KAU 16
Ka haka tikeꞌa tuꞌu here ki te ꞌAtua
Mo hāpaꞌo tuꞌu ŋaruhoa, e vānaŋa koe ki a īa. E haka roŋo koe ki a īa, e a īa he haka roŋo takoꞌa atu. Peira ꞌā he vānaŋa riva-riva koe o ruŋa i a īa ki te tahi taŋata. Pe nei meꞌe a koe ana aŋa mo hāpaꞌo tuꞌu hoꞌou ki te ꞌAtua. Ki uꞌi pe hē e kī ena te Puka o te ꞌAtua o ruŋa i te vānaŋa nei:
E pure ki a Iehoha paurō te mahana. “E pure e oho kōrua”. (Romanos 12:12.)
E taiꞌo te Puka o te ꞌAtua. “Taꞌatoꞌa Vānaŋa pāpaꞌi mai te manaꞌu o te ꞌAtua i topa mai ai, he riva mo hāpī, mo haka aŋi-aŋi te hape, mo haka tītika tahi te meꞌe.” (2 Timoteo 3:16.)
E hāpī ki te tahi o ruŋa i te ꞌAtua. “Ka oho ka hāpī ki te taŋata o te kaiŋa taꞌatoꞌa mo riro he pukuraŋa [...] e hāpī ki a rāua mo haka roŋo tahi te meꞌe uŋa atu era e au”. (Mateo 28:19, 20.)
E haka hāhine koe ki te ŋaruhoa o te ꞌAtua. “Te kope haꞌere i muri o te taŋata māramarama, he riro he taŋata māramarama”. (Proverbios 13:20.)
E oho e haka roŋo te tātara i te Koro Paina Piri. “E hāꞌūꞌū i roto i a tātou ꞌā, mo ata here ꞌe mo aŋa i te aŋa riva-riva [...] mo haka hio-hio i a tātou ꞌā”. (Hebreos 10:24, 25.)
E hāꞌūꞌū i te aŋa o te Haka tere o te ꞌAtua. “E tahi e tahi o kōrua ꞌā e vaꞌai te meꞌe manaꞌu era i roto i tōꞌona māhatu, taꞌe hai pātoꞌi ꞌe taꞌe hai taꞌe haŋa, o te ai e here rō ꞌā te ꞌAtua ki te kope vaꞌai hai koa”. (2 Corintios 9:7.)