TE MEꞌE HAŊA A REBEKA HE HAKA KOA I A IEHOHA

A Rebeka he viꞌe e tahi, here ki a Iehoha. Ko haīpoīpo ꞌā ki a Itaꞌata, e a īa nei e here takoꞌa rō ꞌā ki a Iehoha. ¿Pe hē a rāua i mahani ai? ¿He aha te meꞌe a Rebeka i aŋa mo haka koa i a Iehoha? Mai ki hāpī tātou o ruŋa i te ꞌaꞌamu o Rebeka.

Pe nei te ꞌaꞌamu i haꞌamata ai. Te ꞌīŋoa o te ŋā matuꞌa era o Itaꞌata ko Abrahán e ko Sara. A Abrahán ko haŋa ꞌā mo haīpoīpo taꞌana poki ki te viꞌe here ki a Iehoha. A rāua e noho era i Canaán, e te taŋata o ꞌira ꞌina he here e ꞌina he haka roŋo ki a Iehoha. Oīra i uŋa ai i taꞌana taŋata aŋa, koite ko Eliezer, ki Harán. I ꞌira e noho era te huaꞌai o Abrahán ꞌe e riva nō a Eliezer mo ravaꞌa te viꞌe riva mo haīpoīpo ki a Itaꞌata.

Roa⁠-⁠roa rahi te ara i haꞌere ai e Eliezer ko ia ko te tahi taŋata aŋa a Abrahán, a rāua e maꞌu rō ꞌā hoꞌe ahuru camello, takoꞌa te rahi o te kai e te rahi o te mahīa. ¿Pe hē ka ravaꞌa era e Eliezer i te viꞌe tano ma Itaꞌata? Taꞌana meꞌe aŋi⁠-⁠aŋi, te ŋā viꞌe o rā kona e oho rō ꞌā e toꞌo rō ꞌā te vai mai roto i te puna vai e tahi. He turu ananake ki te kona i ꞌira te puna vai. E i turu era he pure a Eliezer ki a Iehoha e he kī: “Mo te uka ka nonoꞌi era au hai vai e mo vaꞌai mai ki a au e takoꞌa ki te mātou camello, he aŋi⁠-⁠aŋi rō ai e au, ko īa te viꞌe vae era e koe mo haīpoīpo ki a Itaꞌata”.

I hini era he tuꞌu a Rebeka ki rā puna. Te Puka o te ꞌAtua e kī era a īa he uka nehe⁠-⁠nehe e tahi. He nonoꞌi e Eliezer hai vai e he pahono e īa: “Tano ꞌā. I au he vaꞌai atu hai vai maꞌau e mo taꞌa camello takoꞌa”. Rahi no te vai e unu era e te camello, ōira rahi no te vai a Rebeka e toꞌo mai era mai roto o te puna, mo haka unu i rā ŋā camello. ¡Ko rā e ko nei e oho era a īa! Ka uꞌi rā koe i te hohoꞌa o te kaka parau era o tuꞌa. ¿He aha te meꞌe era a Rebeka e aŋa mai era?... I tikeꞌa era e Eliezer i te rahi o te aŋa o Rebeka, he veveri e he aŋi⁠-⁠aŋi rō ai: ¡Ko pahono ꞌā Iehoha i taꞌana pure!

He mahīa e Eliezer te rauhuru meꞌe tau ki a Rebeka. E he kī a Rebeka mo oho ananake ki te hare o toꞌona huaꞌai. He haka aŋi⁠-⁠aŋi e Eliezer ki te huaꞌai o te aha a Abrahán i uŋa ai i a īa ki ꞌira. He ꞌaꞌamu takoꞌa pe hē a Iehoha i pahono ai i taꞌana pure. I ŋaroꞌa era te huaꞌai o Rebeka i te meꞌe nei, he koa ananake e he kī ko tano ꞌā ki a rāua, mo haīpoīpo o Rebeka ki a Itaꞌata.

¿I haŋa rō a Rebeka mo haīpoīpo ki a Itaꞌata?... I ꞌui era e toꞌona huaꞌai ana ai ko haŋa ꞌā a īa mo haīpoīpo, he pahono e īa ko haŋa ꞌā. ¿O te aha i pahono ai peira? O te ai a Rebeka ko aŋi⁠-⁠aŋi ꞌā a Iehoha i uŋa i a Eliezer. Oīra i oho ai i muri i a īa ki Canaán, e i tuꞌu era ki ꞌira, he haīpoīpo ki a Itaꞌata.

O te haka roŋo o Rebeka ki a Iehoha i hapaꞌo riva⁠-⁠riva ai e Īa. E takoꞌa he haꞌatiꞌa e Iehoha mo riro Rebeka he tupuna o Ietū. Mo haka roŋo ꞌoꞌou ki a Iehoha pē Rebeka ꞌā, he haka koa koe i a Īa, e he hapaꞌo atu i a koe.