1 Tésalonisien

2 Kom zot i koné, mèm si dann promié débu nou la ansoufèr é ké dan la vil Filip, la maltrèt anou san rèspé, nout Bondié li la èd anou tienbo lo kèr pou anons azot lo gayar nouvèl Bondié mèm si domoun té drès kont nou. 7 Olèrksa, nou lé devnu janti anparmi zot, kom in momon i donn tété son bann zanfan é i okup de zot èk tandrès. 8 Alor, kom nou èm azot èk tandrès, nou té bien désidé fé konèt azot lo gayar nouvèl Bondié, mé osi done azot nout vi, tèlman zot lavé in gran valèr pou nou. 13 Ala poukosa osi, nou romèrsi toultan Bondié, parské, kan zot la gingn la parol Bondié ké nou té i anons azot, zot la aksèp ali, pa kom la parol bann domoun, mé kom sak li lé vréman : la parol Bondié, k’i fé vréman in travay su zot, bann kroiyan. 17 Frèr, kan nou té séparé d’zot pou inn ti moman (jus par lo kor, mé pa èk lo kèr), tèlman nou lavé anvi oir azot, nou la fé tout nout posib pou sa. 18 Nou té vé vni koté ché zot ; oui amoin, Pol, ma la ésèy in foi é mèm dé foi, mé Satan la bar nout chemin. 19 Kosa i lé nout lèspérans, oubien nout joi, ou sinon lo kourone ké nou utiliz pou done anou la gloir dovan nout Ségnèr Jézu pandan son prézans ? Èské sé pa zot anfin d’kont ?