Penei kua patoiia koe e toou uaorai ngutuare e te kopu tangata me kore kua akamutu koe i te kimi puapinga i te pae moni kia tuku i te Patireia o te Atua na mua i roto i toou oraanga. (Mata. 6:33) Me koia ïa, e mea papu kua kite a Iehova i taau angaanga meitaki i rave nona. (Ebe. 6:10) Penei kua rongo ana koe i ta Iesu i tuatua: “Kare e tangata i akaruke i te are, e te au taeake, e te au tuaine, e te metua tane, e te metua vaine, e te vaine, e te tamariki, e te kainga, noku, e no te evangelia nei, E kore ei e rauka iaia e anere ua atu, i teianei ao, te are, te taeake, e te tuaine, te metua vaine, e te tamariki, e te kainga oki, ma te takinga-kinoia; e i te ao a muri nei, ko te ora mutu kore ïa.” (Mare. 10:​29, 30) Ae, e maata atu te au akameitakianga taau i rauka mai i taau i akaatinga.—Sala. 37:4. w24.03 9 ¶5

Te tupu anga te onge maata ki te au Kerititiano i Iuda, ‘kua akakoro te putuputuanga i Anetioka te akau i te apinga, e tau iaia uaorai, ei turu atu i te au taeake i noo i Iudea ra.’ (Anga. 11:​27-30) Noatu e mamao te ngai i noo ei te au taeake tei ongeia, kua akakoro te au Kerititiano i Anetioka te tauturu ia ratou. (1 Ioa. 3:​17, 18) Ka akaari tatou i te tu tangi aroa i teianei me kua rokoia te au taeake akamori e tetai tumatetenga. Ka tauturu viviki tatou—penei na te pati anga ki te aronga pakari kia tauturu atu tatou, na te oake anga i te moni tauturu ki te angaanga i te ao katoa, me kore te pure anga no te au taeake tei rokoia e te tumatetenga. Penei ka anoano tauturu katoa te au taeake e te au tuaine i te au mea o te oraanga. Me tae mai to tatou Ariki, ko Iesu Karaiti, no te akava i te tangata, kia kite mai aia ia tatou e tangi aroa ra e ka pati mai ia tatou kia “noo ki te basileia.”—Mata. 25:​34-40. w23.07 4 ¶9-10; 6 ¶12

Kua aru a Iesu i to Iehova manako maru. Kua tonoia mai aia ki te enua nei kia tutu aere “ki te au mamoe i ngaro i te ngutuare o Iseraela.” Inara kua akaari mai aia i te manako maru na te rave anga i tana angaanga. I tetai atianga, kua pati tetai vaine kare i te ngati Iseraela kia rapakau i tana tamaine tei ‘mate i tetai demoni.’ Kua rave a Iesu ma te aroa i ta te vaine i pati mai e kua akaora i tana tamaine. (Mata. 15:​21-28) Akamanako ana i tetai akaraanga. I te akamataanga o tana angaanga tutu aere, kua akakite a Iesu: “Kareka te uuna iaku . . . , e uuna katoa au iaia.” (Mata. 10:33) Inara kua uuna ainei aia ia Petero, tei pikikaa iaia e toru taime? Kare. Kua kite a Iesu i to Petero akarongo e te tataraara. Muri ake te akatuakaou anga, kua aere mai aia kia Petero e kua akapapu atu kiaia i tona aroa e te akakore anga i tana ara. (Luka 24:​33, 34) E manako maru to te Atua ko Iehova raua ko Iesu Karaiti. Akapeea ra tatou? Inangaro a Iehova kia akaari katoa tatou i te manako maru. w23.07 21 ¶6-7