KAU 12
HE TAŊA ꞌĀPĪ E TAHI TAꞌE RIꞌA-RIꞌA
Mai ki hāpī tātou o ruŋa i te taŋa ꞌāpī e tahi. Kai ꞌite tātou toꞌona ꞌīŋoa, te meꞌe ꞌite nō o ruŋa i a īa, he poki o te taina o Pablo e ꞌaꞌana i haꞌūꞌū, mo taꞌe tiŋaꞌi i toꞌona papatīo, no atu toꞌona riꞌa-riꞌa. ¿Haŋa rō koe mo ꞌite he aha taꞌana meꞌe i aŋa?...
A Pablo ko puru ꞌā i Jerusalén. ¿O te aha e puru era? O te vānaŋa o ruŋa i a Ietū ki te taŋata. Te ꞌati e ai rō ꞌā te taŋata riri mo Pablo, e he vānaŋa ananake mo tiŋaꞌi i a īa. Oīra i haŋa ai mo kī ki te kape o te mutoꞌi: “Ka uŋa koe ki taꞌa auarīo mo maꞌu i a Pablo ki te hare ture”. Te manaꞌu o rāua, he pipīko i te ara, e ki maꞌu i a Pablo a rā ara, e he eꞌa e rāua he tiŋaꞌi.
Te taŋa ꞌāpī he ꞌaꞌamu ki a Pablo e ki te kape era o te mutoꞌi o ruŋa i tū aŋa rake-rake era
Te poki o te taina o Pablo, ko ŋaroꞌa ꞌā nei meꞌe, e he eꞌa he oho he ꞌaꞌamu ki toꞌona papatīo. I ŋaroꞌa era e Pablo he kī: “Ka hōrou ka oho ki te kona noho o te kape o te mutoꞌi e ka ꞌaꞌamu tahi nā meꞌe”. Peaha i riꞌa-riꞌa rō a īa mo vānaŋa ki tū taŋata era, o te ai a īa he puꞌoko o te mutoꞌi taꞌatoꞌa. ¿I oho i vānaŋa rō te taŋa ꞌāpī ki rā kape mutoꞌi era?... E ē, no atu toꞌona riꞌa-riꞌa, i oho i vānaŋa rō.
Te kape o te mutoꞌi ko noho ko haka roŋo tahi ꞌā te vānaŋa o tū kope era. Oīra mo hapaꞌo i a Pablo he toꞌo he uŋa ki te kona e tahi te ꞌīŋoa ko Cesarea. E takoꞌa he uŋa i te roŋo ki te 500 auarīo mo hokorua i a Pablo e he kī: “Ka maꞌu rō ai i te pō mau nei ꞌā”. ¿I ora rō a Pablo?... E ē, ko ora ꞌā. Kai riva te ŋā taŋata rake-rake era mo tiŋaꞌi i a Pablo.
¿He aha te meꞌe o tātou mo hāpī o ruŋa i te ꞌaꞌamu nei?... ¿Ko tikeꞌa ꞌā koe i tū taŋa ꞌāpī era ꞌina kai riꞌa-riꞌa? ¡A koe e riva nō mo tuꞌu pe īa takoꞌa! Oīra, ꞌina tātou ko riꞌa-riꞌa mo vānaŋa o ruŋa o Iehoha ki te taŋata. ¿E riꞌa-riꞌa rō koe mo vānaŋa o ruŋa o Iehoha?... He meꞌe hopeꞌa o te nui-nui te vānaŋa te oho o ruŋa i te ꞌAtua, o te ai peira te taŋata ka ora ka oho ena e ꞌina e ko mate.