Akt bann zapot

17 Banna la pas par Anfipolis é Apolonia é zot la ariv Tésalonik, ousa bann Juif lavé in sinagog. 2 Kom li lavé labitud fé, Pol la rant dann sinagog, é pandan troi saba li la fé réfléchi banna su Lèkritur. 3 Pou èsplik é pou prouv ké lo Kris té doi soufèr é ké li té doi résusité, Pol té ansèrv bann pasaj Lékritur, é li té di : « Jézu-la ké mi fé konèt azot, ali mèm lo Kris. » 4 Alor détroi an parmi banna la vni kroiyan é la rozoinn Pol èk Silas. É navé osi in bonpé Grèk ké té ador Bondié èk bonpé madam bien plasé dan la sosiété la rozoinn banna. 11 Bann Juif la vil Béré lavé bann santiman pli méyèr ké sak i sort Tésalonik, parské banna lété vréman présé aksèp la parol, zot la étudié èk sèrié bann Lèkritur chak jour pou èt sur ké tout sak lavé di azot lété vré. 16 Kan Pol té pou atand banna dan la vil Atèn, la agas ali kan li la vu ké la vil té ranpli èk zidol. 17 Alor li la komans koz avèk bann Juif ké té dan la sinagog é avèk lé zot moun ké té ador Bondié osi é li la fé réfléchi azot, é tou lé jour li la fé parèy avèk tout sak té la su plas publik osi. 21 Lé vré, tout bann Zaténien, é bann zétranjé ké té rès in tan tèr-la, té ansèrv tout zot tan lib pou rakont ou ékout bann nouvo zafèr. 22 Pol la dobout dann milié Laréopaj é li la di banna : « Azot domoun Atèn, moin la romarké ké dan tout zafèr, néna lèr zot néna in gran rèspé pou bann bondié é sa plis ké dot. 23 Par égzanp, alor ké mi té pou bat karé dan la vil é mi té antrinn bien gard zot bann zidol pou ladorasion, ma la vu osi in lotèl ousa té ékri : “Pou in Bondié nou koné pa”. Sak zot i sèrv san konèt kisa i lé, sé li mèm mi vien fé konèt azot. 24 Le Bondieu ke la fé le monn é tout bann zafèr néna dedan, ali ke lé Sénieur le sièl é la tèr, i abit pa dan bann tanp fé avèk la min. 25 Li lé pa sèrvi par la min bann zumin, komsi li lavé bezoin kékchoz, parske sé li ki donn tout domoun la vi é le souf é tout zafèr. 26 Li la ansèrv in sèl bonom pou kré tout bann nasion pou ké zot i abit su tout la tèr. 27 pou ké zot i rod Bondié é ké zot i trouv ali vréman, mèm si pou sa zot i tat-tat in pé partou, parské an vré li lé pa loin chakèn an parmi nou. 28 An vré sé gras ali si nou viv, si nou bouj é si nou égzis, kom détroi an parmi zot bann poèt la bien di : “Parské nou lé son bann zanfan osi.” 29 « É donk, kom nou lé bann zanfan Bondieu, nou doi pa pansé ke Bondieu i resanm in zobjé an or, an larjan ou an galé, kékchoz fé èk la min é i sort dann limajinasion bann domoun. 30 Lé vré, dann tan lontan, Bondié la pa fé in kont kan domoun té koné pa, mé astèr li fé konèt tout domoun é sa partou ké zot i doi ropant azot, 34 Mé désèrtin la rozoinn ali é la vni kroiyan. An parmi, navé Dénis lo juj tribunal Laréopaj, in madam i apèl Damaris èk dot ankor.