Akt bann zapot

15 Mé détroi bonom ké té i sort koté Judé laba, la komans di bann frèr : « Si zot i fé pa sirkonsi azot kom la koutum Moiz i vé, zot sra pa sové. » 2 Mé Pol èk Barnabé té pa dutou dakor èk banna é lavé in gro ralé-pousé ant zot. Donk la désid ké Pol, Barnabé èk dot ankor i mont Jéruzalèm pou koz ladsi èk bann zapot é bann zansien. 3 Lasanblé la fé in bout chemin èk zot, aprésa banna la pas par la Fénisi èk la Samari, é la zot la profité pou rakont dann détay koman domoun dot nasion lavé chanj rolijion é tout bann frèr té vréman kontan antand sa. 6 Donk bann zapot èk bann zansien la rotrouv azot pou koz ladsi. 10 Donk akoz astèr zot i tès Bondié kan zot i oblij bann disip port su zot kou in joug ké nout bann zansèt èk nou mèm la pa gingn porté ? 12 Alor tout lo group la pu kozé, é zot la ékout Barnabé é Pol rakont koman Bondié lavé ansèrv azot pou fé bann sign é bann mirak an parmi bann nasion. 13 Kan zot lavé fini, Jak la pran la parol é la di: « Mon bann frèr, ékout amoin. 14 Simon la rakont an détay koman, pou lo promié foi, Bondié la okip ali bann nasion pou tir an parmi zot in pèp pou son non. 15 É sa i akord èk parol bann profèt ; an vré, lé ékri : 16 « Apré bann zafèr la, mi va rotourné é mi va romont la tant David ké la tonbé ; mi va rokonstrui tout sak lé kasé é mi va aranj ali. 17 pou ké bann domoun k’i rès é domoun tout nasion, i rod vréman Jéova, zot va port mon non, sé Jéova i di, sé li ké va réaliz bann zafèr la 18 k’i koné dépi dann tan pasé. » 22 Lèr-la bann zapot èk bann zansien èk tout lasanblé la désid anvoy désèrtin bonom ké zot lavé choizi an parmi lasanblé èk Pol é Barnabé pou alé Antioch. Zot la anvoy dé bonom ké lété bann rèsponsab an parmi bann frèr. Lavé Juda, ké té apèl Barsabas, èk Silas. 23 Ala sak néna dan la lèt banna la doné : « Anou, bann zapot èk bann zansien, nou ékri azot, bann frèr Antioch, Siri èk Silisi k’i sort dann bann nasion : Adié zot tout ! 24 Nou la aprann ké néna détroi an parmi nou, la di bann zafèr la fatig zot lèspri, la ésèy fé tonb azot, alor ké nou la pa done azot bann zinstruksion. 25 Donk, nout tout la tonb dakor é nou la désid choizi bann bonom pou anvoy pou zot avèk Barnabé é Pol, ké nou èm bien, 26 ké lé paré pou done zot vi pou lo non nout Ségnèr Jézu Kris. 27 Donk, nou anvoy Juda èk Silas, komsa azot osi i anons azot lo mèm zafèr an parol. 28 Parské lèspri sin é nou mèm la désid pa rajout azot dot fardo apark bann zafèr la ké lé inportan : 29 ké zot i rofuz bann zafèr ké lé sakrifié pou bann fo bondié, lo san, sak lé toufé é bann péché sèksuèl. Si zot i rofuz atoupri bann zafèr-la, tout va bien èspasé pou zot. Pran soin d’zot ! » 30 Alor, bann zom la, la parti é la désand Antioch. La, zot la rasanm tout lo group é la done azot la lèt. 31 Kan zot té fine lir lèt-la, lankourajman-la la done azot in gran kontantman. 36 Détroi jour aprè, Pol la di èk Barnabé : « Astèr alon artourn dan tout bann vil ousa nou la prèch la parol Jéova pou oir si nout bann frèr lé bien. » 39 Alor zot la mèt azot dan in gran kolèr, é zot la kit azot inn é lot. Barnabé la amèn Mark èk li é la anbark pou la vil Chip. 41 Li la pas par la Siri èk la Silisi, é la li la rand pli for bann lasanblé.