HĀPĪ 7
Pe hē ana hāpī ki taꞌa ŋā poki
“Te ŋā vānaŋa nei e kī atu ena e au i aŋanirā, e hapaꞌo i roto i tuꞌu mahatu ꞌe e hāpī ki taꞌa poki.” (Deuteronomio 6:6, 7)
Hora aŋa era e Iehoha i te huaꞌai, he kī ki te matuꞌa mo hapaꞌo e rāua i te rāua ŋā poki (Colosenses 3:20). Pahe matuꞌa, mo kōrua e hāpī ki te kōrua ŋā poki mo here ki a Iehoha e mo riro he taŋata haka tere titīka ka paꞌari era (2 Timoteo 1:5; 3:15). Takoꞌa e aŋi-aŋi riva-riva he aha te meꞌe e ŋaroꞌa era taꞌa ŋā poki i roto i te rāua mahatu. Peira ꞌā, hai huru haka tere ena ꞌoꞌou a koe e riva ena mo hāpī takoꞌa ki a rāua. Te huru hopeꞌa o te riva-riva mo hāpī ki taꞌa ŋā poki i te vānaŋa o te ꞌAtua, e maꞌu e koe he raꞌe i roto i tuꞌu mahatu (Salmo 40:8).
1 E AI KOE HE TAŊATA HAKA ROŊO MO HAŊA TAꞌA ŊĀ POKI MO VĀNAŊA ATU
TE MEꞌE KĪ E TE PUKA O TE ꞌATUA: “E ai koe he taŋata hōrou mo haka roŋo e ꞌina ko hōrou ana vānaŋa” (Santiago 1:19). Te meꞌe haŋa o te matuꞌa mo aŋi-aŋi e te rāua ŋā poki pe nei ē, e riva nō rāua mo vānaŋa o ruŋa o te rauhuru meꞌe, i te hora haŋa o rāua mo vānaŋa. Hora era mo vānaŋa kōrua ꞌina ko ture, ꞌina ko pohi, mo riva paꞌi rāua mo vānaŋa atu (Santiago 3:18). Mo uꞌi paꞌi rāua he kope riri-riri e eta-eta a koe, e ko kī tahi atu te meꞌe ŋaroꞌa ꞌe e manaꞌu ena e rāua. Oīra ka haka ꞌuhu e takoꞌa ka kī paurō te mahana, e haŋa rō ꞌā koe ki a rāua (Mateo 3:17; 1 Corintios 8:1).
TAꞌA MEꞌE MO AŊA:
E ai koe i te hora haŋa o taꞌa ŋā poki mo vānaŋa atu
E vānaŋa paurō te hora koīa ko taꞌa ŋā poki e taꞌe nō i te hora era ko ꞌati ꞌā rāua
2 E AŊI-AŊI RIVA-RIVA HE AHA TE MEꞌE HAŊA MAU O RĀUA MO KĪ ATU
TE MEꞌE KĪ E TE PUKA O TE ꞌATUA: “Te kope aŋi-aŋi i te haꞌauraꞌa o ruŋa i te meꞌe e tahi, he meꞌe riva-riva nō te meꞌe ka piri era” (Proverbios 16:20). Nā e tuꞌu rō te mahana he vānaŋa atu taꞌa ŋā poki, e ꞌina ko haka roŋo a ruŋa nō mo aŋi-aŋi riva-riva, he aha te meꞌe haŋa mau era o rāua mo kī atu. Te ŋā poki e haka nui-nui rō ꞌā i te vānaŋa o he kī atu i te vānaŋa ꞌina he ŋaroꞌa mau e rāua. “Te kope maramarama kore, he pahono raꞌe ki te haka roŋo” (Proverbios 18:13). Oīra ꞌina ko riri hōrou (Proverbios 19:11).
