1 Pièr

3 Lé parèy, azot madam, i fo zot i soumèt azot a zot mari, komsa si désèrtin i obéi pa la parol Bondié, san kozé, banna lé touché gras lo konportman zot madam, 2 parské banna nora vu zot konduit pur é plin rèspé. 3 Fodré pa ké zot boté lé an déor — chevé trésé, bijou an or oubien joli linj—, 4 mé i fodré ké zot boté lé lo moun anndan lo kèr, kan zot lé dou é trankil é sa néna in gran valèr dovan Bondié. 5 Parské sé komsa ké lontan, bann fanm pur ké té mèt zot lèspoir an Bondié, té rand azot joli, azot ké té obéi zot bann mari. 7 Parèy azot osi bann mari, kontinié viv èk zot madam, konpran banna. Done zot madam lonèr kom si té in vaz pli frajil, lo vaz lo madam, parské banna osi parèy ké zot la érit la vi gras la favèr imérité, komsa na poin rien va anbar zot priyèr. 8 Pou fini, ké zot tout lé uni dan lo mèm pansé, ké zot i souf kan lé zot i souf, ké zot néna lamour pou bann frèr é sèr, la pitié èk plin d’tandrès é pran pa zot su la otèr. 12 Parské lo zié Jéova lé dési bann moun jus, é son zorèy i ékout kan zot i ansipli ali, mé la figur Jéova lé kont sak i fé bann mové zafèr. 14 É mèm si zot i souf pou la justis, zot lé éré. Sèlman sa-la, fo pa sak i fé pèr banna i fé pèr azot osi, fo pa sa i trakas azot non pli. 15 Mé rand sin lo Kris kom Ségnèr dan zot kèr, toultan paré pou gingn défand zot foi èk sak i domand azot poukosa zot i kroi sa ; sèlman fé sa avèk dousèr é in gran rèspé. 18 Lé vré, Kris lé mor in foi pou tout pou bann péché, in jus pou bann zinjus, pou k’i amèn azot juska Bondié. La mèt ali a mor dan la chèr, mé la fé roviv ali dan lèspri. 21 Sak la èspasé la lé parèy pou lo batèm, koméla osi lo batèm i sov azot. Li tir pa la salté dési lo kor, mé li lé in domand anvèr Bondié pou gingn in konsians klèr, é li sov gras la rézuréksion Jézu Kris. 22 Sadla lé a droit Bondié, parské li la mont dann sièl, é la done ali dominans su bann zanj é bann zotorité é bann puisans.