Mo ai ko depresión ꞌā koe, ¿e riva rō te Pipiria mo hāꞌūꞌū atu?
Te meꞌe kī e te Pipiria
ꞌĒ-ē, ꞌi te meꞌe era i te ꞌAtua te pūai hopeꞌa o te riva-riva mo hāꞌūꞌū atu, “ꞌAtua, haka pūai i te nuꞌu ꞌina he haŋu toe” (2 Kōrinto 7:6).
¿Pē hē te ꞌAtua e hāꞌūꞌū era ki te nuꞌu māui-ui i te depresión?
He haka haŋu atu. Koite e ko haka kore i te ꞌati, te meꞌe nō, he haka haŋu atu mo haka ꞌuhu ōꞌou i te ꞌati (Fīripo 4:13). ꞌIna koe ko manaꞌu e ko haka roŋo a Ia i taꞌa pure, a Ia e haka roŋo riva-riva rō ꞌā i taꞌa pure, ꞌi te meꞌe era, ꞌi ruŋa i tāꞌana puka e kī rō ꞌā: “ꞌI muri i te taŋata ko rahi ꞌā te mamae o tōꞌona māhatu a Iehoha e noho ena ꞌe he haka haŋu i te taŋata manaꞌu ꞌina ōꞌona rāveꞌa toe” (Salmo 34:18). ꞌĀtā ki te hora era e ko eꞌa mai tuꞌu reꞌo mo no-noꞌi mo hāꞌūꞌū atu, e aŋi-aŋi nō ꞌā a Ia he aha taꞌa meꞌe haŋa āꞌau (Rōmano 8:26, 27).
He ꞌaꞌamu o te nūnaꞌa o te ꞌAtua o muꞌa ꞌā. Te kope e tahi o roto o te taŋata pāpaꞌi era i te Pipiria ꞌi te hora era ko depresión ꞌā, mai roto i te kona hopeꞌa o te mamae o roto o tōꞌona māhatu i pure ai ki te ꞌAtua. ¿Pē hē te ꞌAtua i hāꞌūꞌū ai ki nei kope? Hai haka topa a ia i te manaꞌu pē nei ē, ꞌina he ꞌAtua he tuhi he oho i te hara, ꞌo ira i kī ai: “ꞌĀhani e tataku tahi rō ꞌana koe i te mātou hara, ¿ko ai te kope mo tano ki tuꞌu mata? O te haka rehu ōꞌou i te mātou hara a mātou e haŋa nei mo moꞌa atu i a koe” (Salmo 130:1, 3, 4).
He rāveꞌa riva-riva e tahi. Taꞌe ꞌi te hora nō nei te ꞌAtua e hāꞌūꞌū mai ena. Nā e tuꞌu rō te mahana he haka kore tahi e Ia i te mamae ꞌe i te depresión. Te Pipiria e kī rō ꞌā “te meꞌe o tuꞌu ꞌā, [pa he māui-ui ena he depresión] ꞌina e ko manaꞌu haka ꞌou ꞌe e ko haka mamae i te māhatu” (Isaías 65:17).
Mo haka ꞌite atu: te taŋata haka ꞌite o ruŋa o Iehoha ko aŋi-aŋi riva-riva ꞌā e hāꞌūꞌū rō mai ꞌā e te ꞌAtua, no atu rā meꞌe, e oho rō ꞌā ki te taote i te hora e māui-ui era, pa he māui-ui era he depresión (Marko 2:17). ꞌIna mātou he kī ko raꞌau hē te raꞌau mo unu o te taŋata. Taꞌatoꞌa taŋata mo rāua ꞌā e uꞌi he aha-he aha te meꞌe o rāua mo uꞌi mo haka kore i te māui-ui.