KAU 13
TE MEꞌE HAŊA A TIMOTEO HE HAꞌŪꞌŪ KI TE TAŊATA
A Timoteo he taŋa ꞌāpī e tahi e he koa nō te meꞌe ŋaroꞌa hora haꞌūꞌū era ki te tahi. Kona rahi te kona ꞌaꞌana i oho mo haꞌūꞌū ki te taŋata, oīra he koa nō te meꞌe i piri ki a īa. ¿Haŋa rō koe mo ꞌaꞌamu atu o ruŋa i a īa?...
Te matuꞌa vahine e te mamarūau o Timoteo i hāpī rō ki a īa o ruŋa o Iehoha
A Timoteo i nui-nui i oho ai i te kona e tahi te ꞌīŋoa ko Listra. Mai toꞌona iti-iti haŋa ꞌā, toꞌona matuꞌa vahine te ꞌīŋoa ko Eunice e toꞌona mamarūau ko Loida, i vānaŋa ai ki a Timoteo o ruŋa o Iehoha. Oīra e poki nō ꞌā Timoteo, i pohe ai mo haꞌūꞌū ki te taŋata mo ꞌite o rāua o ruŋa i a Iehoha.
Hora era e taŋa ꞌāpī nō ꞌā Timoteo, he kī e Pablo: “I au he oho he vānaŋa o ruŋa i a Iehoha i te tahi kona. ¿Haŋa rō koe mo oho tāua?”. He koa a Timoteo e he kī: “¡E ē, ko haŋa ꞌā au!”. O te ai taꞌana meꞌe haŋa he haꞌūꞌū ki te taŋata.
He oho i muri i a Pablo ki Tesalónica, kona e tahi o te henua era ko Grecia. Aŋa riꞌa-riꞌa mo tuꞌu ki ꞌira, e haꞌere e oho e ki ꞌoti e eke ki ruŋa i te pahī. Ki tuꞌu ki rā kona, rahi nō te taŋata i haꞌūꞌū e rāua mo aŋi-aŋi o ruŋa i a Iehoha. E i ai rō te taŋata takoꞌa i riri rahi rō mo rāua e i haŋa rō mo aŋa i te meꞌe rake-rake i ruŋa i a rāua. Oīra a Pablo rāua ko Timoteo i oho ai ki te tahi kona, mo vānaŋa o ruŋa i a Iehoha.
He koa nō te meꞌe i piri ki a Timoteo
I tano era te avaꞌe a Pablo he nonoꞌi ki a Timoteo mo hoki ꞌoꞌona ki Tesalónica. Ko haŋa ꞌā mo ꞌite pe hē te taina o rā kona e noho era. Te ꞌati i Tesalónica rahi nō te taŋata e aŋa era i te meꞌe rake-rake ki te taina. Oīra ꞌina Timoteo ko riꞌa-riꞌa mo hoki ki rā kona. A īa ko haŋa ꞌā mo oho o te ai ko tipa-tipa ꞌā te manaꞌu o ruŋa i te ŋā taina era o rā kona. I hoki mai era mai rā kona he parau ꞌāpī riva-riva taꞌana meꞌe i maꞌu ki a Pablo. ¡Te taina o Tesalónica ko te aŋa haŋa ꞌā mo Iehoha!
Rahi nō te matahiti a Timoteo i aŋa ai mo Iehoha i muri i a Pablo. Oīra a Pablo i papaꞌi ai o ruŋa i a īa: “I au he uŋa atu i a Timoteo mo haꞌūꞌū ki te taina. Kai piri mai ꞌā e tahi kope tuꞌu pe īa. A īa e here rō ꞌā ki a Iehoha e peira ꞌā ki te taŋata”.
¿E here rō ꞌā koe ki te taŋata ꞌe e haŋa rō koe mo haꞌūꞌū ki a rāua mo ꞌite o ruŋa o Iehoha?... Mo ai peira e riva nō koe mo koa, e mo piri atu te meꞌe riva-riva pe Timoteo ꞌā.