¿He aha te meꞌe haŋa o te ꞌatua mo tātou?
I te hora e uꞌi ena koe i te teata, e haka roŋo ena i te radio, ꞌe e taiꞌo ena i te parau ꞌāpī, he tikeꞌa e he haka roŋo koe te rahi o te ꞌaꞌamu o ruŋa i te tiŋaꞌi taŋata, tamaꞌi, e te tahi atu meꞌe rake-rake. Koite a koe mau ꞌā, nā e maiūi mai ena, e takoꞌa e mamāe mai ena tuꞌu māhatu o ruŋa i te mate o tuꞌu huaꞌai o repahoa here.
Ka ꞌui atu:
¿Ko te meꞌe nei te meꞌe haŋa o te ꞌAtua māꞌaku e mo tōꞌoku huaꞌai?
¿I hē au ana kimi i te rāveꞌa mo hāꞌūꞌū mai i te hora o tōꞌoku ꞌati?
¿E kore rō te tamaꞌi e te ꞌati e tahi mahana?
I ruŋa i te Pipiria he ravaꞌa koe i te pāhono mau mo te ŋā ꞌui nei.
TE PIPIRIA E HĀPĪ RŌ ꞌĀ TE ꞌATUA HE AŊA I TE MEꞌE HOPEꞌA O TE RIVA-RIVA MO TE HENUA.
Te taŋata e ko korohuꞌa e te ŋā viꞌe e ko rūau, e ko ŋaroꞌa haka ꞌou te mamāe, e ꞌina e ko mate. (Revelación 21:4)
Te nuꞌu koke e te nuꞌu taꞌe haꞌere, he haꞌere haka ꞌou. (Isaías 35:6)
Te nuꞌu matakeva he tikeꞌa. (Isaías 35:5)
Te nuꞌu mate he ora haka ꞌou. (Juan 5:28, 29)
ꞌIna e tahi taŋata mo maiūi. (Isaías 33:24)
He ai te kai mo te taꞌatoꞌa ꞌe e ko maruaki. (Salmo 72:16)
KA HĀPĪ TE PIPIRIA MO RAVAꞌA I TE MEꞌE RIVA-RIVA
E ai rō ꞌā te taŋata e manaꞌu ena te meꞌe taiꞌo ena e koe i te kona raꞌe era, he moe vārua nō. Te ꞌAtua ko kī ꞌā ꞌina he mahana toe, nā Īa he haka ꞌāpī i te henua taꞌatoꞌa e i ruŋa i te Pipiria e kī ena pe hē ka aŋa ena.
Taꞌe ko te meꞌe nō nei te meꞌe kī e te Pipiria. I ruŋa e kī rō ꞌā pe hē tātou ana ravaꞌa te koa mau e pe hē ana riva-riva tātou ora iŋa i te hora nei. Ka haka topa rā tuꞌu manaꞌu o ruŋa i te ŋā ꞌati e haka tipa-tipa ena i a koe pahe moni kore, te ture i roto i te huaꞌai, te maiūi e te mate o te tātou nunaꞌa here. Te Pipiria he hāꞌūꞌū atu mo ꞌite pe hē koe ana haka tere i te hora o tuꞌu ꞌati e takoꞌa mo haka rehe tuꞌu mamāe hai pāhono atu i te ŋā ꞌui nei:
¿O te aha e piri mai ena te ꞌati?
¿Pe hē ana haka tere tātou mo piri mai o te ꞌati?
¿E riva rō mo koa te tātou huaꞌai?
¿He aha te meꞌe mo piri mai e mate nei tātou?
¿E tikeꞌa haka ꞌou rō i te tātou nunaꞌa here ko mate ꞌā?
¿O te aha tātou e ꞌite riva-riva nei te ꞌAtua he aŋa tahi tāꞌana meꞌe kī era e Īa mo aŋa?
Mo ai e taiꞌo ꞌā koe i te puka nei, nā koe e haka tikeꞌa ꞌā tuꞌu haŋa mo ꞌite he aha te meꞌe hāpī e te Pipiria. Mo te puka iti-iti nei e hāꞌūꞌū atu. E ai rō ꞌā te ꞌui i te hopeꞌa o te ŋā kupu vānaŋa nei, mo hāꞌūꞌū atu mo ata riva-riva tuꞌu aŋi-aŋi i te Puka o te ꞌAtua. Ko rahi ꞌā te taŋata i ruŋa i te henua e koa mai ena o te hāpī i te Pipiria i muri i te Taŋata Haka ꞌite o ruŋa o Iehoha. Ko haŋa ꞌā mātou mo koa takoꞌa ōꞌou. Mo te ꞌAtua e hāꞌūꞌū atu ka hāpī ka oho ena koe i te Pipiria.