¿He meꞌe tano mau ꞌā mo pure ki te meꞌe tarai e te taŋata ꞌe ki te hohoꞌa?

Te pāhono o te Pipiria

ꞌIna. Te Pipiria e kī rō ꞌā ki te ꞌAtua mau nō ana pure hai ꞌīŋoa o Ietū. Pē nei a Ietū i kī ai ki tāꞌana pukuraŋa: “Pē nei ana pure: e te Matuꞌa o mātou o te raŋi ē, te meꞌe haŋa he moꞌa o te taŋata taꞌatoꞌa i tuꞌu ꞌīŋoa” (Māteo 6:9, He Vānaŋa o te ꞌAtua). ꞌIna a Ietū kai kī mo pure ki te hohoꞌa, ki te merahi o ki te meꞌe tarai e te taŋata. Pē ira ꞌā, kai kī mo pure ki te kope haka ꞌou e tahi mo ai taꞌe ko te ꞌAtua.

A Ietū i kī takoꞌa rō ki tāꞌana nuꞌu hāpī: “Ko au te ara, te parautiꞌa ꞌe te ora iŋa. Hai au nō te taŋata e riva ena mo hāhine ki te Matuꞌa” (Iovani 14:6, He huri iŋa o te ao ꞌāpī). E pure ꞌā tātou ki a Iehoha, hai ꞌīŋoa o Ietū ana pure, ꞌi te meꞌe era ki a ia i vaꞌai ai te parau mo hāhine ki te ꞌAtua (ꞌEvereo 7:25).

¿E riva rō mo pure ki te ꞌAtua ꞌe pē ira ꞌā ki te tahi atu meꞌe?

ꞌI ruŋa i te roŋo pāpaꞌi era e Mōtē, e kī rō ꞌā pē nei ē, te ꞌAtua e mākota rō ꞌā mo haꞌamuri ōꞌou ki tētahi (Éxodo 20:5, BA). ¿He aha te meꞌe haŋa mo haꞌaauraꞌa mai te vānaŋa ena he mākota o te ꞌAtua? ꞌI ruŋa i te Biblia de América e kī rō ꞌā ꞌina e tahi meꞌe tarai e te taŋata mo mono i te ꞌAtua mau. Ko uŋa mai ꞌā e te ꞌAtua mo haꞌamuri ki a ia mau nō ꞌe pē ira ꞌā, ki a ia mau nō ana pure, ꞌo te ai te pure he meꞌe e tahi mo haꞌamuri ki te ꞌAtua (Isaías 48:11).

Mo pure ki te merahi ꞌe ki tētahi atu meꞌe, e taꞌe ki te ꞌAtua, he mamae tōꞌona māhatu. ꞌI te hora tū-turi era Iovani mo haꞌamuri ki te merahi e tahi, he haka noho e te merahi ꞌe he kī: “ꞌIna koe ko aŋa i te meꞌe ena, ki te ꞌAtua koe ana haꞌamuri. He tāvini nō, paꞌi, a au o te ꞌAtua pē koe ꞌe pē tuꞌu ŋā taina era, nuꞌu taꞌe haka tapa mai te hāpī parautiꞌa haka ꞌite e Ietū” (Meꞌe Haka Takeꞌa 19:10, He Vānaŋa o te ꞌAtua).