HĀPĪ 8
Te meꞌe mo aŋa mo piri atu te ꞌati
“Nā kōrua e koa rahi mai ena, no atu te haka mamāe i a kōrua hai rauhuru ꞌati i te hora iti-iti nō e tahi.” (1 Pedro 1:6)
No atu te meꞌe o kōrua mo aŋa mo koa te kōrua huaꞌai e te kōrua haīpoīpo, nā e tano rō te mahana he piri atu te ꞌati, e he haka mamāe i tuꞌu mahatu (Eclesiastés 9:11). Te ꞌAtua e haꞌūꞌū rō mai ꞌā i te hora era ko ꞌati ꞌā tātou. Mo haka tere koe e takoꞌa tuꞌu huaꞌai, hai roŋo o te Puka o te ꞌAtua ka tuhi ka oho atu ena, he riva kōrua mo haka ꞌuhu i te ꞌati hopeꞌa era o te nui-nui mo piri atu.
1 KA HAꞌATIꞌA MO HAꞌŪꞌŪ ATU E IEHOHA
TE MEꞌE KĪ E TE PUKA O TE ꞌATUA: “Ka hoa tahi ki a Īa te meꞌe e haka tipa-tipa ena i a kōrua, o te ai a Īa e tapa rō ꞌā i a kōrua” (1 Pedro 5:7). E uꞌi o rehu rō, taꞌe o te ꞌAtua te uŋa mai te ꞌati (Santiago 1:13). Mo hahine koe ki a Īa, he haꞌūꞌū atu hai huru hopeꞌa era o te riva moꞌou (Isaías 41:10). “I muꞌa i a Īa ana mataki te kōrua mahatu.” (Salmo 62:8.)
Te meꞌe takoꞌa mo haꞌūꞌū atu, he taiꞌo e he hāpī i te Puka o te ꞌAtua paurō te mahana. Mo aŋa peira, he aŋi-aŋi koe he parautīꞌa mau ꞌā pe nei ē, a Iehoha e haꞌūꞌū rō atu ꞌā i te taꞌatoꞌa ꞌati (2 Corintios 1:3, 4; Romanos 15:4). Ko kī ꞌā e te ꞌAtua, maꞌana e vaꞌai atu te haumarū, ata nui-nui era ki te taꞌatoꞌa manaꞌu, mo hapaꞌo te kōrua mahatu (Filipenses 4:6, 7, 13).
TAꞌA MEꞌE MO AŊA:
Ka nonoꞌi ki a Iehoha mo haꞌūꞌū atu mo taꞌe tipa-tipa ꞌoꞌou e mo manaꞌu riva-riva takoꞌa
Ka uꞌi riva-riva te meꞌe taꞌatoꞌa e manaꞌu era e koe mo aŋa, e ka aŋa te meꞌe tano era mo aŋa
2 KA HAPAꞌO I TUꞌU HUAꞌAI E I A KOE TAKOꞌA
TE MEꞌE KĪ E TE PUKA O TE ꞌATUA: “Te mahatu o te kope ꞌite, he maꞌa toꞌona aŋi-aŋi e te tariŋa o te nuꞌu maramarama, te meꞌe haŋa, he ravaꞌa te ꞌite” (Proverbios 18:15). ¿He aha te meꞌe haŋa o taꞌa ŋā poki e o taꞌa viꞌe? E uꞌi riva-riva he aha te meꞌe haŋa mau o rāua. Ka vānaŋa ki a rāua. Ka haka roŋo ki a rāua (Proverbios 20:5).
¿E mo ai ko mate ꞌā e tahi nunaꞌa here ꞌoꞌou? ꞌIna ko haꞌamā mo ai ko haŋa ꞌā koe mo taŋi. Ka manaꞌu rā, a Ietū i taŋi takoꞌa rō (Juan 11:35; Eclesiastés 3:4). Mo haka ora e mo haūru koe, he meꞌe tano mo aŋa takoꞌa (Eclesiastés 4:6). Mo aŋa koe peira, he haꞌūꞌū atu mo haka rehe te mamāe i roto i a koe.
TAꞌA MEꞌE MO AŊA:
Ka haka mahani i a koe mo vānaŋa koīa ko tuꞌu huaꞌai raꞌe ki te piri atu te ꞌati, mo aŋa peira, ka ꞌati ena kōrua, e ko aŋa rahi mo vānaŋa o ruŋa o nei meꞌe
E ꞌui ki te rua taŋata i ꞌati ai pē koe, mo ꞌite he aha taꞌana meꞌe i aŋa
3 KA KIMI TE TAŊATA MO HAꞌŪꞌŪ ATU
TE MEꞌE KĪ E TE PUKA O TE ꞌATUA: “Te repahoa parautīꞌa e here rō ꞌā i te taꞌatoꞌa hora e he taina poreko i te hora ꞌati ꞌoꞌou” (Proverbios 17:17). Tuꞌu repahoa e haŋa rō ꞌā mo haꞌūꞌū atu, e peaha ꞌina kai ꞌite pe hē ana aŋa. Ka kī he aha taꞌa meꞌe haŋa mo haꞌūꞌū atu e rāua (Proverbios 12:25). Peira ꞌā, ka hahine koe ki te ꞌAtua, hai kimi i te taŋata hāpī i te Puka o te ꞌAtua. Mo te meꞌe ka hāpī ena e koe mai ruŋa i te Puka o te ꞌAtua e haꞌūꞌū atu (Santiago 5:14).
Te rua raveꞌa mo haꞌūꞌū atu e piri e oho ki te taŋata e ai era te rāua fe ki te ꞌAtua, e takoꞌa ki taꞌana vānaŋa. Te meꞌe mo haꞌūꞌū takoꞌa atu mo rehe tuꞌu mamāe, e haꞌūꞌū ki te nuꞌu era ko horiŋa ꞌā. Ka vānaŋa ki a rāua o ruŋa i tuꞌu fe ki a Iehoha e o ruŋa i te raveꞌa kī era e Īa ki te taŋata. E haꞌūꞌū e oho ki te rua, e ꞌina ko haꞌataꞌa mai te nuꞌu e here rō atu ꞌā, e takoꞌa e tapa rō atu ꞌā i a koe (Proverbios 18:1; 1 Corintios 15:58).
TAꞌA MEꞌE MO AŊA:
Ka vānaŋa koe ki te repahoa ata hahine atu era ki a koe e ka haka rē mo haꞌūꞌū takoꞌa atu
E kī riva-riva he aha taꞌa meꞌe haŋa era e ꞌina ko haꞌamā