Égzod
11 In jour, alor ké li té fine gran, Moiz la parti koté son bann frèr é li la vu bann travay difisil banna té doi fé. Li la vu osi in Léjipsien antrinn sabouk inn son bann frèr Ébré. 12 Alor, li la rogard otour d’li, é kom li té oi pa pèrsone, li la tué Léjipsien é la kachièt ali dan la sab. 13 Landmin matin, li la sorti é li la trouv dé bonom ébré lapou batay. Li la di èk sak lavé tor : « Poukosa ou tap out kamarad ? » 14 Mé lo bonom la répond : « Kisa la mèt aou kom prins é juj su nou ? Èské ou vé tué amoin kom ou la tué Léjipsien ? » Alor Moiz la gingn la tranblad é li la di dan son kèr : « Donk, tout domoun i koné lo zafèr ! » 15 Plitar, Faraon la aprann sak la èspasé é la rod pou tué Moiz. Mé Moiz la sov loin dovan Faraon é li la parti dann péi Madian pou abit laba. In foi li la ariv laba, li la asiz koté in trou ousa i tir dolo. 16 Lo prèt Madian lavé sèt fi. Banna lé vnu trap dolo, é ranpli bann rézèrvoir pou fé boir bann ti zanimo zot papa. 17 Mé, kom dabitid, bann gardien mouton lé vnu poursuiv azot. Alor, Moiz la tienbo dobout, li lé vnu èd lo bann madam é li la done dolo bann ti zanimo pou boir. 18 Kan banna la artourn ché zot papa, Réouèl, li la rès bèt é li la domand azot : « Akoz zot i rant bonèr komsa jordi ? » 19 Banna la répond : « In Léjipsien la protèj anou kont bann gardien mouton. Li la mèm trap dolo pou nou é la done bann ti zanimo pou boir. » 20 Alor li la di èk son bann fi : « Mé ousa bonom la i lé ? Akoz zot la lès ali laba ? Alé kri ali komsa li manj ansanm nou. » 21 Aprésa, Moiz la aksèp abit la kaz Réouèl. É Réouèl la done ali Séfora kom madam. 22 Plitar, èl la akouch in garson, é Moiz la apèl ali Gèrchom, parské, li di, « moin lé dévnu in labitan étranjé dan in péi étranjé ». 23 Lontan aprésa, lo roi Léjip lé mor. Mé bann Zisraélit la kontinié kriyé é souplingn azot akoz lèsklavaj, é zot kri o sokour la mont juska lo vré Bondié. 24 Pou fini, Bondié la antand zot bann plint é li la rapèl ali lakor li lavé pasé avèk Abraam, Izaak èk Jakob. 25 Alor, Bondié la vu la situasion bann Zisarélit é la pran pitié d’zot.