Éklézias

3 Néna in tan pou tout zafèr, in tan pou tout sak lé fé sou lo sièl : 2 in tan pou nèt é in tan pou mor, in tan pou planté é in tan pou dérasine sak nou la planté 3 in tan pou tué é in tan pou géri, in tan pou kasé é in tan pou konstrui, 4 in tan pou pléré é in tan pou rir, in tan pou souplingn é in tan pou dansé, 5 in tan pou jèt bann galé é in tan pou ramas bann galé, in tan pou sèr in moun dan son bra é in tan pou pa sèr in moun dan son bra, 6 in tan pou rodé é in tan pou aksèpté ké sak nou rod la pèrd, in tan pou gardé é in tan pou jété, 7 in tan pou déchiré é in tan pou koud, in tan pou arèt kozé é in tan pou kozé, 8 in tan pou émé é in tan pou détèsté, in tan pou la gèr é in tan pou la pé. 10 Ma la vu lo travay ké Bondié la done bann garson bann zom pou fé, komsa banna lé bien okipé. 11 Kan la ariv lèr, li la fé tout zafèr in joli fason. Mèm lo lidé viv pou toultan Li la mèt sa dan lo kèr bann zom ; pourtan, jamé zot va dékouv lo débu é la fin travay Bondié. 12 Ma la fini par dir amoin, na poin rien pli méyèr pou domoun k’èt dan la joi é fé sak lé bien tank zot lé vivan, 13 mé osi ké tout i manj, i boi é zot i pran plézir dan zot travay, mèm si lé dur. Sa sé lo kado Bondié. 20 Toulmoun i sava lo mèm landroi. Zot tout i sort dann la pousièr, é zot tout i artourn dann la pousièr.