KAU 11
A RĀUA KO PAPAꞌI ꞌĀ O RUŊA O IETŪ
¿E tikeꞌa rō ꞌā koe te taŋata o ruŋa i te hohoꞌa?... A rāua ko Mateo, Marko, Luka, Iovani, Petero, Juda e ko Pablo. Te ŋā taŋata nei, i noho rō i te taꞌu era o Ietū i ruŋa i te henua. E a rāua ko papaꞌi ꞌā o ruŋa i a īa. Mai ki hāpī o ruŋa i a rāua.
¿Ko ai te ŋā taŋata nei?
E toru o nei taŋata he repahoa o Ietū. I muri i a īa e eꞌa era e vānaŋa era o ruŋa i te ꞌAtua. Te rāua ꞌīŋoa ko Mateo, Iovani e ko Petero. ¿Ka haka tikeꞌa mai rā koe i ruŋa i te hohoꞌa?... A Mateo rāua ko Iovani, e aŋi-aŋi riva-riva rō ꞌā i a Ietū, e ko papaꞌi ꞌā i te rāua puka o ruŋa i te noho iŋa o Ietū i ruŋa i te henua. A Iovani ko papaꞌi takoꞌa ꞌā i te puka te ꞌīŋoa ko Revelación, ꞌe e toru parau papaꞌi te ꞌīŋoa ko: raꞌe o Iovani, rua o Iovani e toru o Iovani. A Petero i papaꞌi rō e rua parau papaꞌi te ꞌīŋoa ko raꞌe o Petero e rua o Petero. E nā i ruŋa i te Puka o te ꞌAtua takoꞌa. I te parau papaꞌi a Petero ko papaꞌi ꞌā o ruŋa i te hora vānaŋa mai era e Iehoha mai ruŋa i te raŋi, i kī era o ruŋa o Ietū: “He poki ꞌaꞌaku nei, he haŋa rahi ꞌaꞌaku e ko rahi ꞌā toꞌoku koa i a īa”.
Te tahi taŋata ena o ruŋa i te hohoꞌa e hāpī takoꞌa rō mai ꞌā o ruŋa o Ietū i ruŋa i te ŋā puka papaꞌi era e rāua. E tahi o rā ŋā taŋata ko Marko te ꞌīŋoa. Pahe meꞌe ena i muri i a Ietū a īa hora ꞌaꞌaru era mo maꞌu mo puru i a Ietū. Te kope haka ꞌou i papaꞌi ko Luka, a īa he taote, e ki mate a Ietū i riro iho ai a īa he taŋata aŋa ꞌaꞌana.
E rua taina iti-iti o Ietū i papaꞌi takoꞌa rō i te Puka o te ꞌAtua. ¿Ko ꞌite ꞌā koe ko ai te rāua ꞌīŋoa?... Ko Santiago e ko Juda. Hora raꞌe era a rāua ꞌina he haŋa mo haka roŋo te meꞌe hāpī era e Ietū, pe nei e manaꞌu era ko maꞌa-maꞌa ꞌā a īa. I tano era te matahiti he riro a rāua he taŋata aŋa a Ietū.
Te kope e tikeꞌa ena koe i vaꞌeŋa o te hohoꞌa ko Pablo. Ko Saulo toꞌona ꞌīŋoa, raꞌe ki te riro he taŋata aŋa a Ietū. He riri mau ꞌaꞌana te taŋata aŋa a Ietū e he meꞌe rake-rake nō te meꞌe aŋa ki a rāua. ¿Ko ꞌite ꞌā koe pe hē a Pablo i riro ai he taŋata aŋa a Ietū?... E tahi mahana e oho a īa a te ara, i hini era he ŋaroꞌa te reꞌo e tahi mai ruŋa i te raŋi vānaŋa ki a īa. Ko Ietū rā meꞌe, he ꞌui ki a īa: “¿He aha koe e aŋa ena i te meꞌe rake-rake ki te taŋata haka roŋo mai ki a au?”. I piri era te meꞌe nei ki a Pablo, he huri toꞌona huru haka tere e he riro he taŋata aŋa a Ietū. A Pablo ko papaꞌi ꞌā 14 puka iti-iti i ruŋa i te Puka o te ꞌAtua, mai a Romano ki a Hebreo.
¿I ŋaroꞌa rō koe e tahi ꞌaꞌamu toꞌo mai ruŋa i te Puka o te ꞌAtua?... I ruŋa rahi nō te ꞌaꞌamu o Ietū e eꞌa era. Te meꞌe hopeꞌa o te riva-riva mo aŋa ꞌoꞌou, e hāpī e oho o ruŋa i a īa. ¿Haŋa rō koe mo aŋa peira?...