HĀPĪ 4
Pe hē ana hapaꞌo riva-riva te moni o haka pau tahaŋa rō
“Hai ꞌui ki te rua, te meꞌe haŋa ꞌaꞌau mo aŋa, ka riva ena.” (Proverbios 20:18)
A tātou taꞌatoꞌa e kimi rō ꞌā i te raveꞌa mo maꞌu hai moni mo te tātou huaꞌai mo hoꞌo te kai, te kahu, e te tahi meꞌe (Proverbios 30:8). Te moni paꞌi, he riva mo hapaꞌo atu (Eclesiastés 7:12). E ai rō ꞌā te mahana e ko pohe kōrua mo vānaŋa o ruŋa i te moni o kōrua, no atu nei meꞌe, ꞌina ko haꞌatiꞌa mo ture i roto i a kōrua o ruŋa i te meꞌe nei (Efesios 4:32). ꞌIna ko haꞌavare ki taꞌa viꞌe o ki taꞌa kenu ana vānaŋa o ruŋa i te moni, hokorua kōrua ana uꞌi ki te aha te moni ka haka pau ena.
1 TE MEꞌE O KŌRUA MO AŊA O PAU VAVE RŌ TE MONI
TE MEꞌE KĪ E TE PUKA O TE ꞌATUA: “¿Ko ai o roto o kōrua e haŋa era mo haka tuꞌu e tahi hare, mo taꞌe noho he raꞌe, ai ka uꞌi e hīa ka pau era, mo uꞌi ana ai e tano rō te moni mo haka mao?” (Lucas 14:28). Oīra, te tano mau, hokorua kōrua ana uꞌi ki te aha ka haka pau ena te kōrua moni (Amós 3:3). E uꞌi he aha te meꞌe ka hoꞌo ena ꞌe e hīa moni ka haka pau ena (Proverbios 31:16). No atu te ai te kōrua moni mo hoꞌo te kōrua meꞌe haŋa, ꞌina ko manaꞌu o te ai rā moni, e hoꞌo tahi mai te meꞌe haŋa era o kōrua. Peira ꞌā e uꞌi te raveꞌa mo taꞌe tarahu kōrua, ka hoꞌo mai te meꞌe e tano era ki te kōrua moni (Proverbios 21:5; 22:7).
TAꞌA MEꞌE MO AŊA:
Mo topa rō atu te moni ka tomo ena te avaꞌe, e uꞌi koīa ko tuꞌu hokorua he aha te meꞌe ka aŋa era hai rā moni
E mo ai kai tano te kōrua moni e uꞌi te raveꞌa mo haka tano te meꞌe o kōrua mo hoꞌo. Peaha te meꞌe o kōrua mo aŋa, e kai i te kona hare era, e ꞌina ko eꞌa ko kai i haho o mauꞌa rō te moni
2 ꞌINA KO MOE VARUA E UꞌI TUꞌU PARAUTĪꞌA
TE MEꞌE KĪ E TE PUKA O TE ꞌATUA: “E haka titīka tuꞌu haka tere iŋa taꞌe i muꞌa o te mata o Iehoha nō, takoꞌa i muꞌa o te mata o te taꞌatoꞌa taŋata” (2 Corintios 8:21). Ka kī ki taꞌa viꞌe o ki taꞌa kenu te parautīꞌa o ruŋa i te moni e ravaꞌa ena e koe ꞌe e hīa koe e haka pau ena.
E ꞌui takoꞌa ki tuꞌu hokorua, i te hora ka haka pau rahi ena i te moni i ruŋa i te meꞌe e tahi (Proverbios 13:10). Mo vānaŋa kōrua o ruŋa i te ŋā meꞌe taꞌatoꞌa nei he haꞌūꞌū atu mo taꞌe moto kōrua. E uꞌi tuꞌu moni e toꞌo ena pahe moni o kōrua, taꞌe pahe moni ꞌoꞌou nō (1 Timoteo 5:8).
TAꞌA MEꞌE MO AŊA:
E ꞌui ki tuꞌu hokorua e hīa moni e riva ena koe mo haka pau mo taꞌe ꞌui ki a īa
ꞌIna ko tiaki mo hape te kōrua moni mo vānaŋa iho o ruŋa i te moni