TAꞌA MEꞌE MO AŊA:
Ka haka ꞌuhu mo taꞌe haka mou i taꞌa poki e mo taꞌe riri o ruŋa i te meꞌe ka kī atu era, no atu he aha rā meꞌe ka kī atu era
Ka manaꞌu rā i te hora era e poki nō ꞌā koe ¿he aha taꞌa meꞌe e ŋaroꞌa era e he aha taꞌa meꞌe e haŋa era i rā hora?
3 E AI KO TŪ MANAꞌU ꞌĀ KŌRUA
TE MEꞌE KĪ E TE PUKA O TE ꞌATUA: “E haka roŋo e poki ꞌaꞌaku ē, i te meꞌe hāpī o tuꞌu matuꞌa tane e ꞌina ko haka tapa te roŋo o tuꞌu matuꞌa vahine” (Proverbios 1:8). Ko kī ꞌā e Iehoha ki te matuꞌa tane e takoꞌa ki te matuꞌa vahine mo haka tere e rāua i te ŋā poki. Mo rāua ararua e hāpī ki te rāua ŋā poki mo riro he ŋā poki haka roŋo, e mo moꞌa i te rāua matuꞌa (Efesios 6:1-3). Te kōrua ŋā poki e tikeꞌa rō ꞌā i te hora era e taꞌe tano era te kōrua huru manaꞌu (1 Corintios 1:10). Oīra, mo taꞌe tano te kōrua huru manaꞌu, ꞌina kōrua ko ture i muꞌa o te kōrua ŋā poki, o taꞌe moꞌa haka ꞌou rō i a kōrua.
TAꞌA MEꞌE MO AŊA:
Hokorua kōrua ana uꞌi pe hē ka hāpī era ki te kōrua ŋā poki i te hora hape o rāua
Mo ai ꞌina he tano tuꞌu huru manaꞌu ki te manaꞌu o tuꞌu hokorua o ruŋa i te huru hāpī ki te kōrua ŋā poki, e uꞌi te raveꞌa mo aŋi-aŋi o te aha a īa e manaꞌu era peira
4 E UꞌI HĒ AHA TAꞌA MEꞌE KA AŊA ERA MO HĀPĪ KI TAꞌA ŊĀ POKI
TE MEꞌE KĪ E TE PUKA O TE ꞌATUA: “Ka hāpī koe ki taꞌa poki a te ara mau mo oho ꞌoꞌona” (Proverbios 22:6). Mo haŋa koe mo riva-riva taꞌa ŋā poki e manaꞌu riva-riva pe hē koe ka hāpī ena. E uꞌi he aha te meꞌe o kōrua ka aŋa era, mo hāpī ki te kōrua ŋā poki e takoꞌa he aha te meꞌe ka aŋa era, mo haka titīka i a rāua mo taꞌe haka roŋo atu (Salmo 127:4; Proverbios 29:17). Te haka titīka i taꞌa ŋā poki, taꞌe nō pe nei ē, he ture koe o he puꞌa, e haꞌūꞌū koe mo aŋi-aŋi o te aha a rāua ana haka roŋo atu (Proverbios 28:7). E hāpī takoꞌa ki taꞌa ŋā poki, mo maꞌu i te vānaŋa o te ꞌAtua i roto i te rāua mahatu e mo aŋi-aŋi te haꞌauraꞌa o te roŋo papaꞌi era i ruŋa (Salmo 1:2). Peira ka aŋi-aŋi ena hē te huru manaꞌu titīka (Hebreos 5:14).
TAꞌA MEꞌE MO AŊA:
E aŋa e oho mo uꞌi e taꞌa ŋā poki i te ꞌAtua pahe matuꞌa here, haka roŋo, mo haŋa rāua mo hahine ki a Īa
E haꞌūꞌū ki a rāua mo aŋi-aŋi i te meꞌe rake-rake o roto o te Internet e mo haka tapa mai rā ŋā meꞌe. E hāpī takoꞌa mo haka tapa i a rāua, mai te nuꞌu taparahi e rave ꞌino ena i te ŋā poki
“Ka hāpī koe ki taˈa poki a te ara mau mo oho ˈoˈona”