌu i a koe ki te mate. Te rua, he ara vako-vako e tahi, vara-vara nō te nuꞌu haꞌere a ruŋa. Te ara nei he maꞌu i a koe mo ora mo oho rō ꞌai. ꞌI te ara mau mo oho ōꞌou, oīra, ka hāpī koe o ruŋa o Iehoha, ka haka roŋo ki a Īa, ꞌe ka haka tere a rā roa mo riro he ŋaruhoa o te ꞌAtua (Mateo 7:13, 14).