TE MEꞌE HAŊA MO ꞌITE E TE TAŊA ꞌĀPĪ
¿Pē hē te Pipiria e hāꞌūꞌū mai ena? Te meꞌe 1: ka taiꞌo ꞌe ka māhani i taꞌa Pipiria
“ꞌI haꞌamata i taiꞌo era a au i te Pipiria, ꞌi te roa-roa, he haꞌumani au” (Briana, 15 matahiti).
ꞌE a koe, ¿e haꞌumani takoꞌa rō ꞌā mo taiꞌo? Mo ai pē ira, ka taiꞌo te meꞌe nei.
¿He aha te hauhaꞌa mo ravaꞌa mo taiꞌo i te Pipiria?
¿E haꞌumani rō ꞌā koe mo taiꞌo i te Pipiria? Mo ai pē ira, taꞌe ko koe nō. Koiꞌite he manaꞌu koe, ꞌi te roa-roa o te puka nei mo taiꞌo, i te ꞌiti-ꞌiti o te tiꞌaraꞌa ꞌe o te ai ꞌina he hohoꞌa o ruŋa, he haꞌumani koe. ¡Taꞌe paꞌi pa he meꞌe ena e mataꞌitaꞌi ꞌā koe i te terevisione ꞌo i te video!
Ka manaꞌu rā koe ꞌi te hora nei: mo ravaꞌa koe i te avahata ꞌi roto te taoꞌa, ¡he pohe koe mo mātaki rō ꞌai!
Pē ira ꞌā te Pipiria, ꞌi ruŋa koe ka ravaꞌa ena te taoꞌa nui-nui e tahi, ¿ko taoꞌa, ko hauhaꞌa hē? ꞌI ruŋa koe ka ravaꞌa era i te mārama-rama o te ꞌAtua ka hāꞌūꞌū atu era:
Mo haka tere riva-riva ōꞌou
Mo taꞌe riri ōꞌou ki tuꞌu matuꞌa
Mo ravaꞌa i te repahoa riva-riva
Mo taꞌe tipa-tipa rahi tuꞌu manaꞌu
¿Pē hē ia te puka tuai e tahi ana hāꞌūꞌū mai ꞌi ꞌaŋanīrā? ꞌI te meꞌe era te puka nei taꞌe he puka tuai nō e tahi, te meꞌe pāpaꞌi ꞌi ruŋa, he “meꞌe haka ꞌite mai e te ꞌAtua” (2 Timoteo 3:16). Te haꞌaauraꞌa o te vānaŋa nei, te roŋo pāpaꞌi era ꞌi ruŋa i te Pipiria, mai te kope hopeꞌa era o te nui-nui o te ao taꞌatoꞌa i oho mai ai.
Te Pipiria ko tuꞌu ꞌā pa he avahata ꞌi roto te taoꞌa: he hauhaꞌa ꞌe he mārama-rama o te ꞌAtua.
¿Pē hē ana taiꞌo i te Pipiria?
1. Mai te haꞌamata ki te hopeꞌa. Mo taiꞌo ōꞌou mai te haꞌamata, he aŋi-aŋi riva-riva koe o ruŋa i te aha e vānaŋa ena ꞌe he aha te tumu mau o te Pipiria. E ai rō ꞌā e rua rāveꞌa mo taiꞌo ōꞌou pē nei:
E riva nō koe mo taiꞌo i te 66 puka ꞌiti-ꞌiti, mai te puka raꞌe era ko Génesis ki te puka hopeꞌa ko Meꞌe Haka Takeꞌa (Apocalipsis).
E riva nō koe mo taiꞌo cronológicamente, te haꞌaauraꞌa, mai te ꞌaꞌamu tuai raꞌe era ꞌātā ki te ꞌaꞌamu hopeꞌa.
Mo ꞌite ōꞌou: ꞌI te kona 4-A o te puka Guía para el estudio de la Palabra de Dios he ravaꞌa koe i te ꞌaꞌamu o ruŋa o Ietū haka tano-tano era mai tōꞌona hora poreko ki tōꞌona mate haŋa.
2. E ꞌati ena koe, ka taiꞌo hai ꞌaꞌamu mo hāꞌūꞌū atu ꞌi rā ꞌati. Mo haꞌaauraꞌa atu:
¿Ko haŋa ꞌā koe mo ravaꞌa i te repahoa riva-riva mōꞌou? Ka taiꞌo te ꞌaꞌamu o Tāvita rāua ko Jonatán (1 Samuel, kau 18 ki te 20). Ki oti, ka oho ki te kona e kī era “Cómo encontrar amigos de verdad”, mo aŋi-aŋi he aha taꞌa meꞌe mo hāpī mai ruŋa i te ꞌaꞌamu nei.
¿Haŋa rō koe mo hio-hio tuꞌu fe mo te hora ka haka ꞌatu era i a koe? E riva nō koe mo taiꞌo te ꞌaꞌamu o José mo hāpī he aha tāꞌana meꞌe i aŋa ꞌi te hora i haka ꞌatu era i a ia (Génesis, kau 39). Ki oti ka oho ki te kona e kī era “Cómo resistir las tentaciones” ꞌe i te kona “Acusado falsamente”, ꞌi ruŋa koe ka ravaꞌa ena te roŋo mo hāꞌūꞌū atu.
¿Haŋa rō koe mo ꞌite pē hē te pure ana hāꞌūꞌū atu? Ka taiꞌo te ꞌaꞌamu o Nehemías (Nehemías, kau 2). Ki oti ka oho ki te kona e kī era “Jehová contestó su oración” mo ꞌata aŋi-aŋi o ruŋa i te ꞌaꞌamu nei.
Mo ꞌite ōꞌou: Ka taiꞌo ena koe i te Pipiria, ka kimi te kona pōŋeha kore mo haka topa riva-riva tuꞌu manaꞌu o ruŋa i te meꞌe ka taiꞌo era.
3. Ka taiꞌo ꞌi ruŋa i te Pipiria i te ꞌaꞌamu e tahi ꞌo i te salmo e tahi ꞌe ki oti, ka haka topa tuꞌu manaꞌu mo aŋi-aŋi pē hē rā meꞌe taiꞌo era ana hāꞌūꞌū atu. Ki oti te taiꞌo ka haka topa tuꞌu manaꞌu o ruŋa i te ŋā meꞌe nei:
¿ꞌO te aha a Iehoha i haka pāpaꞌi ai te ŋā vānaŋa nei ꞌi ruŋa i te Pipiria?
¿He aha tāꞌaku meꞌe mo hāpī o ruŋa o Iehoha mai te meꞌe taiꞌo nei?
¿Pē hē te meꞌe taiꞌo iho nei ana hāꞌūꞌū mai?
Mo ꞌite ōꞌou: ꞌI roto i te mātou kona o roto o te Internet, he ravaꞌa koe i te meꞌe ka hāꞌūꞌū atu era mo taiꞌo i te Pipiria, ꞌi te kona e kī era “Programa de lectura de la Biblia”. ꞌI ruŋa i nei kona, e riva nō koe mo pāpaꞌi a hē koe ka haꞌamata te taiꞌo.