KO HAKA ROŊO ꞌĀ RAHAB KI A IEHOHA

Ki oho tāua ki te hora era o muꞌa ꞌā ki a Jeriko, kona e tahi o te henua era o Canaán. Te taŋata o rā kona ꞌina he haka roŋo ki a Iehoha. E i te kona nei e noho era e tahi viꞌe, ko Rahab toꞌona ꞌīŋoa.

Mai te iti⁠-⁠iti haŋa ꞌā, a Rahab i haka roŋo ai pe hē a Motē i avahi ai te vaikava era ko Vaikava mea⁠-⁠mea toꞌona ꞌīŋoa, mo toꞌo i te Israelita mai Egipto. Takoꞌa i ŋaroꞌa rō pe hē i haꞌūꞌū ai e Iehoha mo rē ki te tahi kaiŋa taꞌe haka roŋo era ki a Īa. E i te hora nei he ŋaroꞌa a Rahab i te ꞌaꞌamu nui⁠-⁠nui e tahi: Te Israelita ko hahine ko oho mai ꞌā ki a Jeriko.

I te pō e tahi, e rua kope Israelita, he uru ki Jeriko mo uꞌi i rā kona. He tuꞌu ki te hare era o Rahab. He kī e Rahab mo uru mo noho. He ꞌite e te ariki o rā kona o ruŋa i te ŋā kope nei e rua, e he kī ki taꞌana taŋata mo oho mo toꞌo mai ꞌira, ¿He aha te meꞌe i aŋa e Rahab? He kī ki tū ŋā kope era mo pipīko i ruŋa i te hare. E he kī ki tū ŋā taŋata uŋa era e te ariki, pe nei ē: “Ko oho era ꞌā a rāua. Mo tute e kōrua i te hora mau nei ꞌā he ravaꞌa e kōrua”. Peira a Rahab i hapaꞌo ai i tū ŋā kope era e rua. ¿O te aha i haꞌūꞌū ai?... O te ai ko ꞌite ꞌā ko ai a Iehoha e ko ꞌite takoꞌa ꞌā, ma Iehoha e vaꞌai tahi te kaiŋa era o Canaán mo noho o rāua.

Raꞌe ki te oho mai te hare era o Rahab, te ŋā kope era e rua, he kī ki a Rahab, ko īa nō e ko toꞌona huaꞌai ka ora era, i te hora ka haka kore era e Iehoha a Jeriko. E ai rō ꞌā e tahi meꞌe mo aŋa e Rahab, ¿Ko meꞌe hē?... E tau te taūra mea⁠-⁠mea e tahi a haho o toꞌona hare ꞌe e haka piri tahi toꞌona huaꞌai i roto i te hare. E peira mau ꞌā i aŋa ai e Rahab. ¿Haŋa rō koe mo ꞌite pe hē i hopeꞌa ai?...

I tano era te mahana he tuꞌu te Israelita ki a Jeriko e he haka teka tahi ka vari rō. E ono mahana i haka teka i oho ai, e tahi teka i te mahana, e ꞌina e tahi reꞌo rere. I te hitu mahana e hitu teka i aŋa ai, e i te teka hopeꞌa i kikiu pūai ai taꞌatoꞌa. I rā hora a Iehoha i haka marere tahi ai te ꞌaua e vari e oho era i a Jeriko. ¿He aha te meꞌe i piri ki a Rahab? I te meꞌe era ko huki ꞌā e īa i tū taūra mea⁠-⁠mea era, ꞌina toꞌona hare kai marere. ¿E tikeꞌa rō ꞌā koe i te taūra i ruŋa i te hohoꞌa?... Peira a Rahab koīa ko toꞌona huaꞌai i ora ai.

¿O te aha a Rahab i ora ai?... A Rahab i ora ai o toꞌona haka roŋo ki a Iehoha. ¿O te aha i haka roŋo ai? O te ai ko ꞌite ana te ꞌaꞌamu o ruŋa o Iehoha. Nā koe takoꞌa e hāpī mai ena rauhuru meꞌe o ruŋa o Iehoha. ¿E haka roŋo rō koe ki a Iehoha pe Rahab?... E hoꞌi, e haka roŋo koe.